«2 տարի է՝ Մոնիկային մամայություն եմ անում». «Միսս Տիեզերք»-ում Հայաստանի ներկայացուցչի դժվար մանկությունը, պլաստիկ վիրահատությունն ու գլխավոր ասելիքը

ЛАЙФ 30 Март, 2021 17:13

Tert.am Life-ն առաջինն է իր ընթերցողներին հայտնել, որ «Միսս տիեզերք» մրցույթում այս տարի Հայաստանը կներկայացնի 21-ամյա Մոնիկա Գրիգորյանը, ով ծննդով Վանաձորից է: Թեև նա «Միսս աշխարհ Արմենիա 2019» մրցույթում չհաղթեց, մրցույթի մասնակիցների լուսանկարների տարածումից հետո քննարկումների կենտրոնում հայտնվեց, և մրցույթը նրա համար մոդելային կարիերայի սկիզբ դարձավ:

Մոնիկան սովորում է Երևանի Վալերի Բրյուսովի անվան պետական համալսարանում, տիրապետում է թուրքերենին, գերմաներենին, ռուսերենին, անգլերենին:

Այսօր հրավիրված ասուլիսի ժամանակ «Միսս Հայաստան 1998», «Միսս ԱՊՀ 1999», «Միսիս Գլոբ 2009», «Միսս Արմենիա» համահայկական մշակութային հիմնադրամի նախագահ Գոհար Հարությունյանն ասաց, որ Մոնիկան պատրաստվում է մեկնել նաև «Միսս Շարմ» միջազգային մրցույթին, որը կայանալու է տարեվերջին: Իսկ «Միսս Տիեզերք» մրցույթը տեղի կունենա մայիսի 16-ին Ֆլորիդայում:

«Այս պահին ամենապատրաստ թեկնածուն Մոնիկան էր: Քանի որ պետք է շատ կարճ ժամանակահատվածում պատրաստվեինք, ինձ համար կարևոր էր նաև, որ մասնակցի հետ հեշտ աշխատենք: Հաղթահարելով շատ դժվարություններ՝ փորձում ենք այնպես անել, որ ոչ մի բաց չլինի»,- ասաց նա ու հավելեց, որ վիզայի հետ կապված խնդիր կար, սակայն դիմել են դեսպանին, և այն շտկվել է։

Գոհարի խոսքով՝ շատ կարևոր է, որ մասնակիցն իմանա, որ մեր հայրենակիցները կանգնած են իր կողքին․ «Պետք է ցույց տալ, որ մենք ուժեղ ենք, հաղթող, մեր երկիրը կա, պետք է շարունակենք ապրել ու վերականգնենք մի փոքր հեղինակությունը կորցրած մեր երկրի անունը: Մոնիկան ներկայացնելու է Արցախի տարազը, այն կարում է Լիլիթ Մելիքյանը, կփորձենք մի փոքր քաղաքականացնել, եթե մեզ դա թույլ տան: Երեկոյան զգեստը կարելու է ֆիլիպինցի դիզայներ, ով Ֆլորիդայից է: Ես ամեն կերպ փորձում էի հարթակ տալ հայ դիզայներներին, բայց չստացվեց»,- նշեց Գոհարը:

21-ամյա Մոնիկան էլ ընդգծեց, որ իր համար շատ պարտավորեցնող Հայաստանը ներկայացնել նման հեղինակավոր մրցույթում: «Մոտ մեկ տարի դադարի մեջ էի, վախենում էի, բայց մեծ սիրով ընդունեցի հրավերը: Ինձ մի փոքր ավելի պատրաստ էի զգում, որովհետև տարեվերջին մասնակցելու եմ մեկ այլ հեղինակավոր մրցույթի: Հիմա լարվածություն կա, որովհետև պատասխանատվությունը շատ մեծ է, ժամանակը՝ քիչ, բայց փորձում եմ ամեն ինչին դրական տեսանկյունից նայել, որպեսզի նախապատրաստական աշխատանքներից հաճույք ստանամ, լավ տրամադրությամբ մեկնեմ»,- ասաց նա:

