Համաշխարհային հայկական կոնգրեսը և Ռուսաստանի հայերի միությունը պահանջել են Փաշինյանի հրաժարականը

Past.am

Նոյեմբերի 24-ին Երևանում Համաշխարհային հայկական կոնգրեսի և Ռուսաստանի հայերի միության նախաձեռնությամբ տեղի է ունեցել կլոր սեղան՝ կոնգրեսի և ՌՀՄ-ի նախագահ, ՅՈՒՆԵՍԿՕ-ի բարի կամքի դեսպան Արա Աբրահամյանի նախագահությամբ:

Հանդիպման ընթացքում քննարկվել են Հայաստանում, Արցախում և Սփյուռքում ստեղծված հետպատերազմյան իրավիճակի հետ կապված հարցեր, որոնց թվում են՝ ազգային միասնության և արժանապատվության վերականգնումը, ճգնաժամի հաղթահարման մեխանիզմների մշակումը, զոհված և անհայտ կորած զինծառայողների ընտանիքներին, վիրավորներին և հաշմանդամներին, փախստականների ընտանիքներին օգնությունը, համավարակի հետևանքների մեղմացումը, Հայաստանի լիարժեք գործունեությունը միջազգային ոլորտում վերականգնելը` արտաքին քաղաքական գերակայությունների հստակ սահմանմամբ և այլն:

Կլոր սեղանի աշխատանքներին մասնակցել են հայ մտավորականության կարկառուն ներկայացուցիչներ՝ գիտության, կրթության, մշակույթի, հասարակական-քաղաքական ոլորտի գործիչներ, հայտնի ռազմական առաջնորդներ, դիվանագետներ, ոչ անտարբեր քաղաքացիներ, որոնք մտահոգված են տեղի ունեցող իրադարձություններով և Հայաստանի, Արցախի ու մեր ժողովրդի հետագա ճակատագրով:

«Եռակողմ հայտարարության ստորագրումից հետո ռազմական գործողություններն ավարտվեցին, բայց պայքարը դեռ նոր է սկսվում: Ավելին, այն թևակոխել է նոր, ավելի ճակատագրական ու պատասխանատու փուլ»,- իր խոսքում ասել է Արա Աբրահամյանը:

Հանդիպման մասնակիցները համոզմունք են հայտնել, որ չնայած երկրում առկա ծանր իրավիճակին, երկրում տիրող անորոշությանը, մտքի և գործողությունների խառնաշփոթին, անհրաժեշտ է միավորել առկա հայրենասիրական մտավոր և բիզնես ներուժը, որը միշտ եղել է և կա, որպեսզի ամփոփելով բոլոր առաջարկությունները՝ միասնական ճանապարհային քարտեզ ներկայացվի` դրա իրականացման փուլային պլանով:

Հանդիպման բոլոր մասնակիցները երկրի և հայ ժողովրդի ապագան կապում են բացառապես Հայաստանի և Արցախի էվոլյուցիոն և առաջադեմ զարգացման հետ: Միևնույն ժամանակ, ակնհայտ է, որ առկա իրավիճակից դուրս գալու համար ստանդարտ լուծումներ չկան:

Անմիջական փաթեթային լուծման անհրաժեշտություն են պահանջում ներքին և արտաքին քաղաքական խնդիրները, որոնք կապված են Արցախի և Հայաստանի հետպատերազմյան ճակատագրի և զարգացման, Սփյուռքի ներուժի համախմբման և արդյունավետ օգտագործման, մարդասիրական գործունեության, կորոնավիրուսի դեմ պայքարի և այլնի հետ:

Ստեղծված իրավիճակում Հայաստանի վարչապետը պետք է հրաժարական տա, և անհրաժեշտ է սահմանադրական ճանապարհով ընտրել նոր վարչապետ և իրավասու կառավարություն:

Ճգնաժամային շրջանի կառավարությունը կարող է ղեկավարել միայն այն առաջնորդը, որը ոչ միայն կհայտարարի և կհիմնավորի ճանապարհային քարտեզը, այլ նաև կներկայացնի յուրաքանչյուր կետի փուլային իրականացման ժամկետը (պատասխանատվություն է կրելով հնարավոր ձախողման համար), ինչպես նաև, որ հատկապես կարևոր է, իրականացման մեխանիզմները և ֆինանսավորման աղբյուրները:

Մեկ տարվա ընթացքում նոր կառավարությունը պետք է արտահերթ խորհրդարանական ընտրությունների նախապատրաստի:

Այսուհետ հասարակության մեջ չպետք է տեղ լինի ատելության և փոխադարձ անվստահության, կործանարար սև-սպիտակ բաժանարար գծերի համար:

Հասարակության մեջ ակնհայտ պահանջ կա իրազեկ, հայրենասեր առաջնորդի, ով երկրի ներսում և նրա սահմաններից դուրս հեղինակություն է վայելում, կապված չէ կուսակցական և կլանային շահերով, և որի հետևում կա իրական գործերի բեռ ու անցած համոզիչ ուղի:

Մենք պարտվեցինք ճակատամարտում, բայց ոչ մարտում: Վերջին տասնամյակների ճիշտ եզրակացություններն ու դասերը, մասնավորապես, Արցախյան վերջին պատերազմը, ազգային առաջնորդի և կառավարության դրական օրակարգի շուրջ միավորումը, իրական գործերի և գործողությունների հետ զուգակցված, մենք վստահ ենք, որ կարող են վերադարձնել մեր հավատը սեփական ուժերի նկատմամբ և վերածնել մեր երկիրը»: