Ի՞նչ է սպասվում Աստղակերպի 12 նշաններին 2016 թվականին. աստղաբան-էզոթերիկի կանխատեսումները

168.am-ը գրում է.

 

Աստղաբան-էզոթերիկ Գուրգեն Հովհաննիսյանն այսօր հրավիրված ասուլիսին ներկայացրեց 2016թ. աստղաբանական կանխատեսումները: Նա նախ նշեց, որ Կապիկը համարվում է անկյունաքարային տոտեմ, և հինդուիզմի մեջ դա արտացոլված է Հանուման աստծո կերպարով՝ ակտիվություն, կրակային դրսևորում, նոր ուղիների հարթում. «Եվրոպական և հայկական տրադիցիաներում դա Արևն է և Առյուծը, որովհետև զոդիակի 12 նշաններից միակն է, որին ղեկավարում է հենց արեգակը:

 

Տարին սկսում է մեկնարկել Արեգակը և յոթնամյա նոր փուլ է մեկնարկում: Ընթացիկ 2015թ., էներգիաներն արդեն սպառված են, անցնում էր Մարսի ազդեցության ներքո, իսկ 2016-ը կանցնի Արեգակի ազդեցության ներքո: Ըստ Արևելյան տոնացույցի՝ տարին մեկնարկում է փետրվարի 8-ին, ինչը կապված է լուսնի շարժման հետ, իսկ ըստ մեր տրադիցիաների՝ մարտի 21-ին: Սա անփոփոխ է: Ակտիվություն ցուցաբերելու է աստղաբանական եռանկյունը՝ Առյուծը, Խոյը և Աղեղնավորը, որոնք կլինեն դոմինանտ: Տարին բավական հագեցած է լինելու և անցնելու է ճակատագրի փոփոխական նշանով, որը ցույց է տալիս անկանխատեսելի իրադարձություններ: Սա համահունչ է Ջրհոսի դարաշրջանի անակնկալ դրսևորումներին և արագ տրանսֆորմացիաներին: 2015թ. նախապատրաստման տարի էր, և այն փոփոխությունները, որոնց ականատեսը եղանք, ընդամենը նախապատրաստման փուլ էր, որը պետք է մեկնարկի 2016թ.-ից: Այդ կարճ փուլը կտևի 3 տարի՝ 2016, 2017, 2018թթ., իսկ հիմնական փուլի մեկնարկը կտրվի 2019թ.»:

 

Աստղաբանը նշեց, որ տարին բաժանվում է 5 ֆազաների. «1-ինը՝ մարտի 21-ից հունիսի 1-ը, որը կունենա իմպուլսիվ դրսևորումներ, ագրեսիա, արագ վերադասավորումներ, գեոպոլիտիկ դաշտում արագ փոփոխություններ: 2-րդ ֆազան հունիսի 2-ից օգոստոսի 2-ն ընկած ժամանակահատվածն է, որը պայմանականորեն անվանում ենք բռնկման շրջան: Այս փուլում բավականին մեծ վերադասավորումներ են սպասվում հատկապես Արևելքից, այսինքն՝ դոմինանտ կլինեն Ռուսաստանը, Չինաստանը և Հնդկաստանը: 3-րդ շրջանն օգոստոսի 3-ից հոկտեմբերի 3-ն ընկած ժամանակահատվածն է, որը պայմանականորեն անվանում ենք պայթյուն, սա, իհարկե, նեգատիվ իմաստով չէ, այլ՝ վերադասավորումների նոր փուլ է սկսվում: Այստեղ դոմինանտ կլինի Չինաստանը, իսկ Ռուսաստանն այս շրջանում կտրուկ ձևով կանցնի մրցակիցներից: Սա մեզ վրա իր խոշոր հետքը թողնելու է: 4-րդ ֆազան հոկտեմբերի 4-ից մինչև դեկտեմբերի 3-ն ընկած ժամանակահատվածն է, սա կոչվում է այրում: Այս փուլը շատ կարևոր ենք համարում, քանի որ հենց այս շրջանում են ամբողջ կուտակումներն ի մի բերվում: Բավականին հետաքրքիր դրսևորումներ կլինեն: Տարին կամփոփի վերջին՝ 5-րդ ֆազան, որը կսկսվի դեկտեմբերի 4-ից և կտևի մինչև 2017թ. փետրվարի 13-ը, սա կոչվում է ամբողջացում»:

Ըստ այս ֆազաների՝ աստղաբանը ներկայացրեց, թե ինչ է սպասվում Աստղակերպի 12 նշաններին՝ 2016թ.

 

«Խոյ– Բավականին հետաքրքիր տարի է սպասվում՝ բուռն փոփոխություններով, էմոցիաներով լի: Հատկապես 1-ին և 4-րդ ֆազաները շատ օգտակար ու բռնկուն կլինեն Խոյերի համար: Տարին հագեցած կլինի ճակատագրական իրադարձություններով, որոնք հեռու կլինեն որևէ տեսակի կառավարումից: Պետք է զգուշանալ շատ քննադատելուց, քանի որ դա կարող է Խոյերին հասցնել մարդատյացության: Քննադատելու պրոցեսից եթե Խոյերը զերծ մնան, ապա տարին կրակային եռանկյունու ներքո բավական խոստումնալից կլինի:

 

Ցուլ- Տարին հագեցած ու խոստումնալից է հատկապես խոսքի առումով՝ նոր փուլի անցման տեսանկյունից, քանի որ տարվա ընթացքում կհանդիպեք խոշոր դժվարությունների, որոնք անհրաժեշտ դժվարություններ են, և միայն դրանք հաղթահարելով՝ այս նշանը կարող է իր մեջ բացահայտել այն հատկությունները, որոնց մասին տեղյակ չէ: Տարին հագեցած է նաև բավական դրական միտումներով՝ ճանապարհորդություններ՝ ուղղակի հաճույքի, դրական էմոցիաներ կուտակելու համար: Այս առումով բավական խոստումնալից է 3-րդ ֆազան:

