Գյում­րե­ցի երե­խա­նե­րը վա­ճա­ռում են իրենց նկար­նե­րը, գու­մարն ուղղ­վում է Հա­մա­հայ­կա­կան հիմ­նադ­րա­մին․«Փաստ»

«Փաստ» օրաթերթը գրում է

Պատերազմական օրերին Հայաստանի բոլոր մարզերում և մայրաքաղաք Երևանում կյանքի կոչվեցին բազմապիսի նախաձեռնություններ։ Հիմնական նպատակը զինված ուժերին և դժվար կացության մեջ հայտնված ընտանիքներին աջակցություն ցուցաբերելն է։ Իհարկե, այս բոլոր նախաձեռնությունների մեջ յուրահատուկ տեղ են զբաղեցնում երեխաների մասնակցությամբ և նրանց նախաձեռնությամբ կյանքի կոչվածները: Նրանք ինքնակամ, պահի լրջությունը գիտակցելով՝ ցանկանում են այս դժվար օրերին օգնության ձեռք մեկնել երկրին: Գաղտնիք չէ, որ մեզ պարտադրված պատերազմը հերթական անգամ փոխեց բոլորի կյանքի ուղին, ծրագրերը, անգամ ցանկությունները։

Հոկտեմբերի կեսերին «Շիրակ կենտրոնի» նախաձեռնությամբ հայ-թուրքական սահմանին գտնվող Բագրավան գյուղում պետք է կայանար գեղանկարիչ Սամվել Գալստյանի՝ Գյումրու տնակային ավաններից մեկում գործող նկարչական ստուդիայի սաների՝ «Գյումրեցի պատանի տաղանդները` Շիրակի սահմանային գյուղում» խորագրով ցուցադրությունը։ Ինչպես տեղեկանում ենք կենտրոնի տարածած հաղորդագրությունից, ներկայացվելու էին ստուդիայի սաներ Հոբի, Աննայի, Աշիկի, Քրիստինեի, Փաշիկի, Սվետլանայի, Լևոնի և նրանց վարպետի՝ Սամվել Գալստյանի մոտ 60 աշխատանքները։

Բայց սեպտեմբերի 27-ին սկսվեց պատերազմը, որը մի կողմ թողեց բոլորիս ծրագրերը։ Գյումրեցի երեխաները և նրանց վարպետը որոշել են ցուցադրության համար նախատեսված նկարները վաճառել և ամբողջ գումարը փոխանցել «Հայաստան» համահայկական հիմնադրամին։ «Շիրակ կենտրոն» ՀԿ-ի նախագահ Վահան Թումասյանը նշում է՝ նախքան պատերազմը որոշել էին ցուցադրություն կազմակերպել Շիրակի մարզի սահմանային գյուղում։ «Նախատեսված ցուցադրությանը ներկայացվելու էին ինչպես Սամվել Գալստյանի սաների, այնպես էլ հարակից գյուղերում բնակվող տաղանդաշատ երեխաների աշխատանքները։

Մի քանի մանկավարժներ խնդրել էին, որ իրենց աշակերտների նկարները ևս ներկայացնեինք այդ ցուցադրությանը։ Բավականին հյուրեր էինք ունենալու, հետաքրքիր միջոցառում էինք կազմակերպել։ Տեղը պատրաստել էինք, որոշակի ծախսեր կատարել, բայց պատերազմը խառնեց բոլոր ծրագրերը։ Երեխաները որոշեցին այդ ցուցադրության համար նախատեսված նկարները վաճառել էլեկտրոնային տարբերակով և ստացված գումարը փոխանցել Համահայկական հիմնադրամին։ Ընդհանուր առմամբ՝ ներկայացրել էինք 15 նկար, մեծամասնությունը վաճառվել է։ Կարգը հետևյալն է՝ սահմանված գինը փոխանցում են հիմնադրամին, կտրոնն ուղարկում մեզ և գալիս ու նկարը վերցնում «Շիրակ» կենտրոնից, ընդ որում շատերը սահմանված արժեքից ավելի են վճարում։ Արդեն իսկ չորս հարյուր հազար դրամից ավելի գումար ենք փոխանցել։

Չեմ ուզում երեխաներին շատ ծանրաբեռնել, բայց, հնարավոր է, որ այս նախաձեռնությունը շարունակական լինի»,-«Փաստի» հետ զրույցում ասում է Թումասյանը։ Նշում է՝ կարևոր է ընդգծել, որ երեխաներն իրենք են շահագրգռված եղել սեփական աշխատանքների վաճառքի հարցում: «Այս ընթացքում անընդհատ Շիրակի մարզի սահմանամերձ գյուղերում եմ: Երեխաներն անդադար զանգահարում էին, գրում, որ անպայման նկարների վաճառք կազմակերպենք, որպեսզի իրենք էլ այդ ձևով մասնակցություն ունենան երկրի համար կարևոր գործին։ Նկարների ցուցադրություն-վաճառքը ոչ թե մեր, այլ երեխաների նախաձեռնությունն է, ես տուրք տվեցի նրանց՝ հայրենիքի համար ինչ-որ բան անելու ցանկությանը։ Հիմա էլ ում նկարներն արդեն վաճառվել են, գրում ու զանգում, միակ հարցն է՝ էլի նկար բերե՞նք»,-եզրափակում է Վահան Թումասյանը։

Լուսինե Առաքելյան

Մանրամասները՝ «Փաստ» օրաթերթի այսօրվա համարում