Առուվաճառքի գործարքներն ավելացել են, բնակարանների գները՝ ևս. անշարժ գույքի շուկան՝ 2020թ. երրորդ եռամսյակում․«Փաստ»

«Փաստ» օրաթերթը գրում է

2020 թվականի երրորդ եռամսյակում հանրապետությունում անշարժ գույքի շուկայում կատարված գործարքների ընդհանուր թիվը գերազանցել է թե՛ նախորդ տարվա, թե՛ 2018 և թե՛ 2017 թվականների ցուցանիշներին: 2020 թ. երրորդ եռամսյակում, ըստ կադաստրի պետական կոմիտեի հրապարակած տվյալների, ընդհանուր առմամբ, կատարվել է 50 978 գործարք, որը 3826-ով ավելի է 2019 թ. երրորդ եռամսյակի գործարքների թվից: Այսինքն, նախորդ տարվա նույն ժամանակահատվածի համեմատ գործարքների թվի 8,1 տոկոս աճ կա:

Միայն Երևանում գործարքների ընդհանուր քանակը 2020 թ. երրորդ եռամսյակին 2019 թ.-ի նույն ժամանակահատվածի համեմատ ավելացել է 4,2 տոկոսով: Առանձին դիտարկելով ընդհանուր գործարքների տեսակները՝ նկատենք, որ 2020 թ. երրորդ եռամսյակում առավել բարձր՝ 38,3 տոկոս ցուցանիշը բաժին է հասել օտարմանը: Իսկ, օրինակ՝ վարձակալության գործարքները 6 տոկոս են կազմել, ամենացածրը՝ 1,4 տոկոսը, բաժին է հասել գործարքների օրինականացման տեսակին: Միևնույն ժամանակ նկատենք, որ 2020 թ. երրորդ եռամսյակում 2019 թ.-ի նույն ժամանակահատվածի համեմատ օտարման գործարքներն աճել են 5,1, առուվաճառքի գործարքները՝ 16,4, փոխանակումը՝ 18,1, վարձակալությունը՝ 9, գրավադրումը՝ 9,2, ժառանգությունը՝ 1,8, օրինականացումը՝ 37,5 տոկոսով:

Այնուամենայնիվ, կան գործարքներ, որոնք 2019 թ. երրորդ եռամսյակի համեմատ 2020 թ. երրորդ եռամսյակում նվազել են: Խոսքը նվիրատվության գործարքների՝ 17,1 և օրինականացման այլ տեսակների՝ 60,2 տոկոսով նվազման մասին է: Ինչ վերաբերում է ՀՀ-ում ընդհանուր գործարքների տոկոսային ու քանակական բաշխվածությանն ըստ գույքի տեսակների, նշենք, որ 2020 թ. երրորդ եռամսյակում ամենաբարձր ցուցանիշը հողերի գործարքներին է բաժին հասել: Հողերի գործարքների տոկոսաչափը 2020 թ. երրորդ եռամսյակում կազմել է 39,8, բնակարաններինը՝ 25,5, բնակելի տներինը՝ 21,3, ավտոտնակներինը՝ 3,4, հասարակական նշանակության շինություններինը՝ 7,9 տոկոս:

Այստեղ ամենացածր՝ 2,2 տոկոսաչափը արտադրական նշանակության շինություններինն է: Եթե համեմատում ենք 2020 թ. երրորդ եռամսյակի գույքի տեսակների գործարքները նախորդ տարվա երրորդ եռամսյակի հետ, ապա այստեղ նվազում է նկատվում միայն բնակարանների դեպքում. 2020 թ. երրորդ եռամսյակում 2019 թ. երրորդ եռամսյակի համեմատ բնակարանների գործարքները նվազել են 1735-ով՝ 11,8 տոկոսով: Ի տարբերություն բնակարանների, անհատական բնակելի տների գործարքների պարագայում 6,8 տոկոս աճ կա. նախորդ տարվա երրորդ եռամսյակի համեմատ այս տարվա նույն ժամանակահատվածում անհատական բնակելի տների 690-ով ավելի գործարք է կատարվել:

Արտադրական նշանակության շինությունների դեպքում էլ գործարքների աճը կազմել է 16, հասարակական նշանակության շինություններինը՝ 10,2, ավտոտնակներինը՝ 3,6, հողերինը՝ 23,7 տոկոսով: Անդրադառնալով օտարման գործարքներին ու գույքի տեսակներին՝ նշենք, որ 2020 թ. երրորդ եռամսյակում նախորդ տարվա նույն ժամանակահատվածի համեմատ այդ գործարքներն ավելացել են 955-ով: Իսկ 2020 թ. երկրորդ եռամսյակի համեմատ 2020 թ. երրորդ եռամսյակում օտարման գործարքներն ավելացել են 88,2 տոկոսով: 2020 թ. երրորդ եռամսյակում ամենաշատը հողերի օտարման գործարք է կատարվել: Հետո բնակարաններն են, ավտոտնակները, բնակելի տներն ու հասարակական նշանակության շինությունները:

Դիտարկելով օտարման գործարքների քանակական բաշխվածությունն ըստ գույքի տեսակի՝ նկատում ենք, որ 2019 թ. երրորդ եռամսյակի համեմատ 2020 թ. երրորդ եռամսյակում բնակարանների օտարման գործարքները նվազել են 1194-ով, իսկ անհատական բնակելի տներինն ավելացել է 186-ով, հողերինը՝ 1860-ով, ավտոտնակներինը՝ 104-ով: Առուվաճառքի գործարքներն իրենց հերթին 2020 թ. երրորդ եռամսյակում 2019 թ.-ի համեմատ աճել են 16,4 տոկոսով: Եթե 2019 թ. գրանցվել էր 13 144, ապա 2020 թ. առուվաճառքի 15 301 գործարք է եղել: Այդուհանդերձ, բնակարանների առուվաճառքը 2020 թ. երրորդ եռամսյակում 2019 թ. երրորդ եռամսյակի համեմատ 13,1 տոկոսով նվազել է:

Միևնույն ժամանակ անհատական բնակելի տների առուվաճառքի գործարքներն ավելացել են 18,6, արտադրական նշանակության շինություններինը՝ 7,8, հասարակական նշանակության շինություններինը՝ 2,4, ավտոտնակներինը՝ 23,5, հողերինը՝ 42,1 տոկոսով: Հավելենք նաև, որ միայն Երևանում 2020 թ.-ին 2019 թ.-ի նշված ժամանակահատվածի համեմատ բնակարանների առուվաճառքի գործարքները նվազել են 8,5, անհատական բնակելի տներինը՝ 4,6, արտադրական նշանակության շինություններինը՝ 22,6, հասարակական նշանակության շինություններինը՝ 4,4 տոկոսով: Իսկ ավտոտնակներինն ավելացել է 4,9-ով, հողերինը՝ 52,8 տոկոսով:

Մարզերում էլ բնակարանների առուվաճառքի 20,7 տոկոս նվազում կա, բայց գույքի մյուս բոլոր տեսակների առուվաճառքի պարագայում նախորդ տարվա երրորդ եռամսյակի համեմատ աճ է գրանցվել: Մարզերում աճը հատկապես ավտոտնակների դեպքում է, որը նախորդ տարվա երրորդ եռամսյակի համեմատ կազմել է 68 տոկոս: Վերջում անդրադառնանք բնակարանների գներին, որտեղ ևս փոփոխություններ են նկատվել: Մասնավորապես, Երևանում 2020 թ. երրորդ եռամսյակում բազմաբնակարան բնակելի շենքերի բնակարանների շուկայական միջին գները 1 մետր քառակուսի մակերեսի հաշվարկով 2019 թ. երրորդ եռամսյակի համեմատ աճել են 5 տոկոսով:

Միաժամանակ հավելենք, որ 2020 թ. երրորդ եռամսյակում 2020 թ. երկրորդ եռամսյակի համեմատ գները 3,5 տոկոսով նվազել են: Իսկ մարզերի քաղաքներում 2020 թ. երրորդ եռամսյակում բազմաբնակարան բնակելի շենքերի բնակարանների շուկայական միջին գները 1 մետր քառակուսի մակերեսի հաշվարկով 2019 թ. երրորդ եռամսյակի համեմատ աճել են 1,9 տոկոսով:

 Աննա Բադալյան

Մանրամասները՝ «Փաստ» օրաթերթի այսօրվա համարում