«Ես էլ եմ մարդ ու կարող եմ տրվել իմ սեփական հույզերին, բայց չունեի դրա հնարավորությունը». Հռիփսիմե Սարգսյանը՝ «Շիրազի Վարդի» ավարտի և դադար վերցնելու մասին

Դերասանուհի Հռիփսիմե Սարգսյանի մասնակցությամբ «Շիրազի Վարդը» հեռուստասերիալն օրերս ավարտվեց, դերասանուհին որոշել է դադար վերցնել: Tert.am Life-ի հետ զրույցում Հռիփսիմեն պատմել է դադարի պատճառների, սպառվելու և իր ստեղծագործությունների մասին:

Հռիփսիմեի խոսքով՝ կկարոտի իր կերպարին, որովհետև 1 տարի միասին էին, կապվածություն է ստեղծվել:

«Շողերին մարմնավորելը բարդ էր, այդ պատճառով հիմա սպառված եմ: Կա ցուցադրական դերասանական խաղ, երբ դերասանը չի ապրում կերպարի ապրումները, բայց ես ապրել եմ այն, ինչ Շողերը, ամեն ինչ անցկացրել եմ իմ միջով, քանի որ չունեմ դերասանական այդ պրոֆեսիոնալիզմը: Կարծում եմ՝ դեռ փոքր եմ, այդ էմոցիաները պետք է գան պրակտիկայի հետ, ինձ դեռ երկար տարիներ են պետք, բայց սկսնակ ժամանակ ինքդ քո նկատմամբ շատ պահանջկոտ ես, պատրաստ ես շատ բաների, որովհետև կայանալու կարիք ունես, ինչն օգնում է մոտիվացվել և կերտել բարդ հոգեբանական դերերը» ,- ասաց նա:

Ըստ դերասանուհու՝ դադարի կարիք ունի, որովհետև կերպարի բացասական զգացմունքները իր մեջ են մնացել: «Ժողովրդական լեզվով ասած՝ «մնացել եմ կերպարի տակ», այդ պատճառով հիմա դատարկ եմ: Նաև հեռուստադիտողը հոգնում է նույն դեմքերից, դերասանը հոգնում է տեսախցիկից, անընդհատ նկարահանվելը կարող է նաև դեպրեսիաների պատճառ դառնալ: Դադարների կարիք միշտ կա, նաև կարևոր է՝ տարբեր ռեժիսորների հետ աշխատել, որովհետև ամեն ռեժիսոր մի դպրոց է, ես արդեն երկու տարի է՝ աշխատում եմ Ելենա Արշակյանի թիմի հետ: Չնայած շատ գոհ եմ՝ պետք է աշխատել նաև այլ մարդկանց հետ: Նույն աշխատաոճը դերասանին լճացման է տանում» ,- նշեց նա:

Հռիփսիմեն նկատեց, որ անցնող 2020 թվականը բարդ տարի էր: «Ամբողջ տարվա ընթացքում ինչ ասես, որ չպատահեց՝ սկսած համաճարակից, վերջացած՝ պատերազմով: Մարդիկ դիտում են հեռուստասերիալը՝ առանց պատկերացնելու, թե ինչ է տեղի ունենում կադրի հետևում: Դերասաններից շատերը՝ այդ թվում ես, իմ հարազատներից շատերը, վարակվեցինք կորոնավիրուսով, դերասաններից, ընկերներիցս, հարազատներիցս շատերն առաջնագծում էին՝ պատերազմի մեջ, իսկ ես պետք է խաղայի: Ես էլ եմ մարդ ու կարող եմ տրվել իմ սեփական հույզերին, բայց չունեի դրա հնարավորությունը: Գիտակցելով, որ շատ մարդիկ սպասում են սերիալին գոնե մեկ ժամով աղետալի լուրերից ցրվելու համար՝ կատարում էինք մեր աշխատանքը» ,- ասաց նա:

Հռիփսիմեն նաև բանաստեղծություններ է գրում, նա ընդգծեց, որ դադարի ընթացքում նորություններ է ունենալու: «Կարծում եմ՝ այն, ինչ գրում եմ, արժանի է ոչ միայն համացանցում լինելուն: Այդ մտքին ինձ տարել են իմ հետևորդները, ընկերները, ընթերցողները: Երբեք չէի կարող մտածել, որ կարող եմ ընթերցողներ ունենալ, այն էլ այս ժամանակներում, երբ ասում են՝ գիրք չեն կարդում: Չեմ ուզում շատ բացահայտումներ անել, բայց որոշ ժամանակ անց նորություններ կլինեն» ,- նշեց նա:

Հարցին, թե ի՞նչ է իրեն պետք ստեղծագործելու համար, Հռիփսիմեն պատասխանեց. «Ինձ ստեղծագործելու համար բողոք և ցավ է պետք: Եթե ամեն ինչ լավ է, իրերն իրենց տեղում են և բողոք չկա, չեմ կարող ստեղծագործել, իմ ստեղծագործությունը չի կարող իրական արժեք ունենալ: Մարդիկ կան, որ հակառակն են պնդում, բայց ինձ մոտ այդպես չէ: Ներսումս ինչ-որ գործընթաց է տեղի ունենում, սկսում եմ հակառակվել հասարակությանը, ժամանակաշրջանին, կարծրատիպերին և այդ կոնֆլիկտից ծնվում է ստեղծագործությունը: Ես ունենում եմ հանգստի ու դատարկության պահեր և, մարդկանցից բավարարվածություն չստանալով, ինքնաբերաբար սկսում եմ ստեղծագործել: Հետաքրքիրն այն է, որ բանաստեղծությունը, կարծես, հայտնվի իմ առջև, ես չեմ գրում-ջնջում, միանգամից մտքերս թղթին եմ հանձնում»:

Հռիփսիմեն նաև ասաց, որ ստեղծագործությունների մեջ հավասարաչափ կարևորում է ձևն ու բովանդակությունը: «Բոլոր ժամանակների կոնֆլիկտն է՝ կարևորել ձևը, թե՞ բովանդակությունը: Մեր ժամանակներում ստեղծագործությունները հաճախ են ընկնում ձևի հետևից, բայց բովանդակությունը պակաս կարևոր չէ: Ավանգարդ մտածողությունն իմ ասածը չի ժխտում. դու կարող ես լինել հետաքրքիր և բովանդակ: Երբ գնում ենք դեպի անտիկ ժամանակաշրջան, տեսնում ենք, որ միայն ֆորմալիստ ոչ մի գրողի ստեղծագործություններ չեն, որ արժևորվել են: Իսկ այն ստեղծագործությունները, որոնք բովանդակության հաշվին են ստեղծագործություն, դարերով են մնում: Իմ ամենասիրելի պոետը Չարենցն է, նրանից հանճարեղ մարդ և գրող աշխարհում չկա, շատ բարձր եմ գնահատում նրան» ,- եզրափակեց դերասանուհին: