ՀՀ պետբյուջե մուտքագրված հարկային եկամուտները և պետական տուրքերն աճել են 0.3 տոկոսով

Այս տարվա հունվար-հոկտեմբերին ՀՀ պետական բյուջեի շուրջ  940.9 մլրդ դրամ կազմած եկամուտների 93.6 տոկոսը ձևավորվել է հարկային եկամուտների և պետական տուրքերի, 5.9 տոկոսը` այլ եկամուտների, 0.5 տոկոսը` պաշտոնական դրամաշնորհների հաշվին:

2015 թվականի հունվար-հոկտեմբերին ՀՀ պետական բյուջե են մուտքագրվել 880.7 մլրդ դրամ հարկային եկամուտներ և պետական տուրքեր, որոնք կազմել են տարեկան ծրագրի 76.3 տոկոսը: Դրանք նախորդ տարվա նույն ժամանակահատվածի համեմատ դրանք աճել են 0.3 տոկոսով կամ շուրջ 2.9 մլրդ դրամով:

Ինչպես «Արմենպրես»-ը տեղեկացավ ՀՀ ազգային ֆինանսների նախարարությունից, 2015 թվականի հունվար-հոկտեմբերին ՀՀ պետական բյուջեի հարկային եկամուտների և պետական տուրքերի 39.9 տոկոսն ապահովվել է ավելացված արժեքի հարկի հաշվին: Այն կազմել է 351.7 մլրդ դրամ (նախորդ տարվա նույն ժամանակահատվածի համեմատ նվազել է 4.9 տոկոսով կամ շուրջ 18 մլրդ դրամով): ԱԱՀ-ի մուտքերից 160.2 մլրդ դրամը ստացվել է ՀՀ սահմանին հարկումից (նվազումը` 29.2 տոկոս կամ 66 մլրդ դրամ), 191.5 մլրդ դրամը` ապրանքների և ծառայությունների ներքին շրջանառությունից (աճը` 33.5 տոկոս կամ 48 մլրդ դրամ):

Պետական բյուջեի հարկային եկամուտների ու պետական տուրքերի 4.5 տոկոսն ապահովվել է ակցիզային հարկի հաշվին՝ կազմելով շուրջ 39.8 մլրդ դրամ (նվազումը` 0.1 տոկոս կամ 31.2 մլն դրամ): Ներմուծվող ենթաակցիզային ապրանքների հարկումից ստացվել է 24.5 մլրդ դրամ (նվազումը` 2.5 տոկոս), հանրապետությունում արտադրվող ենթաակցիզային ապրանքների հարկումից` 15.3 մլրդ դրամ (աճը` 4.1 տոկոս):

Այս տարվա հունվար-հոկտեմբերին  ՀՀ պետական բյուջեի հարկային եկամուտների և պետական տուրքերի 9.9 տոկոսը ձևավորվել է շահութահարկի հաշվին` կազմելով 86.8 մլրդ դրամ (նվազումը`7.9 տոկոս կամ 7.4 մլրդ դրամ), իսկ 5.9 տոկոսը` մաքսատուրքի մուտքերի հաշվին` կազմելով 51.7 մլրդ դրամ (աճը` 23.6 տոկոս կամ 9.9 մլրդ դրամ), որից 14.9 մլրդ դրամը կազմում է 2014 թվականի մայիսի 29-ի Եվրասիական տնտեսական միության մասին պայմանագրի գործողության արդյունքում ՀՀ ստացած զուտ մուտքը:

2015 թվականի առաջին տասն ամսիներին ՀՀ պետական բյուջե են մուտքագրվել 26.4 մլրդ դրամ պետական տուրքեր` 81.5 տոկոսով ապահովելով տարեկան ծրագրի կատարումը: Նախորդ տարվա նույն ժամանակահատվածի համեմատ նշված մուտքերը նվազել են 5.5 տոկոսով կամ 1.5 մլրդ դրամով, իսկ ստացված 2.6 մլրդ դրամ հաստատագրված վճարները` 41.7 տոկոսով կամ 1.8 մլրդ դրամով:

ՀՀ պետական բյուջե մուտքագրված շուրջ 26.2 մլրդ դրամ բնապահպանական և բնօգտագործման վճարները կազմել են հարկերի և տուրքերի 3 տոկոսը (աճը` 14.5 տոկոս կամ 3.3 մլրդ դրամ):

Այս տարվա հունվար-հոկտեմբերին 252.3 մլրդ դրամ են կազմել եկամտային հարկից ստացված մուտքերը` ապահովելով պետական բյուջեի հարկերի և տուրքերի 28.6 տոկոսը և 7.6 տոկոսով կամ 17.8 մլրդ դրամով գերազանցելով նախորդ տարվա նույն ժամանակահատվածի ցուցանիշը: Իսկ  մուտքագրված 9.9 մլրդ դրամ շրջանառության հարկը կազմել է հարկերի և տուրքերի 1.1 տոկոսը և 26.9 տոկոսով կամ 3.6 մլրդ դրամով զիջել նախորդ տարվա համապատասխան ցուցանիշին:

Հաշվետու ժամանակահատվածում շուրջ 8.6 մլրդ դրամ են կազմել նպատակային սոցիալական վճարները, որոնք սահմանվել են 2014 թվականի հուլիսի 1-ից` «Կուտակային կենսաթոշակների մասին» ՀՀ օրենքում կատարված փոփոխության համաձայն.  նախորդ տարվա նույն ժամանակահատվածում նպատակային սոցիալական վճարների գծով մուտքերը կազմել էին 1.8 մլրդ դրամ:

