Սյունիքի մարզի Իշխանասարի հատվածում թշնամին պետական սահմանն անցել է և ևս երեք կիլոմետր առաջ եկել դեպի Վերիշեն բնակավայր, այս պահին բանակցում են. Գորիսի փոխքաղաքապետ

13:07

Tert.am-ին ՀՀ ՊՆ տեղեկատվության և հասարակայնության հետ կապերի վարչության պետ Գևորգ Ալթունյանը փոխանցեց, որ Իշխանասարում մարտեր չկան, ՊՆ-ն հայտարարություն է տարածելու:

13։06

Նման բան չկա։ Ջերմուկ համայնքի ղեկավարի տեղակալ Աշոտ Խաչատրյանը Tert.am-ի հետ զրույցում հերքեց, որ Ջերմուկի հատվածում թշնամուն հաջողվել է առաջխաղացում ունենալ:

Նշենք, որ մամուլում լուրեր են շրջանառվում, որ Սյունիքի մարզում գիշերը եղել է լարված իրավիճակ և թշնամուն հաջողվել է Ջերմուկի հատվածում, նաև Տեղ համայնքի Խնածախ գյուղի մոտ մի փոքր առաջ գալ:

13։02

Իշխանասարի հատվածում թշնամին պետական սահմանը անցել է և ևս երեք կիլոմետր առաջ եկել դեպի Վերիշեն բնակավայր ու հարյուրներով շարված են։ Այս պահին բանակցում են։  Այս մասին ֆեյսբուքյան իր էջում գրել է Գորիսի փոխքաղաքապետ Իրինա Յոլյանը:

«Սև լճի տարածքից կիլոմետրերով առաջ են եկել և կանգնել։ Եթե GPS-ով Սև լճի 30տոկոսն էր թշնամունը, սրանք էնքան են իրենց արտոնեալ համարում, որ որոշել են հասնել մինչև բնակավայր ու Շուռնուխի օրինակով առաջ գալ։

Ժողովուրդ չգիտեմ` էլի ով ինչ կհերքի, բայց լսեք սյունեցիների ահազանգը, բոլորիս վերջը գալու է, եթե շարունակենք այս վտանգավոր անտարբերությունը»,- գրել է Յոլյանը:

«Փաստինֆո»-ի հետ զրույցում Գորիսի փոխքաղաքապետ Մենուա Հովսեփյանն ասել է, որ հակառակորդը գիշերն առաջացել է Սյունիքի մարզի Իշխանասարի ուղղությամբ։ Վերջինս հերքել է տեղեկատվությունը, որ այս պահին Իշխանասարի ուղղությամբ մարտեր են ընթանում։

«Սուտ է այդ ինֆորմացիան։ Նման բան չկա։ Այս պահի դրությամբ ամեն ինչ խաղաղ է, ուղղակի նրանք շատ են առաջ եկել։ Բանակցություններ են գնում, մարտեր չեն ընթանում։ Մենք այնտեղ զինվոր չենք ունեցել, որ մարտեր լինեն։ Տարածքն ազատ է եղել, ում հետ պետք է մարտ վարեին»,-ասաց Մենուա Հովսեփյանը՝ ընդգծելով, որ հակառակորդը GPS-ով գծված սահմանից էլ առաջ են եկել։

Գորիսի փոխքաղաքապետը նշեց, որ իր տեղեկություններով բանակցությունները վարում է առաջին բանակային կորպուսը. «Կարծում ենք, որ հետ կգնան»,-հավելեց Մենուա Հովսեփյանը։