Սպորտհոկեր. էքստրեմալ սպորտաձև՝ «թելի կոճով». «Փաստ»

«Փաստ» օրաթերթը գրում է

Ներկայումս առկա է էքստրեմալ սպորտաձևերի հսկայական քանակություն, բայց, չնայած դրան, ժամանակակից աշխարհում երբեմն ի հայտ են գալիս զարմանահրաշ այնպիսի նոր գաղափարներ, որոնցով կարելի է ինչպես զվարճացնել, այնպես էլ հաճույք պատճառել հանդիսատեսին: Սպորտհոկերը հատուկ աթոռ կամ աթոռակ է, որն օգտագործվում է նույն անունը ստացած նոր մարզաձևում: Ըստ ձևի, աթոռակը նման է հիմնականում թել ի՝ վառ գույներով ներկված հսկայական թմբկագլանի (մանրակ, կոճ): Այն պատրաստվում է պլաստմասայից, բայց առավելագույն հարմարավետության համար ունենում է ռետինե եզրեր: Նման թմբկագլանը օգտագործվում է Sporthocker անվանումը ստացած հատուկ սպորտաձևում, որով սիրում են զբաղվել էքստրեմալ սպորտաձևերի սիրահարները, իսկ իմաստը թմբկագլանի միջոցով տարատեսակ հնարքներ կատարելն է:

Սպորտհոկեր խաղագործիքը բազմաֆունկցիոնալ է, ինչը թույլ է տալիս սպորտհոկերիստներին իրականացնել ցանկացած տեսակի աներևակայելի հնարքներ՝ տուրք տալով երևակայությանը: Օգտագործելով այդ աթոռակը՝ նրանք տարբեր բարդությունների և մակարդակների խիստ դիտարժան հնարքներ են իրականացնում: Այնուամենայնիվ, այդ սպորտաձևում կա մեկ կանոն. յուրաքանչյուր հնարք կամ հնարքների շարք սկսվում և ավարտվում է ելակետային դիրքով, իսկ դա այն դիրքն է, երբ մարզիկը նստում է սպորտհոկերի վրա: Այս էքստրեմալ աթոռակը ստեղծվել է 2007 թվականին Գերմանիայում «Salzig Sporthocker» ընկերության կողմից:

Այս ընկերության պրոֆիլը տարատեսակ հանգստի ձևերի համար նախատեսված ապրանքների արտադրությունն է: Սպորտհոկերը այդ տարի ISPO ցուցահանդեսում ճանաչվել է որպես տարվա լավագույն մարզական գյուտ: Ներկայումս սքեյթբորդինգի հետ հավասար սպորտհոկերը հավակնում է դառնալ փողոցային ամենատարածված սպորտաձևերից մեկը: Դժվար է վստահորեն ասել, թե ինչ ապագա է սպասում այդ սպորտաձևին, հնարավոր է, որ այն ժամանակին համընթաց հանրաճանաչություն ստանա, հնարավոր է՝ ոչ, բայց փաստը մնում է փաստ, որ ներկայում արդեն իսկ այդ սպորտաձևի բազմաթիվ սիրահարներ կան:

Կամո Խաչիկյան

Մանրամասները՝ «Փաստ» օրաթերթի այսօրվա համարում