«Մեր հույսը մեր զինվորն է, թող նրանց ուժը բազմապատկվի». Աշոտ Ղազարյան

Past.am

Պատերազմն Արցախում շարունակվում է: Այս պատերազմում հակառակորդը հարվածում է ոչ միայն հայկական զինված ուժերին, այլ նաև քաղաքացիական խաղաղ բնակչությանը: Կան զոհեր:

Այս օրերին բոլորիս մեջ իրար են խառնվել հպարտության և ցավի զգացումները, հպարտության, որ հայկական զինված ուժերը և ժողովուրդը ցույց են տալիս իրենց միասնությունը, բայց անասելի ցավ նահատակված յուրաքանչյուր զինվորի և քաղաքացու համար:

 Դերասան, ՀՀ ժողովրդական արտիստ Աշոտ Ղազարյանը նշում է՝ այս պահին կարևոր չէ, թե մեզանից յուրաքանչյուրն ինչ մասնագիտություն ունի: «Այս պահին կարևոր չէ՝ ճանաչված ես, արվեստագետ ես, թե այլ մասնագիտություն ունես: Հայ ես, որ սիրում ես քո ժողովրդին, քո երկիրը: Երբ ամեն զինվորի մատը փուշ է մտնում, արդեն մեծ ցավ է, պատկերացրեք, երբ կորցնում ենք այդ զինվորին: Դաժան է: Հիմա գնում եմ հիվանդանոց՝ վիրավոր զինվորներին հանդիպելու, ուզում եմ մի փոքր բարձրացնել նրանց տրամադրությունը: Մասնակցում էինք նաև հագուստի և այլ իրերի հավաքման գործին: Փորձում ենք օգտակար լինել ինչով կարող ենք»,-Past.am-ի հետ զրույցում ասաց դերասանը:

Հետո հավելեց. «Ի՞նչ կարելի է ցանկանալ մեր զինվորին: Ամենակարևորն՝ անփորձանք լինեն, իրենց ուժն էլ ավելի ավելանա, որ պաշտպանեն մեր հողն ու ջուրը, մեր հույսը մեր զինվորի վրա է: Մեր տաղանդներից մեկն այն է, որ նեղն ընկած ժամանակ էլ չեն հարցնում՝ ով, ինչ, ոնց: Կանգնում ենք իրար կողքի ու գիտենք, որ մեկ նպատակ ունենք՝ հայ ազգ ու հայկական սահման»,-նշեց Աշոտ Ղազարյանը:

Լուսինե Առաքելյան