Ըն­դու­նե­լու­թյան անվ­ճար և վճա­րո­վի տե­ղեր, ուս­վար­ձի չափ. ինչ պատ­կեր ունենք ԵՊՀ-ում և ՀՃՀԱՀ-ում

Ընդունելության քննություններին հաշված օրեր են մնացել, ինչպես ամեն ինչ, մեր երկրում դրանք ևս անցկացվելու են արտակարգ դրության պայմաններում:

«Փաստը» որոշեց իր ընթերցողներին ներկայացնել ՀՀ բուհերի առկա ուսուցմամբ բակալավրի ու անընդհատ և ինտեգրացված կրթական ծրագրերով 2020/2021 ուստարվա ընդունելության քննությունների տեղերի և ուսման վարձաչափերի ցանկը՝ առանձնացնելով, թե որ մասնագիտության դեպքում քանի վճարովի ու անվճար տեղ կա, և որքան է կազմում ուսման վարձը: Եվ այսպես՝ սկսենք մայր բուհից:

Ընդունելության տեղերը հետևյալ կերպ են դասակարգվել՝ ընդհանուր առմամբ անվճար տեղերը 375-ն են, 2311-ը՝ վճարովի: Առանձնացրել ենք մի քանի կրթական ծրագրեր՝ առաջնորդվելով դրանց նկատմամբ դիմորդների պահպանվող և մարող հետաքրքրությամբ: Բացի դա, գնահատման և թեստավորման կենտրոնի կայքից պարզել ենք, թե որ ծրագրի դեպքում տվյալ պահին քանի դիմորդ ունենք: Եվ այսպես: 

«Մեխանիկա» կրթական ծրագրի դեպքում նախատեսվել է 5 անվճար, 15 վճարովի տեղ, ուսվարձը կազմում է 500 հազար դրամ: 20 տեղի համար այս պահի դրությամբ հայտ է ներկայացրել 7 դիմորդ: 

«Ինֆորմատիկա և կիրառական մաթեմատիկա» ծրագրի համար նախատեսվել է 36 անվճար, 180 վճարովի տեղ, արդեն իսկ դիմել է 451 դիմորդ, տարեկան ուսվարձը կազմում է 700 հազար դրամ: «Միջուկային ռեակտորների ֆիզիկա» ծրագրի դեպքում նախատեսվել է 15 անվճար, 5 վճարովի տեղ, արդեն իսկ դիմել է 8 հոգի, ուսվարձը կազմում է 500 հազար դրամ: 

«Սննդի անվտանգություն» ծրագրի դեպքում նախատեսված է 4 անվճար, 21 վճարովի տեղ, դիմողների թիվը 8-ն է, ուսվարձը 500 հազար դրամ է: «Սերվիս» ծրագրի դեպքում ԵՊՀ-ն ունի 4 անվճար, 65 վճարովի տեղ, ուսվարձը կազմում է 650 հազար դրամ, դիմել է 163 դիմորդ: «Հնագիտություն և ազգագրություն» ծրագրի դեպքում կա 3 անվճար, 22 վճարովի տեղ, ուսվարձը կազմում է 500 հազար դրամ, կա 13 դիմորդ: 

«Միջազգային հարաբերություններ» ծրագրի դեպքում շատ են ոչ միայն վճարովի տեղերը, այլ նաև դիմորդների թիվը: Նախատեսված է 2 անվճար, 122 վճարովի տեղ, տարեկան ուսվարձը 780 հազար դրամ է, դիմորդների թիվը՝ 254: «Փիլիսոփայություն» ծրագրի դեպքում կա 4 անվճար տեղ, 25 վճարովի, ուսման վճարը 500 հազար դրամ է, դիմորդների թիվը՝ 9: «Լրագրություն» ծրագրի դեպքում ընդունելության տեղերը 65-ն են, իսկ դիմորդների թիվն արդեն իսկ կրկնակի է: 

Նախատեսված է 4 անվճար, 61 վճարովի տեղ, ուսվարձը 500 հազար դրամ է, կա 134 դիմորդ: Հետաքրքիր պատկեր ունենք «Կրոնագիտություն» կրթական ծրագրի դեպքում, երբ նախատեսվել է 3 անվճար, 17 վճարովի տեղ, ուսման վարձը կազմում է 500 հազար դրամ, այս պահի դրությամբ կա երկու դիմորդ: «Աստվածաբանություն» ծրագրի դեպքում պատկերն այլ է դիմորդների քանակով, տեղերը 20-ն են՝ 4 անվճար և 16 վճարովի, արդեն կա 11 դիմորդ, ուսման վարձը 500 հազար դրամ է: 

Հավելենք, որ Երևանի պետական համալսարանում (չենք դիտարկում մարզային մասնաճյուղերը.-խմբ.) ուսման վարձի նվազագույն շեմը 500 հազար դրամ է, առավելագույնը՝ մեկ միլիոն դրամը: Խոսքը «Իրավագիտություն» կրթական ծրագրի մասին է, որի ընդունելության տեղերը 140-ն են՝ 2 անվճար և 138 վճարովի, դիմել է 502 հոգի: 

Հաջորդը դիտարկենք՝ ինչ պատկեր է ճարտարապետության և շինարարության Հայաստանի ազգային համալսարանում (ՀՃՀԱՀ): Ընդհանուր առմամբ համալսարանում 82 անվճար և 1385 վճարովի տեղ կա: «Ճարտարապետություն» կրթական ծրագրի դեպքում նախատեսված է 12 անվճար, 150 վճարովի տեղ, ուսվարձը 660 հազար դրամ է, դիմորդների թիվը 177:

«Դիզայն» կրթական ծրագրի դեպքում, որն իր մեջ ներառում է երեք ծրագիր, նախատեսված է 12 անվճար, 310 վճարովի տեղ, ուսվարձը կազմում է 504 հազար դրամ, դիմորդների թիվը 192:

«Շինարարություն» կրթական ծրագրի դեպքում, որն իր մեջ մի քանի մասնագիտացումներ է ներառում, նախատեսվել է 34 անվճար, 430 վճարովի տեղ, դիմել է 68 հոգի: 

Ուսվարձը բոլոր մասնագիտացումների մասով կազմում է 590 հազար 400 դրամ: «Քաղաքային տնտեսություն» կրթական ծրագրի մասնագիտացումների մասով կա 8 անվճար, 80 վճարովի տեղ, դիմել է ընդամենը 18 դիմորդ, ուսվարձը կազմում է 590 հազար 400 դրամ: 

«Փոխադրումների և ճանապարհային երթևեկության կազմակերպում և կառավարում» ծրագրի դեպքում նախատեսված է 4 վճարովի, 50 անվճար տեղ, ուսվարձը կազմում է 450 հազար դրամ, այս կրթական ծրագրի համար դիմել է 4 անձ:

«Ինֆորմատիկայի» համար նախատեսված է 5 անվճար, 70 վճարովի տեղ, դիմել է 23 անձ, ուսվարձը կազմում է 480 հազար դրամ: «Տեղեկատվական համակարգեր»-ի դեպքում նախատեսված է 5 անվճար, 70 վճարովի, դիմել է 23 դիմորդ, ուսվարձը 504 հազար դրամ է: 

«Տնտեսագիտություն» և «Հաշվապահական հաշվառում և հարկում» ծրագրերի դեպքում ՃՇՀԱՀ-ում անվճար տեղեր չկան, համապատասխանաբար կա 130 և 45 վճարովի տեղ, որոնց համար այս պահին դիմել է ընդհանուր 24 դիմորդ, ուսվարձը կազմում է 522 հազար դրամ: «Զբոսաշրջություն» ծրագրի դեպքում նախատեսված է 2 անվճար, 50 վճարովի տեղ, 35 անձ դիմել է այս տեղերի համար, ուսվարձը 480 հազար դրամ է:

Նշենք նաև, որ ճարտարապետության և շինարարության Հայաստանի ազգային համալսարանում ուսման վարձի նվազագույն շեմը կազմում է 450 հազար դրամ, ամենաբարձրը՝ 660 հազար դրամ:

Հավելենք, որ նյութի հրապարակումից հետո հնարավոր են որոշակի փոփոխություններ ներկայացված հայտերի քանակի հետ կապված:

ԼՈՒՍԻՆԵ ԱՌԱՔԵԼՅԱՆ