«Մարդիկ ավելի պահանջատեր և հետևողական են դարձել. շահագրգիռ կողմերի միջև համագործակցությունը սկսում է կայանալ»

Past.am

Արտակարգ դրության առաջին օրերին, բայց հատկապես այն ժամանակ, երբ պարզ դարձավ, որ Հայաստանում ևս կորոնավիրուսով վարակված քաղաքացիներ ունենք, սպառողական շուկայում եղան թե՛ գնային տատանումներ, թե՛ մեծ ծավալի խուճապային գնումներ:

«Սպառողների ասոցիացիայի» իրավաբան Սյուզաննա Չիլինգարյանի հետ զրույցում փորձել ենք պարզել, թե այս ընթացքում քաղաքացիներից ի՞նչ հիմնական դժգոհություններ ու մտահոգություններ են ստացել: Նա նշում է՝ գնային փոփոխությունների մասին ինքը դեռ այն ժամանակ տեղեկացրել էր տնտեսական մրցակցության պաշտպանության պետական հանձնաժողովին, որը բավական լուրջ հսկողություն իրականացրեց շուկայում: «Այս ընթացքում լավ էր նաև, որ ԵԱՏՄ մի շարք ապրանքներ Հայաստան էին ներկրվում առանց մաքսատուրքի: Այդ պատճառով նաև որոշակի ապրանքատեսակների՝ հավի մսի, շաքարավազի, կարագի և այլ ապրանքների դեպքում եղավ գների իջեցում»,-Past.am-ի հետ զրույցում ասում է Չիլինգարյանն՝ ընդգծելով, որ կառավարությունը ևս բավական հստակ աշխատանք տարավ, այդ պատճառով գների հետ կապված հարցերը բավական արագ կարգավորվեցին:

Նշում է՝ կարանտինային այս օրերին ստացել է բազմաթիվ բողոքներ: «Շատ էին բողոքները կապված ավիատոմսերի հետ: Մարդիկ տոմսեր էին գնել և կանգնել փաստի առաջ՝ եթե նույնիսկ ոչ այժմ, ապա գոնե հետո կկարողանա՞ն այդ տոմսերն օգտագործել՝ վերադարձնել կամ մեկնել արտերկիր: Այս առումով շատ տուրիստական ընկերությունների հետ բավական դժվար էր կապի դուրս գալը, քանի որ շատերն ուղղակի չէին պատասխանում զանգերին կամ էլ հստակ պատասխաններ չէին տալիս: Հետո արդեն խնդիրներ եղան սպառողական շուկայում, մասնավորապես ապրանքների վերադարձի հետ կապված: Տեսեք՝ արտակարգ դրության ժամանակահատվածը համարվում է ֆորս-մաժորային իրավիճակ, և քաղաքացին, անկախ իր կամքից, որոշակի իրադարձություններից հետ է մնում, և երբ նա իր գնած ապրանքը չի վերադարձնում գնման օրվանից հետո 14-օրյա ժամկետում, այլ դա անում է ավելի ուշ, սա խախտում չպետք է համարվի, քանի որ այս օրերին առևտրի շատ կենտրոններ չէին գործում պարետի ցուցումով»,-նշում է մեր զրուցակիցը: Նա նաև ընդգծում է՝ այս շրջանում սննդի որակի հետ կապված բողոքներ չի ստացել, բողոքներ են եղել կապված ալկոգելի հետ, որոնցում սպիրտի տոկոսային հարաբերակցությունը չի եղել պատշաճ քանակով, խնդիրներ են եղել նաև ծավալի հետ:

Չիլինգարյանը նաև հետաքրքիր արձանագրում է անում: Երբ իրեն տարբեր տեսակի բողոքներով դիմում են քաղաքացիները, իսկ նա էլ իր հերթին դիմում է պետական գերատեսչություններին կամ էլ մասնավոր տնտեսվարողներին, հարցերը մեծ մասամբ լուծում են ստանում: Ստացվում է՝ բոլոր շահագրգիռ կողմերի միջև համագործակցությունը սկսում է կայանալ: «Բավականին բան է փոխվել: Բարձրացել է իրավագիտակցության մակարդակը, մարդիկ պահանջատեր են դարձել և հետևողական են իրենց գնած սննդի որակի, ժամկետի և բաղադրության վերաբերյալ: Տնտեսվարող սուբյեկտները ևս սկսել են էլ ավելի պատասխանատու վերաբերել իրենց արտադրանքի որակին: Գիտակցում են՝ հաճախորդը կարևոր է, շուկայում դիրք գրավելը ու պահպանելն՝ անհրաժեշտ, և եթե որևէ խնդիր լինի, ապա դա միանշանակ սև բիծ է թողնելու նրանց հետագա աշխատանքի վրա: Տնտեսվարողները բավական լուրջ են վերաբերում նաև սպառողների պաշտպաններին, փորձում լուծում տալ առաջացած խնդիրներին»,-ընդգծում է Չիլինգարյանը՝ հավելելով, որ իրենց առաքելությունն է լսել քաղաքացուն, փորձել օգնել նրան օրենքի շրջանակներում. «Օրենքով մեզ տրված լիազորություններն, ավաղ, սահմանափակ են, ինչը բավականին խնդիրներ է ստեղծում մեզ համար: Բայց սպառողների պաշտպանները և տնտեսվարող սուբյեկտներն իրենց մեջ փորձում ենք լուծել առաջացող խնդիրները»,-եզրափակում է Սյուզաննա Չիլինգարյանը:

Լուսինե Առաքելյան