Ար­տա­կարգ իրա­վի­ճակ­նե­րում բո­լո­րի հա­մար չա­փա­զանց լավ լու­ծում­ներ չեն լի­նում

Կորոնավիրուսը, այդուհանդերձ, ինչպես և սպասելի էր, թափանցեց Հայաստան: Փաշինյանի «թու-թու-թու»-ն չօգնեց, քանի որ համաճարակը սնահավատ չէ: Կառավարությունը ակնհայտորեն չէր նախապատրաստվել այս իրավիճակին՝ թերևս հույս ունենալով, որ եղանակները արագ կտաքանան մինչև +2527օ և միաժամանակ հնարավոր կլինի անցկացնել այնքան ցանկալի հանրաքվեն: 

Հենց այդ միջոցառումն էլ ակնհայտորեն իշխանության անգործության հիմնական պատճառներից մեկն էր, թեպետ երբ առաջին վարակակիրը հայտնվեց Իրանում, անմիջապես պետք էր միջոցներ ձեռնարկել ու փակել սահմանները: Բայց իշխանությունը նախապատրաստվում էր քարոզարշավի, մինչև Սյունիքում և Վայոց ձորում անցկացված հանդիպումներից էլ պարզ դարձավ, որ կորոնավիրուսը խրոխտ քարոզարշավից էլ չի վախենում և գրոհում է:

Այժմ իշխանությունը նոր-նոր անցնում է հրատապ միջոցների ձեռնարկման ՝ հընթացս փորձելով սեփական անպատասխանատվության մեղավորությունը բարդել «անգիտակից» քաղաքացիների վրա: Եվ, այնուամենայնիվ, իրավիճակն ակնհայտորեն վատթարացման միտում ունի. հիվանդների ու մեկուսացվածների թիվն օրավուր մեծանում է: 

Մյուս կողմից՝ արդեն իսկ փակված սահմանների պարագայում չի հաջողվելու պահպանել տնտեսական ակտիվության եղած համեստ տեմպերը: Հետևապես տնտեսության հիմնական ճյուղերում կորուստներն անխուսափելի են, արդեն իսկ անհանգստացնող վիճակում է տուրիզմը: Զբոսաշրջիկների բացակայությունը հարվածում է ամբողջ սպասարկման ոլորտին, արտարժույթի նվազման հետևանքով սկսված դրամի արժեզրկումը շարունակվելու է: 

Իհարկե, ԿԲ-ն կարող է պահուստային ֆոնդից դոլար նետել շուկա և առժամանակ պահել դրամի փոխարժեքը, բայց դա կունենա միայն կարճաժամկետ արդյունք, քանի որ պետական պահուստները անսպառ չեն:

Տնտեսական իրավիճակի վրա արդեն իսկ բացասական ազդեցություն է թողնում ռուսական ֆոնդային շուկայի լրջագույն անկումը, որի պատճառը նավթի գնի շուրջ առաջացած պատերազմներն են՝ արդյունահանող երկրների միջև: 

Ռուբլին արժեզրկվել է առնվազն 10 նիշով, ինչը նշանակում է, որ Ռուսաստանից Հայաստան մտնող տրանսֆերտները ևս նվազելու են, որովհետև իջնելու է ռուբլու գնողունակությունը: 

Թեպետ Ռուսաստանը ակնհայտորեն շատ լուրջ է նախապատրաստվել համաճարակին, բայց եթե այն լայն տարածում ստանա, կարող են բազմաթիվ աշխատատեղեր փակվել: Այդ դեպքում Հայաստանից «խոպան» մեկնածների առնվազն մի մասը հարկադրված կլինի վերադառնալ, ինչը համալրելու է գործազուրկների բանակը և, բնականաբար, մեծացնելու սոցիալական լարվածությունը: Բոլոր այս աննպաստ սցենարներին Հայաստանի կառավարությունը ակնհայտորեն պատրաստ չէ:

Ավելին, իշխանությունը մինչ երեկ դեռևս տատանվում էր նույնիսկ հանրաքվեի չեղարկման հարցում: Այն դեպքում, երբ մի ամբողջ քաղաք՝ Էջմիածինը, հայտնվել է համաճարակի գոտում, իսկ տարածումն ադեն ընդգրկում է այլ բնակավայրեր: Իշխանության մտահոգությունը հասկանալի է, որովհետև հանրաքվեի անցկացումը ավելի ուշ ժամկետներում հազիվ թե վարչախմբի համար դրական ելքով ավարտվի: 

Սակայն այլ բան է ցանկությունը, այլ բան՝ իրականությունը: Հաճախ իրավիճակն ինքն է թելադրում բոլոր ցանկությունները, այդ թվում՝ այնպիսի «կենաց-մահու» ցանկությունը, ինչպիսին ունի այս իշխանությունը արագորեն ՍԴ դատավորներից ձերբազատվելու: Դա ցույց տվեցին նաև կառավարության նիստում և ԱԺ-ում երեկվա քննարկումները: Արտակարգ իրավիճակներում, ինչպես պատերազմի ժամանակ, բոլորի համար չափազանց լավ լուծումներ չեն լինում, լինում են միայն վնասները առավելագույնս բացառող կամ գոնե նվազագույնի հասցնող լուծումներ:

Այնպես որ, լավ է, որ թեկուզ ուշացումով, բայց որոշակի քայլեր ձեռնարկվում են: Ու հետագայում էլ բոլոր հարցերին պետք է տալ այնպիսի լուծումներ, որոնք սեփական ցանկություններից չեն բխում, այլ հանուրի շահերից: Հակառակ դեպքում իշխանությունը կփոխվի շատ ավելի արագ, քան խորհրդարանում և կառավարությունում նստածները պատկերացնում են:

ՎԱՀԱՆ ՎԱՐԴԱՆՅԱՆ