Անձնագիր չի տրամադրվի այն անձանց, որոնք հետախուզվում են հարկադիր կատարողի համապատասխան որոշման հիման վրա

Past.am

Ոստիկանությունը հանրային քննարկման է ներկայացրել է նախագիծ, որով առաջարկվում է լրացումներ կատարել «Պետական սահմանի մասին» օրենքում և հարակից օրենքներում: Նշվում է, որ նախագծերի ընդունումը պայմանավորված է օրենքով ՀՀ քաղաքացիների երկիր մուտքի և ելքի հետ կապված հարաբերությունները կանոնակարգելու անհրաժեշտությամբ: Օրինագծի հետ փաթեթով ներկայացված մյուս նախագծերի մշակումն իր հերթին պայմանավորված է կառավարության 2015 թ.-ի սեպտեմբերի 25-ի թիվ 1141-Ն որոշման 4-րդ հավելվածով հաստատված ոստիկանության կողմից քաղաքացիներին ծառայությունների մատուցման ոլորտում հայտնաբերված կոռուպցիոն ռիսկերի և դրանց չեզոքացմանը և նվազեցմանն ուղղված միջոցառումների ծրագրի 20-րդ կետով: Դրա համաձայն հստակ օրենսդրական կարգավորումներ պետք է նախատեսվեն հետախուզվող պարտապանների՝ Հայաստանից ելքի սահմանափակման համար: Ներկայումս ՀՀ քաղաքացիների երկիր մուտք գործելու և ելքի հետ կապված հարաբերությունները, մասնավորապես՝ անչափահասների մասով, հստակ և ամբողջական օրենսդրական կարգավորում չունեն: Բացի դա, պարտապանների հետախուզման գործառույթների իրականացման գործընթացում ոստիկանության մասնակցությունը նույնպես հստակ կանոնակարգված չէ, ամրագրված չեն նաև հետախուզվող պարտապանների ՀՀ-ից ելքի հետ կապված հարցերը: Ներկայացված օրինագծերի փաթեթով առաջարկվում է լրացնել նշված օրենսդրական բացը:

«Պետական սահմանի մասին» օրենքում լրացումներ կատարելու մասին» օրինագծով հստակ սահմանվում են ՀՀ քաղաքացիների Հայաստանի Հանրապետություն մուտք գործելու և Հայաստանի Հանրապետությունից ելքի հետ կապված հարաբերությունները, ելքի ժամանակավոր սահմանափակումների կիրառման դեպքերը, 16 տարին չլրացած կամ դատական կարգով անգործունակ ճանաչված քաղաքացիների ՀՀ-ից ելքի հետ կապված առանձնահատկությունները: «Ոստիկանության մասին» օրենքում լրացում կատարելու մասին» օրինագծով հանցագործություններ հայտնաբերելիս և բացահայտելիս ոստիկանությունն իրավունք կունենա ժամանակավորապես սահմանափակել մեր երկրից ՀՀ քաղաքացու ելքի իրավունքը, եթե նա կասկածվում է հանցանք կատարելու մեջ կամ նրան հետապնդում (որոնում) է ոստիկանությունը:

«ՀՀ քաղաքացու անձնագրի մասին» օրենքում կավելանա անձնագիրը տրամադրելը (փոխանակելը) մերժելու նոր հիմք, մասնավորապես՝ անձնագիր չի տրամադրվի (փոխանակվի) այն անձանց, ովքեր հետախուզվում են հարկադիր կատարողի համապատասխան որոշման հիման վրա: Միաժամանակ, «Նույնականացման քարտերի մասին» օրենքում կատարվող լրացման արդյունքում՝ նույնականացման քարտ նույնպես չի տրամադրվի անձին՝ հարկադիր կատարողի համապատասխան որոշման հիման վրա հետախուզման մեջ գտնվելու դեպքում:

Լուսինե Առաքելյան