Լողազգեստի անցած «ուղին». համեստագույնից՝ սադրիչ

Նորաձևության պատմության մասնագետները գտնում են, որ առաջին լողազգեստները հայտնվել են անցյալ դարում: Իհարկե, լողանալու հագուստները շատ ավելի վաղ են հայտնվել՝ մոտ երկու հազար տարի առաջ, բայց դրանք ոչ մի կապ չունեն ժամանակակից լողազգեստների հետ: 

Օրինակ` Հին Հռոմում լոգանքի համար օգտագործում էին տոգա, որը իրենից ներկայացնում է կիսաշրջանաձև գործվածք գլխի համար կտրվածքով: Այնուամենայնիվ, ավելի հաճախ մարդիկ ջրային պրոցեդուրաներ են ընդունել առանց հագուստի, կամ օգտագործել են պարզ անկողնային ծածկոցներ, կամ էլ իրենց ամենօրյա հագուստը: Կանայք մինչև 20-րդ դարի սկիզբը սահմանափակված են եղել արգելքներով և նախապաշարմունքներով, ըստ այդմ էլ անգամ պատկերացում չի եղել լողազգեստի մասին: Կանայք ստիպված են եղել լողալ իրենց առօրյա զգեստներով: 

Հաճախ նույնիսկ զգեստի փեշերին ծանր առարկաներ են կարել, որպեսզի փեշը ջրի մեջ չբարձրանա: Լոգանքի հանդերձի հայտնվելուն նպաստել է տեխնոլոգիական առաջընթացը: Երկաթուղիների զարգացման հետ մարդիկ սկսել են արագ տեղաշարժվել, ինչն էլ հնարավոր է դարձրել դեպի ծովափեր հաճախ ճանապարհորդել ը: Այդ փաստն էլ հենց խթանել է լողի համար հատուկ հագուստի ստեղծումը: Այդ հագուստը պետք է լիներ համեստ, բայց միևնույն ժամանակ թեթև և շարժումները չկաշկանդող:

Կանանց առաջին լողազգեստները ծնկից ներքև հասնող պանտալոններ են եղել: Բացի դա, զգեստներին կցվել են սև գուլպաներ: Միայն ամենահամարձակ կանայք են խիզախել ջրի մեջ մտնել առանց կոշիկների: 

Տղամարդկանց առաջին լողազգեստները եղել են սովորաբար կապույտ կամ կարմիր, առանց թևերի մինչև ծնկները հասնող գծավոր տրիկոները: 19-րդ դարի վերջերին լողը պաշտոնապես ընդգրկվել է օլիմպիական մարզաձևերի ցանկում: Այդ պահից էլ սկսվել է լողազգեստային նորաձևության արագ զարգացումը: Առաջինը արմատական փոփոխությունների են ենթարկվել տղամարդկանց լողազգեստները: 

Հենց պրոֆեսիոնալ լողի մարզիկներն են առաջին անգամ հանրության առջև հայտնվել կարմիր գույնի կարճ եռանկյունաձև վարտիքով, ինչը մեծ քննարկումների տեղիք է տվել: Այնուհետև դրան հաջորդել են կանանց լողազգեստների նորաձևության փոփոխությունները: 19-րդ դարի 80-ական թվականներին ստեղծվել է կանանց առաջին՝ մեկ կտորից բաղկացած լողազգեստը, որը նման է եղել իրար կարված շորտիկի և կոֆտայի: Դրա լրացումն են եղել գլխարկը և ծնկներից կարճ շրջազգեստը: 

Այնուամենայնիվ, լողազգեստի պատմության մեջ իսկական հեղափոխություն տեղի է ունեցել 20-րդ դարի առաջին կեսին, երբ լողափերում արձակուրդը դարձել է սիրված հանգիստ հսկայական թվով մարդկանց համար: Լողազգեստների չափսերը արագորեն նվազել են, և արդյունքում նորաձև են դարձել ավելի ու ավելի կարճ տեսակները: 1920-ականներին լողազգեստները սկսել են ավելի շատ նմանվել իրենց ներկա ժամանակակիցներին:

 Միևնույն ժամանակ հայտնվել է առաջին առանձնացված լողազգեստը: Երիտասարդ դիզայներները նախ հրաժարվել են թևքերից, իսկ հետո երկար տաբատից և ստեղծել փայլուն, ընդգրկող լողազգեստ: Սա կանանց թույլ է տվել ցուցադրել բազուկները, ապա նաև ազդրերը: Այն ժամանակ սինթետիկ գործվածքներ չեն եղել, ուստի լողազգեստները պատրաստվել են բացառապես բնական նյութերից` բամբակ, տրիկոտաժ, բուրդ: Հասարակության մեջ իսկական սենսացիա է առաջացրել 1946 թվականին Լուի Ռեարի կողմից ստեղծված լողազգեստ «բիկինին»: 

Դա եղել է նեղ վարտիք և կրծկալ: Լողազգեստի դիզայնն այդ ժամանակ աներևակայելի համարձակ էր, ինչը լուրջ հակասություններ է առաջացրել զանգվածների շրջանում: Ինչո՞ւ է լողավարտիքը կոչվում «բիկինի»: 

Ըստ պատմության, Փարիզում լողազգեստի շնորհանդեսի ներկայացման նախօրեին ամերիկյան բանակը միջուկային փորձարկումներ է իրականացրել Խաղաղ օվկիանոսում ՝ Բիկինի կոչվող ատոլի տարածքում: Քանի որ լողազգեստի հայտնվելը հասարակության մեջ իսկական պայթյուն է առաջացրել, որոշվել է այն անվանել այդ անունով: 20-րդ դարի 60-ականներին նորաձևության դիզայներ Ռուդի Հենրին ավելի հեռուն է գնացել և ստեղծել լողազգեստ, որը կոչվել է «մոնոկինի»: 

Այս մոդելի մեջ վերին մաս չկար, և դրանից հետո ակնհայտ է դարձել, որ պարզապես անհնար է հետագայում ևս կրճատել լողազգեստի չափերը: Ի հետևանս՝ հետագայում նորաձևության դիզայներները սկսել են ավելի մեծ ուշադրություն դարձնել գունային սխեմայի վրա՝ փորձարկումներ կատարելով գործվածքների, զարդարանքի և այլնի հետ: Այդ ամենի արդյունքը կարելի է տեսնել այսօր: Ժամանակակից դիզայներները ներկայումս առաջարկում են լողազգեստների մեծ ընտրություն` ցանկացած ճաշակի համար` սկսած բավականին համեստից մինչև սադրիչ: 

ԿԱՄՈ ԽԱՉԻԿՅԱՆ