Թևան Պողոսյանը՝ չափավոր ու ծայրահեղ ընդդիմության և «Լուսավոր Հայաստան» կուսակցության մասին

Շաբաթ օրը տեղի ունեցավ ԱԺ պատգամավոր Էդմոն Մարուքյանի «Լուսավոր Հայաստան» կուսակցության հիմնադիր համագումարը:

Այն հարցին՝ ո՞ր քաղաքական բևեռն է այն լրացնելու և ի՞նչ նոր որակներ է բերելու քաղաքական դաշտ, պատգամավոր Թևան Պողոսյանը Past am-ի հետ զրույցում պատասխանեց. «Այդ մասին հենց համագումարում ասվել է: Կուսակցությունը եվրոպական ինտեգրացիայի և արժեհամակարգի ջատագովն է, ինչը մոտ է նաև ինձ: Ես կողմ եմ, որ Հայաստանը զարգանա այդ ուղղությամբ և այդ աշխատանքները ծավալում եմ սկսած 2001 թվականից»:

Պարոն Պողոսյանը ողջունում է ոչ միայն «Լուսավոր Հայաստանի», այլև Տիգրան Ուրիխանյանի «Ալյանս» և Նիկոլ Փաշինյանի «Քաղաքացիական պայմանագիր» կուսակցությունների մուտքը, որոնք ստեղծվեցին 2015 թվականին:

Նկատենք, որ Էդմոն Մարուքյանի կուսակցությունը նախապատրաստվում է ոչ թե արտահերթ, այլ հերթական խորհրդարանական ընտրություններին: Շատ ծայրահեղ ընդդիմադիրներ այդպիսի չափավոր ընդդիմության ներկայացուցիչներին մեղադրում են իշխանությունների հետ համագործակցելու և ոչ անկեղծ ընդդիմություն լինելու մեջ:

Թևան Պողոսյանին հարցրեցինք՝ ի՞նչ վերաբերմունք ունի այդ մեղադրանքների նկատմամբ: Նա նշեց. «Նախ պարզենք՝ ի՞նչ ասել է «ծայրահեղ ընդդիմադիր»: Մեզ մոտ, ցավոք, ընդդիմադիր են անձերին, ոչ թե տեսակետներին, գաղափարներին:

Եթե մարդիկ ունեն իրենց հաշվարկները, ներկայացնում են դրանք և իրենց պատկերացումները ներկայացնում են հանրությանը, ապա պետք է ընդունել դա: Ընդունելու շրջանակը չի նշանակում, որ դու համաձայն ես:

Բայց դու պատրաստ ես պայքարելու, օրինակ՝ խոսքի ազատության համար, մարդու գործողությունների ազատության համար: Եթե մի քաղաքական ուժ մի ձևով է տեսնում հարցը, ինչո՞ւ պետք է մեկը բռնանա և դատի: Կյանքը ցույց կտա ճիշտն ու սխալը: Ես գիտեմ, որ մեղադրում է դատախազը, հաստատում՝ դատավորը: Քաղաքական գործիչը դա չպետք է անի:

Եթե դու քաղաքական գործիչ ես, ապա պետք է հասկանաս, որ ոչ միայն քո տեսակետն իրավունք ունի գոյություն ունենալ, այլ նաև ուրիշների տեսլականը: Ինձ համար անհասկանալի են այդ մոտեցումները, ես դրանց կողմնակիցը չեմ:Ես ուղղակի բարի երթ եմ մաղթում բոլոր այն ուժերին, որոնք երևան եկան այս տարի:Հուսով եմ՝ իրենք հաղթանակների կհասնեն, իսկ մենք կտեսնենք նրանց գործի արդյունքն ու պտուղները»:

Մեր զրուցակիցն այն կարծիքի է, որ առճակատումները որևէ լավ բանի չեն հանգեցնում: Պողոսյանը շեշտում է՝ եթե չենք ընդունում այսօրվա համակարգը, ապա պետք է գնալ փոփոխությունների: Նրա խոսքերով՝ գործընթացների դատավորը ժողովուրդն է, իսկ գործընթացներին կսպասենք գալիք ընտրություններին:

Մեր զրուցակիցն ասաց, որ ուրախ է պառլամենտական հանրապետությանն անցում կատարելու առթիվ: «Ընդունված է խոսել ժողովրդավարությունից և մարդու իրավունքներից:

Եթե ժողովրդավար ես, ապա պետք է ընդունես մեծամասնության դիրքորոշումը,եթե հարգում ես խոսքի ազատությունը, պետք է իմանաս, որ դիմացին էլ իրավունք ունի հակադարձ տեսակետի: Պետք է հասկանաս, որ օրենքը բոլորի համար է: Ծայրահեղ արտահայտություններն ավելի շատ պիտակավորման են նման, որը ոչ մեկին պետք չէ: Ես ինքս նման բառապաշարից հեռու եմ: Որևէ մեկը դատավոր չէ, որ ասի՝ դու այդպիսին ես կամ այսպիսին»:

Լևոն Փանոսյան