«Մեզ ասացին, որ անհնար է պատվաստանյութ տրամադրել մինչև տարեվերջ, բայց մենք դա արեցինք». Թրամփը խոստացել է վերջ տալ համավարակին

Կորոնավիրուսի դեմ ամերիկյան պատվաստանյութի մատակարարումը շուտով կիրականացվի ամբողջ աշխարհում, հինգշաբթի օրը հավաստիացրել է ԱՄՆ-ի ներկայիս նախագահ Դոնալդ Թրամփը՝ խոստանալով վերջ դնել համավարակին, հայտնում է ՏԱՍՍ լրատվական գործակալությունը:

«Մեզ ասացին, որ անհնար է պատվաստանյութ տրամադրել մինչև տարեվերջ, բայց մենք դա արեցինք և այն ուղարկում ենք աշխարհով մեկ: Տարվա սկզբին պատվաստանյութը հասանելի կլինի յուրաքանչյուր ամերիկացու, և դրանից անմիջապես հետո այն կմատակարարվի ամբողջ աշխարհով: Մենք մեկընդմիշտ վերջ կտանք համավարակին», - ասել է ԱՄՆ-ի նախագահը իր տարեվերջյան ուղերձում`նշելով, որ ամերիկացիների ամենախոցելի խավն արդեն պատվաստվել է:

Թրամփն իր խոսքի մեծ մասը նվիրել է համավարակի հետ կապված հարցերին, մասնավորապես դրա դեմ պայքարի ամերիկյան իշխանությունների ջանքերին: Բացի այդ, խոսել է տնտեսական զարգացման ծրագրերի մասին`շեշտելով, որ ամերիկյան տնտեսությունն ավելի արագ է աճում քան եվրոպականը: 

Բացի այդ, նա անդրադարձել է ԱՄՆ միջնորդությամբ «Աբրահամյան համաձայնագրերի» ստորագրմանը, որի արդյունքում կարգավորվել են հարաբերությունները Իսրայելի և մի շարք արաբական երկրների միջև:

Մինչև հունվարի վերջ, պատվաստված ամերիկացիների թիվը, նախատեսվում է հասցնել 50 միլիոնի:
Ըստ Ջոնս Հոփկինսի համալսարանի հաղորդած տվյալների, ԱՄՆ-ում կորոնավիրուսային վարակի ավելի քան 19,8 միլիոն դեպք է հայտնաբերվել, իսկ ավելի քան 344 հազար մարդ մահացել է`երկու դեպքում էլ ԱՄՆ-ի համար աշխարհում առաջին տեղն ապահովելով:

Past.am