Մոնիկան քթի պլաստիկ վիրահատություն է արել: Խոսելով այս մասին՝ Գոհարն ասաց. «Մեր հասարակությունը չի հետևում միջազգային մրցույթներին։ Հաճախ տարածում են թյուր տեղեկություն, թե պլաստիկ միջամտությունն արգելվում է: Մեր պայմաններում նման կետ չկա, աղջիկը կարող է շտկել արտաքինը, եթե կարծում է՝ դա կարող է ինքնավստահություն տալ իրեն: Իհարկե, ժյուրիի անդամները արխիվային լուսանկար են պահանջում, որպեսզի հասկանան, թե ինչ միջամտություններ են եղել: Ամեն դեպքում, միայն քթի վիրահատությամբ գեղեցկուհի չեն դառնում»:

«Միսս Աշխարհ» մրցույթում մեր նախորդ տարվա ներկայացուցիչը՝ Լիանա Ոսկերչյանը, խոսեց իր մաշկային հիվանդության՝ վիտիլինգոյի մասին։ Մոնիկան նկատեց, որ ինքը ևս ասելիք ունի: «Ինձ համար բարդ է, բայց խոսելու եմ իմ ծանր մանկությունից, որովհետև 10 տարեկանում կորցրել եմ հորս, ընտանիքիս հետ շատ դժվարություններ ենք հաղթահարել: Խոսելու եմ այդ մասին ու միակողմանի ծնողազուրկ մեծանալս կապեմ պատերազմի ընթացքում ծնողազուրկ դարձած հազարավոր ճակատագրերի հետ: Հաղորդագրությունն այն է, որ կարողացել եմ հաղթահարել այդքան դժվարությունը»,- ասաց նա:

Միջազգային այս մրցույթում կա նաև լողազգեստով ցուցադրություն, Հայաստանում անցկացվող մրցույթի ժամանակ Մոնիկան հրաժարվել էր լողազգեստով ելույթ ունենալ, մասնակցել էր միայն «Միսս Աշխարհ Արմենիային»՝ բաց թողնելով «Միսս Տիեզերք Արմենիա»-ն: Մոնիկան ասաց, որ հիմա այդ առումով մտահոգություն չունի, պատրաստ է լողազգեստ հագնել, արդեն լողազգեստով լուսանկարներ ունի:

«Ժամանակին ամաչեցի, կարծում էի՝ համաքաղաքացիներս ինձ սխալ կհասկանան, բայց երբ մասնակցեցի Չինաստանում կայանալիք մրցույթին, չէի կարող լողազգեստից հրաժարվել: Հագա այդ ժամանակ և կհագնեմ հիմա, որովհետև մարմնիս վրա բավականաչափ աշխատել եմ: Ցույց կտամ, որ հայ կինը համարձակ է, գեղեցիկ և ինքնավստահ»,- նշեց Մոնիկան:

Գոհարն ընդգծեց, որ Մոնիկային և բոլոր աղջիկներին մեկնելուց առաջ շատ խորհուրդներ է տալիս: «Արդեն երկու տարի է՝ Մոնիկային մամայություն եմ անում, ինչ ասում եմ, Մոնիկան ասում է, որ կրկնում եմ իր մայրիկի խոսքերը: Նրան խորհուրդ եմ տվել այս բնագավառում պահել բարոյական արժեքները, ինքնուրույն նպատակներ դնել և հասնել դրանց, համարձակ լինել, շտկել իր թերությունները: Այդ դեպքում նույնիսկ անձնական կյանքում է ընտրությունն ավելի հեշտ լինում: Ես հինգ երեխա ունեմ, բայց ճանապարհորդել եմ, մրցույթների մասնակցել, ուսում ստացել, ինձ փորձել եմ տարբեր ասպարեզներում, այդ առումով կարող եմ օրինակ ծառայել»,- եզրափակեց Գոհարը: