Բեկ. «Իրենք վախի մեջ են, հաղթողը մենք ենք»

Past.am

Ամեն անգամ աղվեսի պատմությունն է գալիս մտքիս, որի դունչը չի հասնում խաղողին, բայց ասում է՝ դեռխակէ: «Արծիվ-մահապարտներ» հատուկ գումարտակի զինյալ, «Աննկուն ծռեր» ջոկատի հրամանատար Աղաբեկ Խաչատրյանին` Բեկին, վերջին օրերի ադրբեջանական սադրանքները, լարվածության սրումն ու խաղաղ բնակչությանը թիրախավորելու փորձերը այսօր էլ են աղվեսի հայտնի պատմությունը հիշեցրել:

«Թուրքը նույն սրիկա թուրքն է: Իրենք պարտված են, և այնքան ոխ կա իրենց մեջ, որ այդ պարտությունը չեն կարողանում իրենց ուղեղի մեջ տեղավորել: Այստեղ, այնտեղ այլ պետությունների օժանդակությամբ ու միջոցով փորձում են խոսել, ասել, թե «Հայաստանը մերն է…»: Այս ամենի հիմքում վախն է… Իսկ մենք... Գարուշը, Սոսը Սմբատը, Գրիշան ու մյուսները հերոս տղերք են: Խրամատի զինվորից մինչև գեներալ, բոլորը հերոս են: Մեր զինված ուժերն այս օրերին հերթական անգամ ապացուցեցին, որ լեռների պատերազմում Հայաստանի վրա ոչ ոք չի կարող: Մենք սարերի ժողովուրդ ենք, դարերով վարժված ենք լեռնային կռվում: Փառք Աստծո, այս անգամ այնպիսի հարված ստացան, որ ոչ միայն Ադրբեջանը, այլև ամբողջ աշխարհն է ապշել: Մենք անընդհատ փորձում ենք քաղաքականության մեջ զսպված լինել, անընդհատ ասում՝ պատերազմ չուզենք, խաղաղություն կոչենք: Բայց հերիք է: Մի քիչ էլ բզբզան, մինչև Բաքու կհասնենք»,-«Փաստի» հետ զրույցում ասաց Աղաբեկ Խաչատրյանը:

Շեշտեց՝ մինչ այս էլ էին լսել, նաև տեսել, որ շատ ուժեղ զենքեր ունի թշնամին:

«Քառօրյա պատերազմի ժամանակ էլ հենց մարտադաշտում տեսանք, որ մեզ համար անծանոթ, անսովոր զենքեր են օգտագործում, բայց, միևնույն է, այդքանով հանդերձ տեսնում ենք, թե ինչպիսի պատասխան են ստանում: Այդ պատասխանը տեսել ենք թե՛ մինչև Քառօրյա պատերազմը, թե՛ հենց այդ ժամանակ և թե՛ այս օրերին: Ամեն ինչ ունեն, բայց չեն կարողանում օգտագործել, ինչը փաստեցին նաև վերջին օրերի գործողությունները: Ինչքան ուզում են, թող շատ զենք ունենան, մեզ համար դա նշանակություն չունի: Մինչ այս էլ ենք տեսել իրենց կռիվը, վախից փախչում էին, իսկ մենք հաղթած պետություն ենք: Իրենք վախի մեջ են, հաղթողը մենք ենք: Իրենք իրենց երեխաներին վախեցնում են, ասում՝ շուտ տուն եկեք, քանի հայերը չեն եկել, իսկ մեզ մոտ 4, 6, 10 տարեկան տղաները անվադող են հավաքում սահման ուղարկելու համար: Իրենք վախի մեջ են, իսկ մեզ մոտ կամավորներն ու բանակի կողքին կանգնողներն այնքան շատ են, որ մեր ՊՆ-ն ստիպված է հայտարարել, որ կամավորների անհրաժեշտություն այս պահին չկա: Մենք պատերազմ չենք ուզում, բայց եթե Ադրբեջանը մեզ պատերազմ է հայտարարում, ինչպես նախկինում, հիմա ևս պատրաստ ենք կռվել: Ես մեր ամբողջ ժողովրդին ուզում եմ կոչ անել, որ այսօրվա մեր զինվորին, բանակի գործողություններին չխառնվեն: Մենք շատ ուժեղ, հզոր բանակ ունենք, և կարևոր է, որ բանակը զերծ պահենք քաղաքականության դաշտից: Այսօր ամեն վայրկյան սպայի պատիվը պետք է բարձր պահենք: Չի կարելի սպայի անունը քաղաքական դաշտում շոշափել»,-ասաց մեր զրուցակիցը՝ կարևորելով նաև թիկունքի ոգին:

«Մեր ժողովուրդն ուժեղ կամքի տեր է: Սկսած զինվորի համար տատիկի գործած գուլպայով, վերջացրած այն դպրոցական երեխայով, որն իր թխվածքաբլիթը կից նամակով ուղարկում զինվորին: Մեր ժողովուրդը ուժեղ է, եթե ժողովրդի մեջ ցեց գցող չլինի, ամեն ինչ լավ կլինի: Մեր ազգը Ցեղասպանություն, գաղթ ու շատ զոհեր է տեսել, բայց մեզ, մեր ոգին ոչնչացնել հնարավոր չէ, որքան էլ որոշ շրջանակներ այդ հարցում շահագրգռված լինեն: Ես հիմա կանգնած եմ մի սարի գլխին, ուր քարեր եմ շարել ու դրանց վրա գրել մեր զոհված տղաների անունները: Ես հիմա հինգ հազար զոհված տղաների անունից եմ խոսում: Մարդիկ զոհվեցին, բայց Հայաստանում «հանուն ինչի՞» հարցադրում եղավ: Հիմա եթե Սոսը, Գարուշը Սմբատն ու Գրիշան չլինեին, եթե վիրավորներ չունենայինք ու մյուսները չլինեին, նույն սատանա թուրքը մտնելու էր Չինարի, կողքի գյուղերն ու իր վնասը տար: Ուր ես կանգնած եմ, նաև Հայաստանի ու Արցախի դրոշներն են, ես չորս հերոս տղաների անուններն էլ եմ ավելացրել մյուսների անուններին ու հպարտանում եմ»,-հավելեց մեր զրուցակիցը:

Բեկը մի խորհուրդ ունի «թշնամուն խղճացողների» համար:

«Ով խղճում, մարդասիրական մոտռցում է ցույց տալիս, թող գնա Արաքսից այն կողմ իր համար տուն փնտրի: Թո՛ղ գնան և ինչքան ուզում են, խղճան: Ավելի քան 100 տարի առաջ որոշներն այդպես խղճացին իրենց թշնամիներին, իսկ թշնամին դրեց ու բոլորին կոտորեց: Հենց հիմա Թուրքիայում կրոնափոխ մարդիկ կան, որ մրմուռն աչքներին է՝ իրենք հայ են, բայց թուրքի անուն-ազգանունն են կրում: Այ, սա այն թուլության նշանն է, որի հիմքում ինչ-որ ժամանակ թուրքին խղճալն է եղել: Ի՞նչ մարդասիրության, ի՞նչ խղճալու մասին է խոսքը: Դրանց խղճալ պետք չի, իրենց բոլորի մեջ ոխ կա: Ոչինչ չի փոխվել: Չի լինի, չեն կարող ու չի հաջողվի: Հիմա մրջյունը ոտքիս տակ է, չեմ տրորի, բայց թուրքի գլուխը կջարդեմ: Իսկ այսօրվա մեր սերունդը՝ դուք, մենք, չծնված երեխաները, բոլորս մեր հերթին զինվոր պետք է լինենք: Մենք բոլոր ազատամարտիկներով պատրաստ ենք մեր երկիրը պաշտպանելու, ավելի դաժան հարված տալու: Ադրբեջանը պետք է հասկանա, որ հայ մանուկից մինչև ծեր չենք պարտվելու ու երբեք պարտության հետ չենք հաշտվելու: Մենք հաղթել ենք ու միայն հաղթելու ենք»,-եզրափակեց Ա. Խաչատրյանը:

Աննա Բադալյան