Ինչո՞ւ է առողջությանը վնաս պատճառել «ռումյանան»

Կարմրաներկը (ռումյանա) դեկորատիվ կոսմետիկ միջոց է, որն օգտագործում են կանայք այտերի երանգավորման, ավելի երիտասարդ տեսք ստանալու, կամ այտոսկրերն ընդգծելու համար։ Այսօր այդ միջոցը կարելի է գտնել գրեթե յուրաքանչյուր աղջկա կոսմետիկ պայուսակում: Իր պատմության ընթացքում մարդիկ կարմրաներկին տարբեր կերպ են վերաբերվել: Որոշակի ժամանակահատվածում գռեհիկ է համարվել կարմրաներկ օգտագործելը, իսկ մեկ այլ ժամանակահատվածում կանայք այն օգտագործել են մասսայաբար: 

Հին եգիպտացիները առաջինն են եղել, որ սկսել են օգտագործել դրանք: Դա եղել է դեռևս մ.թ.ա. 3-րդ հազարամյակում: Կարմրաներկի արտադրության համար օգտագործվել են որոշ բույսեր կամ կարմիր հատապտուղների հյութեր: 

Ժամանակի ընթացքում այտերի կարմրության նորաձևությունը տարածվել է Հունաստանում և մի շարք այլ երկրներում: Եվրոպացի կանայք սկսել են առավել ակտիվորեն օգտագործել կարմրաներկը՝ շնորհիվ Ֆրանսիայի թագուհի Եկատերինա Մեդիչիի, որն այդ կոսմետիկ արտադրանքը նորաձևության մեջ է մտցրել 16-րդ դարի 30-ականներին: Ֆրանսիական ազնվականության համար այս կոսմետիկ արտադրանքը պատրաստվել է, ինչքան էլ զարմանալի է, բժիշկների կողմից: 

Նրանք կարմրաներկ պատրաստել են միջատներից ստացված ներկից, կարմինից, մոմից: Մնացած մարդիկ ստիպված են եղել այդ նպատակով օգտագործել բույսեր և հատապտուղների հյութեր: Եվրոպայի որոշ երկրներում կարմրաներկի ավելի պայծառ երանգ ստանալու համար օգտագործել են սնդիկի բնական հանքանյութ կինովարը, որն առողջության համար վտանգավոր նյութ է: 

Դրա  հետևանքով մեծ թվով ազնվական կանայք տառապել են թուլությունից, գլխացավերից և երբեմն անգամ տեսողության խանգարումներից: Բժիշկներին հաջողվել է հայտնաբերել նման ախտանշանների պատճառը միայն 17րդ դարի վերջին: Դրանից հետո կինովարի փոխարեն սկսել են օգտագործել սաֆլոր ներկանյութը: 19-րդ դարում՝ Վիկտորիա թագուհու օրոք, կոսմետիկայի օգտագործումը պարկեշտ աղջիկների համար համարվել է անընդունելի: Համարվում էր, որ այն միայն թեթևաբարո կյանք վարող կանանց համար է:

 Այդ պատճառով աղջիկները ստիպված են եղել այտերը մերսել, որպեսզի դրանք վարդագույն տեսք ստանան: Ներկայումս ժամանակակից կարմրաներկերի հիմնական բաղադրիչը մանրացված տալկի փոշին է: Հենց տալկի օգտագործումն է կոսմետիկա արտադրողներին հնարավորություն տվել ստանալ լավագույն արդյունք, քանի որ այդ նյութը հավասարաչափ է ծածկում մաշկը և հեշտությամբ ներառվում մաշկի գույնի մեջ: Որպես ներկանյութ դեռևս օգտագործվում են նաև կարմինն ու սաֆլորը: Մաշկի վրա առավել թեթև էֆեկտ է առաջացնում այն կարմրաներկը, որը նոսրացված է գլիցերինիով կամ զտված մոմով: 

Հաճախ կարմրաներկի մեջ ներառում են նաև արևապաշտպան միջոցներ, որոնք պաշտպանում են մաշկը ուլտրամանուշակագույն ճառագայթումից: Ժամանակակից արտադրողները առաջարկում են կարմրաներկերի հսկայական ընտրություն: Կարմրաներկը կարող է լինել փոշու, քսուկի և նույնիսկ հեղուկի ձևով, և յուրաքանչյուր տեսակ ունի իր կիրառման առանձնահատկությունները: 

Օրինակ՝ հեղուկ կարմրաներկը կատարյալ է այն երիտասարդ աղջիկների համար, որոնք պարզապես նոր են սովորում դիմահարդարվել, քանի որ հեշտ է վերահսկել ներկի քսման ինտենսիվության աստիճանը: