Փաշինյանի լայվի արձագանքները. Հողատու, անթասիբ, դավաճան... հրաժարական

Panorama.am-ը գրում է.

Այսօր Նիկոլ Փաշինյանը որոշել էր զրուցել ժողովրդի հետ։ Բայց ստացվեց այնպես, որ ժողովուրդը զրուցեց նրա հետ։

Մինչ հայ զինվորների արյան գնով անառիկ պահած հայկական հողերը մի ստորագրությամբ թշնամուն հանձնած այս գործիչը ուղիղ եթերում խոսում էր, ֆեյսբուքի օգատատերերը հարցեր էին հրապարակում մեկնաբանություններում ու ակնկալում լսել հենց դրանց պատասխանները։

Օրինակ, մի հայտնի փաստաբան հետաքրքրվում էր.

«Ինչո՞ւ երկու տարվա մեջ Հայաստանի Հանրապետության ԶՈւ-ում մարտական ստորաբաժանումներ կրճատվեցին, կրկնակի ավելացվեց ՊՆ և ԳՇ կաբինետային աշխատակիցների թիվն ի հաշիվ այդ ստորաբաժանումների ծառայողների։

Ինչո՞ւ է փոխվել ԶՈւ զարգացման պլանը, արդիական ու պիտանի զինատեսակների (այդ թվում ՌԷՊ և ՀՕՊ նորագույն համակարգերի) փոխարեն հնամաշ ОСА համակարգեր, անպետք СУ 30 ինքնաթիռներ ձեռք բերելու համար։

Ինչո՞ւ անգամ հիմա չի բացահայտվում «զրոյական կետից» սկսված բանակցությունների (բացահայտ ու ծածուկ) ընթացքը, որպեսզի հասկանանք փակուղու պատճառը։

Ինչո՞ւ էին Հայաստանից ՌԴ մեսիջներ ուղարկվում, թե մեզ մոտ եղանակ է փոխվել, դուք էլ պիտի հարմարվեք, ինչո՞ւ էր տարվում ուղղորդված հակառուսական քարոզչություն։

Ինչո՞ւ պատերազմի անխուսափելիության մասին այսօր խոսողները պետությունը չէին նախապատրաստում պատերազմի։

Ինչո՞ւ Հայաստանը չձեռնարկեց համապատասխան քայլեր, երբ դեռ ամռանը հայտնվեցին տեղեկություններ Ադրբեջանի կողմից թուրքական ԱԹՍ-ների ձեռքբերման մասին։

Ինչո՞ւ Հայաստանում չսկսվեց զորահավաք, երբ օգոստոս ամսից Ադրբեջանում այն իրականացվում էր, իսկ Թուրքիան Սիրիայի հյուսիսում Արցախ ուղարկելու համար վարձում էր գրոհայինների։

Ինչո՞ւ արդեն պատերազմի օրերին փաստացի դադարեցվեց զորահավաքի իրականացումը Հայաստանում, դադարեցվեց զորքերի համալրման գործընթացը։

Ինչո՞ւ հայտարարվեց ռազմական դրություն, բայց այն տարածվեց միայն խոսքի ազատությունն ու հավաքների իրավունքը սահմանափակելու վրա։

Ինչո՞ւ էին մեզ լկտիաբար ստում պատերազմի ամբողջ ընթացքում։

Ինչո՞ւ մոգոնվեց կամավորներով կամ զանազան պետական կառույցների ջոկատներով պատերազմ վարելու անհաջողության դատապարտված գաղափարը։

Ինչո՞ւ պատերազմը չկանգնեցվեց ավելի վաղ, ե՞րբ, քանի անգամ, ինչ առաջարկներ են ներկայացվել Հայաստանին պատերազմի ընթացքում։

Ինչո՞ւ հանրությանը չի ներկայացվում տեղեկատվություն այն մասին, թե Հայաստան Համահայկական հիմնադրամի միջոցով հանգանակված գումարներով կոնկրետ ինչ ծախսեր են արվել։

Ինչո՞ւ է մինչ այս պահը հասարակությունից դեռ թաքցվում հայկական կողմի կորուստների իրական պատկերը»։

Ապատեղակատվության հոսքերից բողոքող Փաշինյանին մեկ այլ հայտնի իրավաբան հիշեցնում էր. «Ապատեղեկատվությունից խոսում է ՀՀ-ում ապատեղեկատվության և օդից կախված լուրերի հիմնադիրը»։

Ապագայի պլանների մասին խոսող Փաշինյանին օգտատերերը հիմնականում մի հարց էին հասցեագրում. «Ինչո՞ւ մեր գերիներին չեք բերում»։

«Էդ ո՞նց է լինում, որ իրենք չգրավված տարածքները կոնկրետ օրով ուզում են՝ մարդկանց տներից հանելով, իսկ դուք կոնկրետ օրերով չեք ուզել մեր գերիներին, ինչուուուուուուո՞ւ»։

«Ոչ մի բան չեք անում ձեր անշունչ կառավարական համակարգով, ամոթ է, ոչ գերիների հարցով եք զբաղվում, ոչ էլ կորած տղեքի։ Ամոթ է»։

Մյուսներն էլ նրան որակում են անթասիբ, ոչ հայրենասեր, հողատու, տղաների արյունը վաճառած, դավաճան ու կասկածներ հայտնում նրա հոգեկան առողջության մասին, մեղադրում անընդհատ ստեր ասելու համար, շատերն էլ պահանջում են հրաժարական։

«Ոչ մի բառի այլևս անհնար է հավատալ։ Ցավոք սրտի, դուք կորցրել եք ձեր վստահությունը։ Ձեզանից անհնար է ճշմարտությունը լսել»։