Ալեքսանդր Լուկաշենկոն երկիրը ղեկավարելու ոչ մի օրինական հիմք չունի․Սլովակիայի արտգործնախարար

МЕЖДУНАРОДНОЕ 23 Сентябрь, 2020 18:38

Սլովակիայի արտգործնախարար Իվան Կորչոկը մեկնաբանել է Բելառուսի նախագահ Ալեքսանդր Լուկաշենկոյի` սեպտեմբերի 23-ին տեղի ունեցած երդմնակալության արարողությունը` հայտարարելով, որ չի ընդունում բելառուս ղեկավարի օրինականությունը: Այս մասին գրում է radiosputnik.ria.ru կայքը:

«Ալեքսանդր Լուկաշենկոն, որի երդմնակալությունը տեղի է ունեցել այսօր, իր երկիրը ղեկավարելու ոչ մի օրինական հիմք չունի: Նա պատասխանատու է Բելառուսում կայացած նախագահական ընտրությունների համար, որոնք ոչ ազատ էին, ոչ արդար: Սլովակիան աջակցում է Բելառուսի քաղաքացիներին»,-հայտարարել է Սլովակիայի արտգործնախարարը:

Լուկաշենկոյի երդմնակալությունն օրինական չի ճանաչել նաև Լիտվայի նախագահ Գիտանաս Նաուսեդան:

«Նախագահական ընտրությունները Բելառուսում ոչ ազատ էին, ոչ արդար: Ընտրությունների արդյունքն անօրինական է: Ոչ մի արարողություն ՝ շքեղ կամ գաղտնի, չի փոխի այս անվիճելի փաստը և չի ստեղծի օրինականության պատրանք: Ես կոչ եմ անում կազմակերպել նոր ընտրություններ՝ հիմնված քաղաքացիական հասարակության և ԵԱՀԿ դիտորդների հետ երկխոսության վրա»,-հայտարարել է Լիտվայի նախագահը:

Հիշեցնենք, որ Ալեքսանդր Լուկաշենկոն այսօր ստանձնել է Բելառուսի նախագահի պաշտոնը: Սահմանադրության վրա աջ ձեռքը դնելով՝ Լուկաշենկոն բելառուսերեն երդում է տվել, որից հետո ԿԸՀ-ի ղեկավար Լիդիա Երմոշինան նրան հանձնել է համապատասխան փաստաթուղթը:

Արարողությունը տեղի է ունեցել Անկախության պալատում։ Միջոցառմանը ներկա է եղել մի քանի հարյուր մարդ՝ պաշտոնյաներ, խորհրդարանականներ, լրատվամիջոցների ղեկավարներ, մշակույթի և սպորտի գործիչներ և այլք։

Բելառուսի ընդդիմությունը Լուկաշենկոյի երդմնակալությունից հետո մտադիր է բողոքի անժամկետ ակցիա անցկացնել, ինչի մասին հայտնել է բելառուսական ընդդիմության համակարգող խորհրդի նախագահության անդամ Պավել Լատուշկոն:

«Մենք երբեք չենք համաձայնի ընտրակեղծիքների հետ և պահանջում ենք նոր ընտրություններ։ Կոչ ենք անում բոլորին սկսել անհնազանդության անժամկետ ակցիա»,-Telegram-ում գրել է Լատուշկոն:

Ավելի վաղ Պավել Լատուշկոն նախագահ Ալեքսանդր Լուկաշենկոյի երդմնակալության արարողությունը «հանցագործ աշխարհի ժողով» էր անվանել։

Բելառուսում նախագահական ընտրությունները կայացել են օգոստոսի 9-ին․ Լուկաշենկոն հավաքել է ձայների 80,1 տոկոսը։ Ընդդիմությունն ու Եվրամիությունը չեն ընդունել քվեարկության արդյունքները։

Երկրում բողոքի ակցիաները չեն դադարում օգոստոսի 10-ից ի վեր: Երկրի քաղաքացիներն իրենց դժգոհությունն են հայտնում օգոստոսի 9-ին կայացած նախագահական ընտրությունների արդյունքներից, որոնց համաձայն հաղթող է ճանաչվել Լուկաշենկոն: Ցույցերի առաջին օրերին հազարավոր մարդիկ էին ձերբակալվել, հարյուրավորները՝ վիրավորվել: