Ապա­վի­նել ինք­նա­գի­տակ­ցու­թյա­նը՝ Covid-ով չզբա­ղեց­նե­լու այն տե­ղը, որը կա­րող է անհրաժեշտ լինել վի­րա­վոր զին­վո­րին․«Փաստ»

«Փաստ» օրաթերթը գրում է

Հայաստանում կորոնավիրուսով վարակման թվերն սկսել են աճել: Միայն երեկվա դրությամբ հաստատվել է Covid-19 ով վարակման 1371 նոր դեպք, ինչը ռեկորդային ցուցանիշ է: ԵՊԲՀ համաճարակաբանության ամբիոնի դոցենտ Մերի Տեր-Ստեփանյանը «Փաստի» հետ զրույցում անդրադարձել է վարակման հայաստանյան թվերին՝ այդ համատեքստում դիտարկելով նաև այն պատերազմական իրավիճակը, որում գտնվում ենք: Նա մի քանի հանգամանք է առանձնացրել ու կիսվել այս փուլի համար կարևոր խորհուրդներով:

«Վարակի դեմ պայքարի միջոցառումների մասին բոլորն արդեն գիտեն, և, ցավոք, դրանց ավելացնելու որևէ այլ սպեցիֆիկ միջոց չկա: Մենք չենք կարող ասել, օրինակ՝ հակավիրուսային միջոց կամ պատվաստանյութն արդեն կա, բոլորդ եկեք պատվաստվելու: Մնացել ենք երեք միջոցառման վրա՝ ձեռքերի հիգիենա, դիմակներ, սոցիալական հեռավորության պահպանում: Իհարկե, որպես քաղաքացի, ինքս էլ եմ հասկանում, որ այս սթրեսային իրավիճակում ժողովրդի համար այդ խորհուրդները նույնիսկ երբեմն հակառակ ռեակցիա են առաջացնում, բայց գոյություն ունի հետևյալ օրենքը. պատերազմական իրավիճակները, ինչպես նաև արտակարգ իրավիճակները միշտ նպաստում են վարակիչ հիվանդությունների աճին: Այս փուլում պանդեմիայի մոլեգնող շրջանում ենք:

Խոսքն աշխարհի բոլոր երկրների մասին է: Եվրոպան էլ է արդեն երկրորդ ալիքի մեջ: Եվ աշխարհում առկա թվերը ցույց են տալիս, որ, ի տարբերություն առաջին ալիքի, երկրորդ ալիքն ավելի ինտենսիվ է ընթանում: Ես երեկ տեսա, որ լուրջ խնդիր կա, օրինակ՝ Անգլիայում, Իսպանիան ևս կրկին խնդրի առաջ է կանգնում: Այսինքն, աշխարհում է խնդիրը, իսկ պատերազմը մի քանի անգամ մեծացնում է վարակի տարածման հավանականությունը»,-ասաց Մերի Տեր-Ստեփանյանը՝ փաստելով, որ արդեն համավարակի երկրորդ ալիքն է գլուխ բարձրացրել:

«Եթե նայենք կորագծին, կտեսնենք, որ մենք օգոստոսի վերջից արդեն անկում ունեինք: Սեպտեմբերին կորագիծը լավ իջել էր: Հիմա արդեն դեպքերի կտրուկ ավելացում ունենք, որն արտահայտվում է կորի բարձրացմամբ: Աճում է նաև մահացությունը: Մենք այսօր պետք է ապավինենք մեր ինքնագիտակցությանը, որպեսզի այն տեղը, որը կարող է հիվանդանոցում զբաղեցնել վիրավոր զինվորը, չզբաղեցնի թոքաբորբով, Covid-ով տառապող հիվանդը»,-ընդգծեց մեր զրուցակիցը: Նա բնակչությանը կոչ արեց այս փուլում հնարավորինս պատվաստվել գրիպի դեմ, որովհետև, ըստ մասնագետի, գրիպով հիվանդացության բարձրացման հավանականություն ևս կա:

«Գրիպի վակցինան արդեն հասանելի է: Պայքարենք գոնե նրա դեմ, ինչը կարող ենք կանխել: Որքան հնարավոր է՝ շուտ պետք է պատվաստվեն հատկապես ռիսկի խմբերում գտնվող քաղաքացիները, որովհետև պատշաճ իմունիտետի մակարդակ միայն չորս շաբաթ հետո է լինում: Այսինքն, սեզոնին արդեն պատրաստ կլինեն գրիպի դեմ պայքարելուն: Գոնե այն, ինչը հնարավոր է նվազեցնել, պետք է դա փորձենք անել»,- ընդգծեց համաճարակաբանը:

Ինչ վերաբերում է կորոնավիրուսի տարածումը կանխելու համար ավելի կոշտ մեթոդների հնարավորությանն ու անհրաժեշտությանը պետական մակարդակով, նա նշեց. «Դա կախված է թե՛ երկրի այսօրվա ռազմական դրությունից, թե՛ տնտեսական իրավիճակից: Եվ, ճիշտն ասած, չգիտեմ, թե այս փուլում, օրինակ՝ որքանով է նպատակահարմար խոսել «լոքդաունի» մասին: Իսկ դպրոցները փակելն ու երեխաներին երկու շաբաթով արձակուրդ ուղարկելը միանշանակ դրական էր: Եվ իմ խորհուրդն այն է, որ շատ մեծ ուշադրություն դարձվի հատկապես տրանսպորտին, որովհետև տրանսպորտում օդափոխությունը գնալով վատանում է, սկսում են արդեն պատուհանները փակ երթևեկել, տրանսպորտում հաճախ նաև դիմակներ չեն կրում:

Այս ուղղությանը շատ մեծ ուշադրություն պետք է դարձնել, որովհետև ամենասերտ շփումը մենք այդտեղ ենք ունենում: Որքան կողքից նայում եմ՝ այդ հատվածում լուրջ խնդիր կա»: Վերջում անդրադառնալով հիմնական կանոնների պահպանմանը՝ մեր զրուցակիցն ընդգծեց թե՛ դիմակների, թե՛ ձեռքերի հիգիենայի և թե՛ սոցիալական հեռավորությունը պահպանելու կարևորության մասին: «Չեմ կարող ասել, թե սրանցից որն է ավելի առաջնային, բայց երեքն էլ միասին անհրաժեշտ է պահպանել: Դիմակ պետք է կրել հատկապես փակ, առավել ևս չօդափոխվող տարածքներում: Այսօր Եվրոպայում «6-ի կանոն» մոտեցումն է գործում: Այսինքն, վեց հոգուց ավելի չեն թույլատրում հավաքվել փակ տարածքներում: Որքան հնարավոր է, պետք է խուսափել փակ տարածքներում մեծ կուտակումներից:

Սա նվազեցնելու է թե՛ մնացած օդակաթիլային վարակիչ հիվանդությունների, թե՛ Covid-ի տարածման հավանականությունը: Մեզ մոտ արձանագրված թիվը վկայում է այն մասին, որ մենք անտեսել ենք այդ կանոնները: Սա, միգուցե, բնական է այն իրավիճակում, որում մենք ենք այսօր, և մոռանում ենք նաև այդ կանոնների մասին, բայց փորձը ցույց է տալիս, որ չի կարելի մոռանալ, քանի որ այսպես շարունակելու դեպքում առողջապահական համակարգի համար մենք լուրջ բեռ կունենանք»,-եզրափակեց Մերի Տեր-Ստեփանյանը:

Մանրամասները՝ «Փաստ» օրաթերթի այսօրվա համարում