Կա­ռա­վա­րու­թյան և իրա­վա­պահ հա­մա­կար­գի նկատ­մամբ ժո­ղովր­դի վստա­հու­թյու­նը ներ­կա­յումս ծայ­րա­հեղ ցածր է և շա­րու­նա­կում է ընկ­նել

rossaprimavera.ru-ն «Կրակոցներ «Էրեբունի պլազայում». ցավալի պատահականությո՞ւն, թե՞ անտաղանդ բեմադրություն» վերնագրով հոդվածում գրում է, որ Հայաստանի՝ 2020 թվականի հունվարի ամենակարևոր իրադարձություններից մեկը եղել է Երևանի «Էրեբունի Պլազա» բիզնես կենտրոնում: 

Ըստ ժամանակագրության, հունվարի 23-ի կեսօրին «Էրեբունի պլազա» բիզնես կենտրոնի վրա հարձակված զինված տղամարդը պատանդներ է վերցրել: 

Ինչպես ավելի ուշ պարզվել է, հանցագործը 1987 թվականին ծնված Արթուր Թորոսյանն է: Թորոսյանը փորձել է մտնել Հայաստանի նախկին նախագահ Ռոբերտ Քոչարյանի գրասենյակ, որ տեղակայված է նույն շենքում: Այնուամենայնիվ, նա դա արել է շատ տարօրինակ կերպով՝ փոխանակ պարզապես զանգահարելու և վերելակ մտնելու, նա սկսել է բղավել, կրակել, զենքով սպառնալ և պատանդներ վերցրել: 

Զենքը, որը սկզբում շատերը սխալմամբ նշել են որպես ավտոմատ, իրականում եղել է «Սայգա -12» որսորդական հրացան: Ոստիկանության պետի ժամանակավոր պաշտոնակատար Արման Սարգսյանի գլխավորությամբ ոստիկաններն անմիջապես դեպքի վայր են մեկնել: 

Արման Սարգսյանը անձամբ է բանակցություններ վարել ահաբեկչի հետ։ Տեսանյութից երևում է, թե ինչպես է Սարգսյանը շփվում ահաբեկչի հետ: 

Հանցագործը հանգիստ խոսում է ոստիկանի հետ, հետո նստում են բազմոցին և շարունակում զրույցը, ապա ահաբեկիչն առանց ձեռնաշղթաների Սարգսյանի հետ մտնում է մեքենա: 

Միջադեպն ավարտվել է, և բարեբախտաբար զոհեր չեն եղել: Երևանի դատարանը որոշել է Արթուր Թորոսյանին կալանավորել երկու ամիս ժամկետով: Նրա դեմ հարուցվել է քրեական գործ՝ «ապօրինի զենք պահել», «պատանդներ վերցնել», ինչպես նաև «գույքի դիտավորյալ ոչնչացում կամ վնասում» հոդվածներով: 

Այս հոդվածների համաձայն, «հրաձիգին» սպառնում է մինչև տասը տարի ազատազրկում: Հատկանշական է, որ այդպես տարօրինակ և անտրամաբանական գործող հանցագործը ոստիկանությունում շատ խելամտորեն հրաժարվել է խոսել առանց փաստաբանի: Ավելի ուշ նրա փաստաբան Էդուարդ Աղաջանյանից հայտնի է դարձել, որ մեղադրյալը համաձայն չէ մեղադրանքների հետ: 

Միևնույն ժամանակ, Աղաջանյանը ուշադրություն է հրավիրել Թորոսյանի տարօրինակ պահվածքի վրա և առաջարկել մեղադրյալի մեղսունակության դատաբժշկական փորձաքննություն իրականացնել։ Այնուամենայնիվ, նշենք, որ Թորոսյանի տարօրինակությունները նկատվել են նույնիսկ ավելի վաղ: Հենց որ հայտնի է դարձել «հրաձիգի» անունը, գտնվել է նրա ֆեյսբուքյան էջը։ 

Այդ էջը, որը ընդամենը մի քանի ամսվա պատմություն ունի, ընդհանուր առմամբ, տարօրինակ տպավորություն է թողնում: Այն պարունակում է ի պաշտպանություն Քոչարյանի տարօրինակ հաղորդագրություններ, բայց ոչ միայն դա: 

Օրինակ՝ այստեղ հրապարակված է 19-րդ դարի հայտնի միստիկ Ելենա Բլավացկու գրքի շապիկի լուսանկարը: Լրագրողները զրուցել են Թորոսյանի հարազատների և հարևանների հետ: Պարզվել է, որ Արթուր Թորոսյանը հանգիստ անձնավորություն է, ընդհանուր առմամբ լավ տպավորություն է թողնում: 

Չնայած ունեցած երկու բարձրագույն կրթությանը, նրա աշխատանքի վերջին տեղը եղել է անվտանգության ծառայության «Բերկութ» մասնավոր ընկերությունում պահակի աշխատանքը, բայց նա հեռացել է նաև այդ աշխատանքից: Այս ամենը բուռն քննարկման առարկա է դարձել համացանցում: 

Գործող կառավարության աջակիցները ահաբեկչի՝ Քոչարյանի հետ «կապից» ուրախացել են: Սակայն մեծ ռեզոնանս է առաջացել այն փաստը, որ հանցագործը ձերբակալվել է խիստ մեղմ պայմաններում՝ առանց ձեռնաշղթաների: Այդ համատեքստում հատկապես ցնցող է «Էրեբունի պլազայում» տեղի ունեցած միջադեպից առաջ և հետո ընդդիմության տարբեր ակտիվիստների բերման ենթարկելու հակադրությունները: 

Ըստ լրագրող Գևորգ Խաչատրյանի, «ահաբեկիչը ինչ-որ բանակցություններից հետո զենքը հանձնել է, և նրան ուղեկցել է միայն մեկ ոստիկան՝ առանց ձեռնաշղթաների, որը շատ տարօրինակ է, եթե հիշենք, թե ինչպես են ձերբակալել Նարեկ Մութաֆյանին, որը պարզապես դատավոր Աննա Դանիբեկյանին հարց էր տվել»։ 

Շատերը ենթադրում են, որ այդ ամբողջ միջադեպը անվտանգության ուժերի սադրանքն է: Հրապարակախոս Արտակ Վարդանյանը կարծում է, որ սադրանքը կարող է հետապնդել ավելի հրատապ խնդիրներից հասարակության ուշադրությունը շեղելու նպատակ, ընդ որում, դա իրականացվել է անվտանգության ուժերի անտաղանդ կատարմամբ։

 Ենթադրվում է, որ այն իրականացվել է Քոչարյանին կամ այլ մեկին զրպարտելու նպատակով։ Ըստ հրապարակախոս Լանա Մշեցյանի, «Երևանում ապրելը դարձել է սարսափելի, ամեն օր կրակոցներ, սպանություններ, չխոսելով արդեն «նախկինների» շարքից հայտնի մարդկանց անվերջ ձերբակալությունների մասին»։

 Ըստ նրա, այն ամենը, ինչ տեղի է ունենում, ազդում է մարդկանց վրա, և ինքնին ստեղծված այդ մթնոլորտը կարող էր Թորոսյանին հասցնել հանցագործության: 

Այն իրավիճակը, երբ օրենքի շրջանակներում գործող ընդդիմության անդամները կալանավորվում են ուժի գործադրմամբ, իսկ իրական ահաբեկիչները՝ «Սասնա ծռերը», ոչ միայն ազատ «ֆռֆռում» են, այլ նաև ստեղծում կուսակցություն և առանձնազրույցներ ունենում վարչապետի հետ, ինքնին չի կարող չհանգեցնել բռնության աճի: 

Ըստ հրապարակախոս Մարինա Մկրտչյանի, «ռազմականացված օբյեկտի զինված գրավման, պահման և պատանդների սպանության անպատժելիության նախադեպը առկա է, այնպես որ, ինչո՞ւ դա չկրկնվի, եթե դա հիմա էլ ավարտվում է ոստիկանապետի հետ ինտիմ զրույցով»: 

Շատերը այն կարծիքին են, որ անկախ նրանից՝ Թորոսյանը ահաբեկչության է գնացել սեփական նախաձեռնությամբ, թե՞ ինչ-որ մեկի դրդմամբ, ապագայում կարող է օգտագործվել Քոչարյանի և, ընդհանուր առմամբ, ընդդիմության դեմ: 

Ըստ Գևորգ Խաչատրյանի, «այդ ժամանակ կսկսվեն երկրորդ նախագահի իրական աջակիցների ձերբակալությունները, և 5-րդ ալիքի սեփականատեր Արմեն Թավադյանի ձերբակալությունը դրա օրինակն է»: Այս տարօրինակ հանցագործության պատճառների մասին չունենալով փաստեր՝ այժմ դժվար է որևէ բան ասել:

 Բայց կարելի է վստահորեն խոսել այլ բանի մասին: Տեղի ունեցածի վերաբերյալ հասարակության արձագանքը ցույց է տալիս, որ կառավարության և մասնավորապես անվտանգության ուժերի նկատմամբ ժողովրդի վստահությունը ներկայումս ծայրահեղ ցածր է և շարունակում է ընկնել:

 Եվ դա զարմանալի չէ: Մեկուկես տարվա ընթացքում բոլորը ընտելացել են նրան, որ իրավապահ մարմինները անամոթաբար աշխատում են միայն քաղաքական ընդդիմախոսներին ճնշել, իսկ ահաբեկիչներն ազատ են:

 Նման իրավիճակը չի կարող վաղ թե ուշ չհանգեցնել հանրային պայթյունի, ընդ որում, անվտանգության ուժերին ևս նման վիճակը արդեն զզվեցրել է:

Կամո Խաչիկյան