2015 թվականի հունվար-հոկտեմբեր ամիսների ընթացքում ՀՀ պետական բյուջե են մուտքագրվել շուրջ 24.9 մլրդ դրամի այլ հարկեր` կազմելով հարկերի և տուրքերի 2.8 տոկոսը: Նախորդ տարվա նույն ժամանակահատվածի համեմատ դրանք նվազել են 8.9 տոկոսով կամ 2.4 մլրդ դրամով:

Այս տարվա առաջին տասն ամիսներին պետբյուջե մուտքագրված 4.4 մլրդ դրամ դրամաշնորհները կազմել են տարեկան ծրագրի 38.2 տոկոսը: Դրանք նախորդ տարվա նույն ժամանակահատվածի համեմատ աճել են 89.9 տոկոսով կամ շուրջ 2.1 մլրդ դրամով:

2015 թվականի հունվար-հոկտեմբեր ամիսներին ՀՀ պետական բյուջեի այլ եկամուտները կազմել են շուրջ 55.8 մլրդ դրամ, որից 26.2 մլրդ դրամը` ՀՀ պետական հիմնարկների արտաբյուջետային եկամուտներն են: Այլ եկամուտների գծով արձանագրվել է տարեկան ծրագրի 88.8% կատարողական: 2014 թվականի նույն ժամանակահատվածի համեմատ այլ եկամուտներն աճել են 7.4 տոկոսով կամ 3.8 մլրդ դրամով` հիմնականում պայմանավորված պետության կողմից ռեզիդենտներին տրված վարկերի օգտագործման դիմաց ստացված տոկոսավճարների աճով:

Հաշվետու ժամանակահատվածում ՀՀ կառավարությանն առընթեր անշարժ գույքի կադաստրի պետական կոմիտեի ծախսերի նկատմամբ եկամուտների գերազանցումից ՀՀ պետական բյուջե է մուտքագրվել 16.3 մլն դրամ՝ 12.5 տոկոսով զիջելով նախորդ տարվա նույն ժամանակահատվածի ցուցանիշը:

Պետական սեփականություն հանդիսացող գույքի վարձակալությունից մուտքագրվել է 554.4 մլն դրամ՝ 99.2 տոկոսով ապահովելով տարեկան ծրագիրը և 22.2 տոկոսով զիջելով նախորդ տարվա նույն ժամանակահատվածի ցուցանիշին: 8.7 մլրդ դրամ է ստացվել բանկերում և այլ ֆինանսավարկային հաստատություններում բյուջեի ժամանակավոր ազատ միջոցների տեղաբաշխումից և դեպոզիտներից՝ ապահովելով տարեկան ծրագրված մուտքերի 93.4 տոկոսը: Նախորդ տարվա նույն ժամանակահատվածի համեմատ նշված եկամուտներն աճել են 16.8 տոկոսով կամ 1.3 մլրդ դրամով՝ պայմանավորված 2015 թվականի ընթացքում թողարկված եվրպարտատոմսերից ստացված միջոցների ավանդադրմամբ և տոկոսադրույքների բարձրացմամբ: Իրավաբանական անձանց կապիտալում կատարված ներդրումներից հունվար-հոկտեմբեր ամիսների ընթացքում ստացվել են 850 մլն դրամ շահաբաժիններ՝ կազմելով տարեկան ծրագրի 95.9 տոկոսը: Նախորդ տարվա նույն ժամանակահատվածի համեմատ նշված մուտքերն աճել են 3.4 տոկոսով:

Ավելի քան 12.4 մլրդ դրամ է ստացվել պետության կողմից տրված վարկերի օգտագործման դիմաց, որոնք 94.8 տոկոսով ապահովել են տարեկան ծրագրային ցուցանիշը և 2.6 անգամ կամ շուրջ 7.6 մլրդ դրամով գերազանցել նախորդ տարվա նույն ժամանակահատվածի ցուցանիշը: Մասնավորապես` ռեզիդենտներին տրամադրված վարկերի օգտագործման տոկոսավճարները կազմել են 12.3 մլրդ դրամ կամ տարեկան ծրագրի 94.9 տոկոսը: Ոչ ռեզիդենտներին տրամադրված վարկերի օգտագործման տոկոսավճարները կազմել են 134 մլն դրամ՝ 80.9 տոկոսով ապահովելով տարեկան ծրագրի կատարումը:

Իրավախախտումների համար գործադիր և դատական մարմինների կողմից կիրառվող պտժամիջոցներից 2015 թվականի հունվար-հոկտեմբերին ՀՀ պետական բյուջե է մուտքագրվել շուրջ 11.8 մլրդ դրամ` ապահովելով տարեկան ծրագրային ցուցանիշի 86.9 տոկոսը և 5.7 տոկոսով գերազանցելով նախորդ տարվա նույն ժամանակահատվածի ցուցանիշը: 19.5 մլրդ դրամ է ստացվել ապրանքների մատակարարումից և ծառայությունների մատուցումից` 84.3 տոկոսով ապահովելով տարեկան ծրագրային ցուցանիշը: Նախորդ տարվա նույն ժամանակահատվածի համեմատ նշված եկամուտներն աճել են 8.4 տոկոսով կամ 1.5 մլրդ դրամով: