Ադրբեջանում Նարդարանի շիաներին թույլ չի տրվել սգո արարողություն անցկացնել

Բաքվից 25 կմ հեռավորության  վրա գտնվող շիա ադրբեջանցիների հոգեւոր կենտրոն Նարդարան ավանում իշխանությունները թույլ չեն տվել անցկացնել Իմամ Հուսեյնի մահվան 40-րդ օրվա կապակցությամբ սգո արարողությունը, որն այս տարի նշվում է դեկտեմբերի 2-ին:

Այս մասին, ինչպես հաղորդում է«Արմենպրես»-ը», «Թուրան»-ին հայտնել է Նարդարանի ավագանու խորհրդի ղեկավար Նաթիգ Քերիմովը: Նրա խոսքով` իրավապահ մարմինները դա պատճառաբանել են «սադրանքների հնարավորությամբ»:

Նա նաեւ հայտնել է, որ անհայտ է մնում նաեւ նոյեմբերի 26-ին ոստիկանության եւ քաղաքացիների միջեւ բախումների ժամանակ զոհված երեք նարդարանցիների հուղարկավորության հարցը: Զոհվածների հարազատները ասում են, որ նրանք արդեն հուղարկավորվել են, բայց չեն հայտնում, թե կոնկրետ որտեղ եւ երբ:

«Մենք չենք հասկանում, թե ինչ կապ ունի հանցագործության դեմ պայքարը կրոնական ծեսերի հետ», -ասել է Քոերիմովը` մեկնաբանելով ավանում կրոնական պաստառների ապամոնտաժումը եւ դրանք ադրբեջանական պետական դրոշներով փոխարինելը:

«Թուրան»-ը հայտնում է, որ ավանում դեռեւս չի վերականգնվել էլեկտրաէներգիայի մատակարարումը, եւ հայտնի չէ, թե դա երբ տեղի կունենա:

Ըստ գործակալության, չնայած Նարադարանում առկա ոչ պաշտոնական արտակարգ դրությանը, տեղացիները կենտրոնական հրապարակում հավաքվել էին նշելու «Իմամ Հուսեյնի 40-րդ օրը» սգո արարողությունը: Ընդ որում, ավան թույլ չի տրվել մոևտք գործել արարողությանը մասնակցելու համար այլ շրջաններից եկած ուխտավորներին: 

Ադրբեջանի նախագահ Իլհամ Ալիեւի հրամանով եւ անձնական վերահսկողությամբ այդ երկրում բռնաճնշումներ են սկսվել իսլամի շիա ուղղության առաջնորդների եւ  հետեւորդների նկատմամբ` մեղադրելով նրանց ահաբեկչության մեջ: Ընդդիմությունն Ալիեւի այդ քայլը բացատրել է այն բանով, որ նման գործողություններով իշխանությունը ցանկանում է ժողովրդի ուշադրությունը շեղել երկրում ահագնացող տնտեսական ճգնաժամի հետեւանքներից, ազգային անվտանգության նախարարությունում կոռուպցիայի պատճառով կադրային ջարդից, գնալով մեծացող գործազրկությունից, մանաթի արժեզրկման հետ կապված թանկացումներից եւ այլն:

Դեկտեմբերի 27-ին Ադրբեւջանի ՆԳՆ կողմից շիա հավատացյալների դեմ իրագործված բռնաճնշումների արդյունքում կալանավորվել են Ադրբեջանի շիաների առաջնորդ Թալե Բաղըրզդեին եւ եւս 22 հավատացյալներ: Ոստիկանների գործողությունները զայրացրել են Նարդարանի բնակիչներին: Նրանց եւ ոստիկանության միջեւ բախումներ են սկսվել: Փոխհրաձգությունների հետեւանքով երկու ոստիկան եւ 5 բնակիչներ սպանվել են: Հաջորդ օրերին իսլամիստների եւ ոստիկանության միջեւ բախումներ են սկսվել նաեւ Ադրբեջանի շրջաններում` Գյանջայում, Լենքորանում եւ այլ քաղաքներում:

Ադրբեջանի ՆԳՆ-ը եւ գլխավոր դատախազությունը միջադեպի առնչությամբ հայտարարություն է տարածել, որում ասվում է, որ «ավանի շիա առաջնորդները ծրագրում են բռնությամբ փոխել սահմանադրական կարգը եւ երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում եւ երկրի շրջաններում եւ մատակարարել նրանց զենքով եւ պայթուցիկ նյութերով, խումբը Նարդարան ավանում անօրինական հավաք է անցկացրել` քննարկելով իշխանությանն անհնազանդության ակցիայի կազմակերպում, թռուցիկներ է բաժանել բնակչությանը եւ որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում»:

Դեկտեմբերի 2-ին շիաները, որոնք կազմում են Ադրբեջանի բնակչության 60 տոկոսից ավելին, նշում են Իմամ Հուսեյնի սուգի 40-րդ օրը:

Նարդարանի Իմամ Հուսեյնի մզկիթը հանդիսանում է գլխավոր կենտրոնը, որտեղ Աբշերոնի բնակիչներն ավանդաբար նշում են այդ օրը: Ամեն տարի արարողությանը հավաքվում է 20-30 հազար մարդ: Այս տարի այդ սուգը համընկնում է Նարդարանում ոստիկանության հետ օրորդ տեղի ունեցած բախումներում զոհված քաղաքացիների հուղարկավորության հետ:

Ոստիկանության հետ բախումները հատուկ իմաստ են ձեռք բերում այն առումով, որ տեղացիները պատմական զուգահեռներ են անցկացնում` համեմատելով 1400 տարի առաջ Իմամ Հուսեյնի ստոր սպանությունն այսօրվա իրադարձությունների հետ