«Մենք մեր հողն ենք պահում, մենք հաղթելու ենք». Հուսիկ Արա

Past.am

Պատմության մեջ դեռ չի եղել մի դեպք, որ հայը, զենքը ձեռքին կանգնի ու պարտվի: Ասում է բանաստեղծ Հուսիկ Արան:

«Թուրքը միշտ անզեն կին ու երեխա է կոտորել: Այսօր էլ հայը զենքը ձեռքին կանգնել է ու չի պարտվելու: Այսօր մենք նորից ազգ-բանակ ենք: Մեծ տղաս, որը քառօրյա պատերազմի մասնակից է, հենց առաջին օրը գնացել է զինկոմիսարիատ, կամավոր է գրվել և երրորդ օրն է տուն չի գալիս, սպասում է, որ գնա: Ես եմ ուղիներ փնտրում թե՛ որպես լրագրող, թե՛ որպես անհատ Արցախ գնալու: Եթե հարկ լինի, մեզանից ցանկացած մեկն անիվներ կդնի իր տան տակ և կքշի սահման: Պատմությունից դասեր ենք առել, նման պահերին ամեն ինչ մոռանում ենք, ամեն ինչ անում հայրենիքի համար: Այսօր էլ համախմբված ենք, քան երբևէ և ամեն անգամ ավելի կուռ ենք համախմբվում: Մեր ոգին շատ բարձր է, մեր բանակը տարածաշրջանում ամենահզորն է, և այսօր տեսնում ենք դա: Մեր բանակի ոգին բարձր է, այն մարտունակ է: Պահում ենք մեր հողը, մեր տունը: Այն զինվորը, որ իր տունն է պահում, իր ընտանիքը, նրա ոգին միշտ բարձր է: Նա կռվում և հաղթում է, զոհվում հանուն  ազատության: Ադրբեջանի կողմից վարձկաններ են կռվում, որոնք իրենց հողը չեն պահում: Նա, ով իր հողը չի պահում, պարտվող է: Մենք կռվում ենք մարդկային ուժի և զինտեխնիկայի դեմ: Մեն-մենակ ենք կռվում, ոչ ոք չի աջակցում մեզ: Աշխարհը նայում է և կոչեր անում: Մենք մենակ ենք, և մենակները հաղթում են, ու հաղթելու ենք: Միակ ցավը մեր 19-20 տարեկան տղաների զոհվելն է, սրտիցս արյուն է գնում, ամեն մեկի հետ ես զոհվում եմ: Ամուր լինենք, կուռ լինենք, հաղթանակը, ցավոք, հեշտ չի տրվում, զոհերի գնով, բայց սա վերջնական լուծելու է այդ հարցը: Ամենակարևորը՝ բանակի թիկունքն ամուր է, մենք նրա կողքին ենք: Մենք մեր հողն ենք պահում, մենք հաղթելու ենք»,-Past.am-ի հետ զրույցում ասաց Հուսիկ Արան:

Լուսինե Առաքելյան