«Տնտեսության մեջ ամեն ինչ թողնված է ինքնահոսի. կառավարությունից այսքան ժամանակ ոչ մի նորմալ բան չտեսանք»․«Փաստ»

«Փաստ» օրաթերթը գրում է

Այս պատերազմը շատ թանկ է արժենալու մեր տնտեսության վրա։ Ուշքի գալու համար ժամանակ չկա, պետք է գործել։ Բայց ինչի՞ց սկսել։ «Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը նշում է, որ այս պահին ինչ-որ բան ասելը բավականին բարդ է, անորոշություն կա։ «Նախօրոք չենք կարող կանխագուշակել, թե ինչ կլինի։ Մի պահ դրամն արժեզրկվեց, դոլարի փոխարժեքը բարձրացավ, հիմա մի փոքր կարգավորվել է։ Այս պահին, կարծես թե, ամեն ինչ շատ կատաստրոֆիկ է, բայց եթե այսպես էլ մնա, պետք է ուրախ լինենք։ Այս աղետալի վիճակից, պատերազմից, այսքան կորուստներից հետո դեռ չգիտենք էլ՝ ինչ կլինի։ Կրկնվեմ՝ եթե այսպես մնա, լավ կլինի։ Տնտեսության մասին։ Ամեն ինչ թողնված է ինքնահոսի։ Բոլորը պետք է սկսեն աշխատել ուժերի գերլարումով։

Բայց կա ներդրումների հետ կապված կարևոր խնդիր։ Երկիրը պետք է այնքան կայունանա, որ ներդրողները գան Հայաստան, քանի որ այս պարագայում բիզնեսմենների համար Հայաստանն առայժմ ռիսկային երկիր է ու դեռ երկար ժամանակ այդպես է լինելու։ Սպասելիքներ չկան նաև երկրի տնտեսությանը զարկ տալու առումով։ Ամեն ինչ ինքնահոսի է մատնված, մինչև կլինի կայունություն։ Սահմանների հետ կապված ամեն օր խնդիրներ են առաջանում, դրանք հստակ նշված չեն։ Մինչև այս բոլոր հարցերը չկարգավորվեն, մենք չենք կարող դրական ինչ-որ բաներ սպասել, քայլեր ակնկալել»,-«Փաստի» հետ զրույցում ասում է Չիլինգարյանը։ Նշում է՝ հետևում է նաև ապրանքների գնաճին, նկատում է, որ ներկրվող ապրանքների դեպքում գնաճ կա։

«Ամեն դեպքում պետք է հաշվի առնել, որ պատերազմական իրավիճակում ենք, իսկ դա չէր կարող չանդրադառնալ նաև ապրանքների գների վրա»,-նշում է մեր զրուցակիցը։ Չիլինգարյանն ընդգծում է՝ այս պահին շատ կարևոր է մեր երկրի ներսում գործունեություն ծավալող տնտեսվարողներին մոբիլիզացնելը։ «Դա անելն ավելի հեշտ կլինի, քան ներդրողներ բերելը։ Հայաստան ներդրողներ կբերի միայն կայունությունը։ Կառավարությունից այսքան ժամանակ ոչ մի նորմալ բան չտեսանք, հիմա հստակ քայլեր են պետք, տեսնենք՝ կանե՞ն այդ քայլերը։

Օրինակ՝ փակվում են հագուստի խանութները։ Բնական է՝ առևտուր չկա, մարդիկ հագուստ գնելու մասին չեն մտածում, այլ հոգ են տանում առօրյա ծախսերի մասին, բոլորը մտահոգված են, անհանգստանում են, թե ինչ է լինելու։ Այն, որ տնտեսվարող սուբյեկտները դադարեցնում են իրենց գործունեությունը, ազդելու է բյուջեի վրա։ Դրան գումարած այսքան կորուստները։ Հազարավոր մեր երիտասարդներ, ցավոք, հաշմանդամություն են ձեռք բերել, պետությունը պետք է պարտավորություն ստանձնի և հոգ տանի նրանց մասին։ Պետությունը պետք է ամեն ինչ անի առաջացող խնդիրները լուծելու համար։ Պետք է սպասենք, տեսնենք՝ ինչ կլինի»,-եզրափակում է Կարեն Չիլինգարյանը։

Լուսինե Առաքելյան

Մանրամասները՝ «Փաստ» օրաթերթի այսօրվա համարում