Զբո­սաշր­ջու­թյան կո­մի­տեն էլ կնե­րառ­վի

Էկոնոմիկայի նախարարությունը հանրային քննարկման է ներկայացրել նախագիծ, որով առաջարկում է կառավարության 2006 թվականի հունիսի 22-ի «ՀՀ սահմանային էլեկտրոնային կառավարման տեղեկատվական համակարգ ստեղծելու, դրա շահագործման կարգը և համակարգից օգտվողների ցանկը սահմանելու մասին» N 884-Ն որոշմամբ հաստատված N 2 հավելվածի սահմանային էլեկտրոնային կառավարման տեղեկատվական համակարգից օգտվողների ցանկում ներառել նաև էկոնոմիկայի նախարարության զբոսաշրջության կոմիտեն: 

Նախագիծը մշակել է զբոսաշրջության կոմիտեն: Գործընթացում ներգրավված գերատեսչություններն են ազգային անվտանգության ծառայությունը և վիճակագրական կոմիտեն: Նախագծի հիմնավորման մեջ նշվում է, որ զբոսաշրջությունը կարևոր դեր է խաղում Հայաստանի տնտեսության և սոցիալական կյանքում, դրա համար մեծ է վիճակագրական տվյալների պահանջն այդ բնագավառում: 

Մեր երկրում պաշտոնական վիճակագրությունը, այդ թվում նաև զբոսաշրջության բնագավառում, վարում է վիճակագրական կոմիտեն:

 Հայաստանում ներգնա և արտագնա զբոսաշրջիկների ընդհանուր թվաքանակի հաշվարկման համար հիմք է հանդիսանում սահմանային անցման կետերում ուղևորների հաշվառման արդյունքում արձանագրված` ՀՀ ժամանողների և ՀՀ-ից մեկնածների թվաքանակի վերաբերյալ տեղեկատվությունը, ստացված ԱԱԾ սահմանային էլեկտրոնային կառավարման տեղեկատվական համակարգով (ՍԵԿՏ), ինչպես նաև՝ «Ժամանողների և մեկնողների ընտրանքային հետազոտության» արդյունքները, ինչը ներկա պայմաններում բավարար ճշգրտություն չի ապահովում զբոսաշրջության վիճակագրության վարման համար: 

Հավաքված տվյալների հիման վրա իրականացվում են վերլուծություններ, որը հնարավորություն է տալիս բացահայտել Հայաստանի զբոսաշրջության ոլորտի դրական և բացասական կողմերը, վերանայել զբոսաշրջության ռազմավարությունը, մշակել զբոսաշրջային նոր փաթեթներ և բարելավել զբոսաշրջության ոլորտում իրականացվող ծառայությունների որակը: 

Նշվում է, որ զբոսաշրջության վիճակագրության վարման գործող մեթոդաբանության, ՀՀ սահմանային էլեկտրոնային տեղեկատվական համակարգի միջոցով Հայաստան այցելած զբոսաշրջիկների քանակի վերաբերյալ առավել ճշգրիտ տվյալների ստացման նպատակով բազմիցս շահագրգիռ կողմերի հետ համատեղ կայացել են մի շարք աշխատանքային քննարկումներ, որի արդյունքում ձևավորվել է ընդհանուր ընկալում, որ սահմանային էլեկտրոնային տեղեկատվական համակարգի օգնությամբ հնարավոր է էապես բարելավել զբոսաշրջության վիճակագրությունը`ապահովելով առավելագույն ճշգրտությամբ տվյալներ Հայաստան այցելած զբոսաշրջիկների քանակի վերաբերյալ, այդ թվում` ըստ քաղաքացիության, սեռատարիքային խմբերի և սահմանային անցման կետերի: 

Դա հնարավոր է իրականացնել համապատասխան համակարգչային ծրագրի կիրառմամբ: 

Այդ նպատակով մշակվել և 2018 թվականի ապրիլի 12-ին N 14 արձանագրային որոշմամբ կառավարության հավանությանն է արժանացել «ՀՀ-ում զբոսաշրջության վիճակագրության վարման մեթոդի կատարելագործմանն ուղղված միջոցառումներին հավանություն տալու մասին» ՀՀ կառավարության արձանագրային որոշումը, որի նպատակն է վերը նշված համակարգի օգնությամբ էապես բարելավել զբոսաշրջության վիճակագրությունը` ապահովելով առավելագույն ճշգրտությամբ տվյալներ Հայաստան այցելած զբոսաշրջիկների քանակի վերաբերյալ: 

Զբոսաշրջության կոմիտեն հայտարարել է կազմակերպության ընտրության մրցույթ, հաղթող է ճանաչվել «Զենտա» ՍՊԸ-ն, որը ներկայումս մշակում է համակարգչային ծրագիր։ Այն պետք է վերլուծի ՍԷԿՏ համակարգ մուտքագրված անձանց սահմանահատումների տվյալները` առանձնացնելով այն անձանց քանակները, ովքեր ՄԱԿ Զբոսաշրջության Համաշխարհային Կազմակերպության մեթոդաբանությանը և «Զբոսաշրջության և զբոսաշրջային գործունեության մասին» ՀՀ օրենքին համապատասխան համարվում են զբոսաշրջիկներ: 

Հաշվի առնելով այս և մի շարք այլ խնդիրներ, առաջարկվում է, ի թիվս այլ պետական մարմինների, զբոսաշրջության կոմիտեն ևս ներառել ՀՀ սահմանային էլեկտրոնային կառավարման տեղեկատվական համակարգից օգտվողների ցանկում: 

Ակնկալվում է, որ նախագծի ընդունումը և կատարված փոփոխությունները կնպաստեն կարճ ժամկետներում ՀՀ ժամանումների վերաբերյալ ճշգրիտ տեղեկատվության ստացմանը, ինչի միջոցով հնարավոր կդառնա զբոսաշրջության կոմիտեի կողմից վիճակագրական վերլուծությունների, հետազոտությունների, ինչպես նաև ոլորտում պետական քաղաքականության մշակմանն ու իրականացմանն ուղղված աշխատանքների առավել արդյունավետ կատարումը:

ԼՈՒՍԻՆԵ ԱՌԱՔԵԼՅԱՆ