Իրական Սանտա Կլաուսի պատմությունը, ով ապրում է Ֆինլանդիայում

Սանտան ապրում է Ֆինլանդիայի հյուսիսում: Ինչպես տեղեկացնում է Past.am-ը, նա նույնիսկ մայրաքաղաք Հելսինկիում գրասենյակ ունի, որն աշխատում է ողջ տարին: Սպիտակ, երկար մորուքով Սանտան հագնում է կարմիր տաբատ և կարմիր վերնազգեստ, ինչպես բոլորի պատկերացումներում: Իսկական անունը Տիմո Ալարիք Փաքենեն է: Արդեն 50 տարի է՝ Սանտան դարձել է նրա էությունը, և նա չի պատրաստվում թողնել իր գործը, քանի որ չի ձանձրանում:

Դպրոցական տարիքում հարևանները խնդրել են խաղալ Սանտա Կլաուսի դերը միջոցառման ժամանակ: Նրան շատ է դուր եկել այդ հագուստի մեջ երեխաներին նվերներ տալը: Նա սկսել է ամեն տարի ավելի ու ավելի շատ ընտանիքներ այցելել: 20 տարի շարունակ դա եղել է նրա մշտական դերը Ծննդյան տոների ժամանակ: Նրանով հետաքրքրվել են որոշ ընկերություններ: Սանտան շրջագայել է աշխարհով մեկ:

2000թ. սկսած՝ ամեն տարի այցելել է Ճապոնիա, իսկ 2011թ. նա այցելել է ցունամիից տուժած մարդկանց և տարել իր հետ երջանկություն, հույս ու մխիթարություն: «Ես ստիպված չեղա որևէ բառ ասել, նրանք իրենք էին ցանկանում խոսել հետս, պատմել իրենց փրկության պատմությունները»,- պատմել է Սանտան հարցազրույցներից մեկի ժամանակ:

Ասիական շատ երկրներում նույնպես շատ երեխաներ ցանկանում են դիպչել Սանտայի մորուքին: Երեխաները ցանկանում են նստել նրա ծնկներին. «Երեխաները նույնն են ամեն տեղ»,- ասել է Փաքենենը: Բազմաթիվ ընկերությունների հովանավորությամբ նա շոկոլադ, հագուստ ու կոշիկներ է տարել երեխաներին: Նրա տրամադրության տակ կա ուղղաթիռ, որն օգտագործվում է անհրաժեշտության դեպքում:

Եթե չի ճամփորդում, ապա աշխատում է Հելսինկիում և երբեմն հայտնվում է հրապարակում: Այնտեղ բազմաթի մարդիկ են մոտենում նրան տարբեր երկրներից: Ինչպես նշել է Փաքենենը, ինքը հանդիպել է 82 երկրի մարդկանց:

Թեև միշտ Սանտան է զարմացրել բոլորին, բայց մի անգամ մի դեպք մեծ զարմանք է պատճառել նրան: Հրապարակում նստած ժամանակ նրա մոտով պաշտոնական հագնված մարդկանց խումբ է անցել: Մի քանի վայրկյան անց նրանցից մեկը հետ է եկել և հարցրել Սանտային՝ կարող է նախարարը նկարվել նրա հետ: Նա Գերմանիայի արտաքին գործերի նախարարն էր, ով ողջունել է Փաքենենին և նկարվել հետը: