41 բնակելի տարածք կտրվի բնակիչներին որպես նվիրատվություն. «Փաստ»

Պետական գույքի կառավարման կոմիտեն հանրային քննարկման է ներկայացրել նախագիծ, որով կկազմակերպվի բնակելի տարածքների նվիրատվության գործընթաց: Տարածքային կառավարման և ենթակառուցվածքների նախարարության պետական գույքի կառավարման կոմիտեի՝ դեռևս 2018թ.-ի առաջին եռամսյակում նախապատրաստված նախագծով՝ նվիրատվության ենթակա բնակելի տարածքների ցանկն ի սկզբանե բաղկացած էր 214 բնակելի տարածքներից: 

Նվիրատվությամբ տրամադրվող բնակելի տարածքների ցանկում ընդգրկվեցին 106 բնակելի տարածքներ, 8 բնակելի տարածքների բնակիչներին մերժում ուղարկվեց, իսկ 100 բնակելի տարածքների նվիրատվության գործընթացին ժամանակավորապես ընթացք չտրվեց` հաշվի առնելով, որ կադաստրի կոմիտեն չէր կարողացել իրականացնել բնակելի տարածքների բնակիչների նույնականացման աշխատանքները:

100 բնակելի տարածքների բնակիչների նույնականացման գործընթացի համար վարչապետի՝ 2019 թ. հանձնարարականով ստեղծվել է աշխատանքային խումբ, համապատասխան աշխատանքների կատարման արդյունքում 56 բնակելի տարածքների բնակիչների նույնականացման աշխատանքներն իրականացվեցին և 57 բնակելի տարածքների բնակիչների վերաբերյալ կառավարությունը 2020թ.-ին ընդունեց N 544-Ն որոշումը: 

Մնացած բնակելի տարածքների բնակիչների նույնականացման համար վարչապետի մեկ այլ հանձնարարականով հանձնարարվեց համապատասխան պետական մարմիններին աջակցել բնակիչների նույնականացման աշխատանքներին, որի արդյունքում հնարավոր եղավ նույնականացնել ևս 41 բնակելի տարածքների բնակիչների:

Նախագծում ընդգրկվել են կոմիտեի տնօրինության տակ գտնվող Երևանի Մոլդովական փող. 29/1 հասցեի, Սյունիքի մարզի Գորիս քաղաքի Կոմերիտմիության 2/1 հասցեի, Վայոց ձորի մարզի Աղավնաձոր գյուղի 3-րդ փող. 33/1 և Քարագլուխ գյուղի, 6-րդ փող. հասցեների, Արարատի մարզի Արարատ քաղաքի Աբովյան 12 և Դարբնիկի համայնքի հասցեների, Արագածոտնի մարզի Աշտարակ քաղաքի Գիտավան ՖՀԻ-ի 7-րդ շենքի հանրակացարանների բնակիչները: Նախագծում ընդգրկվել են նաև ԿԳՄՍ նախարարության տնօրինությանը հանձնված Լոռու մարզի Ստեփանավան քաղաքի Երիտասարդական 51/3 թիվ 7 բնակելի տարածքը, արտակարգ իրավիճակների նախարարության տնօրինությանը հանձնված Երևանի Արցախի 61/3, Սևանի 124, Դավիթաշեն 4-րդ թաղամասի Հասրաթյան 9 հասցեների հանրակացարանային մասնաշենքերի և Կոտայքի մարզի Աբովյան քաղաքի Հատիսի 4 հասցեի բնակելի տարածքները, Արմավիրի մարզպետարանի ենթակայության Մ.Խորենացի 101/1 հասցեի բնակելի տարածքները և Արագածոտնի մարզպետարանի տնօրինության տակ գտնվող Աշնակ, Հնաբերդ և Նիգավան համայնքների ուսուցչի տների բնակելի տարածքները:

ԼՈՒՍԻՆԵ ԱՌԱՔԵԼՅԱՆ