 

Երկվորյակներ- Յուրահատուկ հաղթանակների ու հաջողակ տարի է: Տարվա հաջողակ նշաններն են Երկվորյակներն ու Այծեղջյուրները: Բոլոր խնդիրների իրագործման և լիակատար արտահայտման համար ամենաբարենպաստ շրջանն է: Շատ բարենպաստ են 3 ֆազաները՝ 1-ին, 3-րդ և 4-րդ:

 

Խեցգետին- Շատ հետաքրքիր տարի է սպավում, քանի որ տարին լի է բացահայտումներով: Խեցգետնի նշանի տակ է գտնվում Հոլանդիան, որտեղից սպասվում են հետաքրքիր բացահայտումներ: Այն, ինչ երկար տարիներ թաքնված է եղել, այս տարի շատ ուրույն ու գեղեցիկ ձևով կբացահայտվի: Խոսքն ու հռետորությունը շատ կարևոր են Խեցգետինների համար, և հիմնական հաղթանակներն ու հաջողություններն այս գծով են շարժվում: Այս նշանի համար հաջողակ է 1-ին ֆազան:

 

Առյուծ- Բոլոր 5 ֆազաներում Առյուծը գործում է դինամիկ հաջողություններով, թերևս միակ զգուշացումն այն է, որ շատ չհանգստանան այդ ամբողջ կուտակված հաջողություններից և փորձեն մի փոքր ավելի զսպել իրենց էգոցենտրիկ կառուցվածքը, որը միշտ հատուկ է այս նշանին:

 

Կույսեր– Կույսերի և Առյուծների համար կատարյալ հաջողակ տարի է: Կույսերը նույնպես կարող են օգտվել բոլոր 5 ֆազաներից, ուղղակի մի տարբերությամբ, որ Կույսերի մոտ կարող է այդ ճակատագրի շրջված նշանն ավելի վառ արտահայտվել: Այսինքն՝ միանգամայն նոր ճակատագրական փոփոխություն:

 

Կշեռքներ- Մի փոքր դժվարություններ կզգան, քանի որ շատ բարդ տարի է սպասվում, նաև՝ հաղթանակներով լի: Ուղղակի փոփոխությունների դինամիկան մի փոքր սկեպտիկ ազդեցություն կարող է կուտակել, հետևաբար՝ մի փոքր վերլուծությունը կօգնի ավելի ճիշտ ուղղություններ գտնել: Ճակատագրական խիստ իրադարձություններ են սպասվում, որոնք հեռու կլինեն որևէ միջամտությունից:

 

Կարիճներ- Առողջության ու հոգևոր զարգացմանը միտված հոսանքներից ելնելով՝ բավականին հետաքրքիր տարի է սպասվում: Այսինքն՝ զուտ գործնական հաջողությունների համար այդքան էլ բարենպաստ տարի չէ: 2-րդ և 4-րդ ֆազաները շատ բարենպաստ են Կարիճների համար:

 

Աղեղնավորներ- Հաջող տարի է սպասվում: Կրակային եռանկյունու նշաններից մեկն է, հետևաբար՝ սիրառատ տարի է սպասվում, հաղթանակներով լի, իմունիտետն ու առողջությունը նույնպես լավ դիրքում են գտնվում: Միակ զգուշացումն այն է, որ բոլոր խնդիրները կստեղծվեն չմտածված խոսքի հետևանքով: Խոսքի հետ կապված պետք է զգուշավորություն պահպանել հատկապես 1-ին և 5-րդ ֆազաների ընթացքում:

Այծեղջյուրներ- Ինչպես նշվեց՝ Երկվորյակներն ու Այծեղջյուրները հաջողակ նշանի ներքո են, և շատ մեծ հեռանկարային իրադարձություններ կլինեն: Արագ կլուծվեն անշարժ գույքի, ընտանիքի ձևավորման ու ամրացման խնդիրները: Պետք է պահպանել ստեղծագործական ուժը, քանի որ միայն դա կիրառելով՝ նրանք կհասնեն դինամիկ հաջողությունների:

 

Ջրհոս– Հետաքրքիր ու հաջողություններով լի տարի է սպասվում՝ երկու տեսակի դրսևորումներով: Շատ զգուշավոր պետք է լինեն հատկապես 2-րդ ֆազայի ընթացքում: Ջրհոսները կդրսևորեն այն բոլոր կարողությունները, որոնք կօգնեն կոտրել բոլոր տեսակի կարծրատիպերը և դուրս գալ կաղապարներից: Միայն այս ճանապարհով այս նշանը կարող է լիարժեք հաջողակ լինել: 3-րդ ֆազան շատ հաջողակ շրջան է լինելու, և ցանկալի է օգտվել այդ շրջանից:

 

Ձկներ– Նույնպես երկակի դրսևորում է սպասվում: Ձկները միշտ երկու ընթացք ունեն՝ մեկ՝ հոսանքի ուղղությամբ, մեկ՝ հակառակ, և տարվա ընթացքում սա շատ վառ ու դինամիկ արտահայտվելու է: Հաղթանակների, էմոցիաներով հագեցած տարի է, և այստեղ հարկ է, որ կիրառվի Ձկների ինտուիտիվ զգացողությունը: Պետք է զգուշանալ 2-րդ ֆազայի ընթացքում, որովհետև հենց այդ ընթացքում են սպասվում հիմնական խոչընդոտները, իսկ հնարավոր դրսևորումները կիրառել 5-րդ ֆազայի ընթացքում և դեմ գնալ ընդհանուր հոսանքին»: