Ի՞նչն է պարզաբանում Հեռուստատեսության և ռադիոյի հանձնաժողովը. «Փաստ»

«Փաստ» օրաթերթը գրում է

«Փաստ» օրաթերթը հունիսի 15-ի համարում տպագրել էր հոդված՝ «Իշխանական տեղեկատվական էքսպանսիա. «Ֆրինյուզը» մտնում է եթեր» վերնագրով, որին արձագանքել է Հեռուստատեսության և ռադիոյի հանձնաժողովը: Նախ՝ առանց միջամտության ներկայացնենք հանձնաժողովի մեկնաբանությունը. «2021 թվականի հունվարի 15-ին Հանձնաժողովն ամփոփելով հանրային մուլտիպլեքսում սլոթի օգտագործման լիցենզավորման հանրապետական և մայրաքաղաքային սփռման մրցույթների արդյունքները, ուսումնասիրելով «Ֆրինյուզ» ընկերության ներկայացրած հայտը, նրան տվել է մայրաքաղաքային հեռարձակման լիցենզիա:

Նշենք, որ «Տեսալսողական մեդիայի մասին» ՀՀ օրենքի 58-րդ հոդվածի 5)-րդ կետի համաձայն լիցենզիավորված Հեռարձակողի՝ լիցենզիա ստանալու պահից վեց ամսվա ընթացքում տեսալսողական հաղորդումներ չհեռարձակելու դեպքում, լիցենզիայի գործողությունը կասեցվում կամ դադարեցվում է: «Ֆրինյուզ» ընկերության լիցենզիոն պարտավորության կատարման ժամկետը լրանում է 2021 թ. հուլիսի 20-ին (լիցենզիա՝ ԵՀ 298, տրված՝ 20.01.2021թ.): Միաժամանակ նշենք, որ օրենքը չի արգելում նշված ժամկետից ավելի վաղ հեռարձակում իրականացնել: Ինչ վերաբերում է այն փաստին, որ Ընկերությունը համագործակցելու է «Յուքոմ» կամ «Ռոստելեկոմ» ցանցային օպերատորների հետ, նշենք, որ այդ հանգամանքը ևս կարգավորվում է «Տեսալսողական մեդիայի մասին» օրենքի 44-րդ հոդվածի 3.-րդ կետով:

Այն է՝ «3. Հանրային մուլտիպլեքսում ներառված բոլոր տեսալսողական ծրագրերն իրենց վերգետնյա հաճախականությունների սփռման տարածքներին համապատասխան տարածման իրավունքով անվճար տրամադրվում են ցանցային օպերատորներին: Ցանցային օպերատորները պարտավոր են տարածել իրենց՝ անվճար տարածման իրավունքով տրամադրված տեսալսողական ծրագրերը: Ընդ որում, ծրագրերի հերթականությունը պետք է սկսվի Հանրային հեռարձակողների ծրագրերից»: Նման գրություն ստանալն, անկեղծ ասած, քիչ է ասել, թե տարօրինակ էր: Որպեսզի պարզ լինի տարօրինակությունը, ներկայացնենք այն նյութը, որը տպագրվել է թերթում. «Այս տարվա հունվարին Հեռուստատեսության և ռադիոյի հանձնաժողովն ամփոփեց հանրային մուլտիպլեքսում սլոթի օգտագործման լիցենզավորման հանրապետական և մայրաքաղաքային սփռման մրցույթների արդյունքները: Մայրաքաղաքային սփռման իրավունք ստացած ընկերությունների մեջ էր նաև իշխանությունների հետ ուղղակիորեն ասոցացվող «Ֆրինյուզ» հեռուստաընկերությունը: Երեկ այս կազմակերպությունը հայտարարություն տարածեց, որ հեռարձակվելու են նաև «Յուքոմի» 10-րդ ալիքով: «Ֆրինյուզը» շուտով համագործակցելու է նաև «Ռոստելեկոմի» հետ:

«Փաստ» թերթի աղբյուրները փոխանցում են, որ դեռևս գործող իշխանությունները այս ամենով չեն սահմանափակվում: Նրանք հույս ունեն, որ առաջիկա ընտրությունների արդյունքում վերարտադրվելու են, և նպատակ ունեն դրանից հետո շարունակել տեղեկատվական էքսպանսիան՝ հատկապես տեսալսողական մեդիա դաշտում: Ըստ մեր ունեցած տեղեկությունների, ներկայիս իշխանությունը ծրագրում է նոր ալիքներ հեռարձակել հեռահաղորդակցության օպերատորների և համացանցի միջոցով»: Թերթի հրապարակման մեջ «Ֆրինյուզ» ընկերության՝ ո՛չ մրցույթում շահելուն, ո՛չ եթեր դուրս գալուն, ո՛չ «Յուքոմ» ու «Ռոստելեկոմ» ընկերությունների ցանցով հեռարձակմանը որևէ գնահատական չի տրվել, օրենքների հետ կապված որևէ կասկած չի հայտնվել:

Փաստացի ներկայացվել է «չոր» տեղեկություն, որը հիմնված է նույն «Ֆրինյուզ» ընկերության կայքում հունիսի 14-ին տեղադրված հայտարարության վրա: Ուստի անհասկանալի է, թե ինչի համար է այսքան մանրամասն մեկնաբանությունը: Եթե որոշ շրջանակների անհանգստացրել է «տեղեկատվական էքսպանսիա» արտահայտությունը, ապա տեքստը ուշադիր կարդալու դեպքում կտեսնեին, որ խոսքը հետընտրական ժամանակահատվածի մասին է, ընդ որում՝ բացառապես իշխանական ուժի առումով:

Այս պարագայում արձագանքը պետք է որ իշխանություններից լիներ, այլ ոչ թե անկախ հանձնաժողովից, որի վերաբերյալ, ի դեպ, դեռևս հունվարին «Փաստն» արձանագրել էր, որ վերոնշյալ մրցույթն առավելապես անցկացվել է հիմնականում օբյեկտիվորեն: Ի դեպ, բոլոր նրանց համար, ովքեր էքսպանսիա բառն այդքան ցավոտ են ընդունել, պարզապես հավելենք, որ դա նշանակում է «ազդեցության ոլորտի ընդարձակում», «նոր տարածությունների տիրանալու քաղաքականություն»: Իսկ տեղեկատվական դաշտում գործող իշխանությունները միշտ էլ ձգտել են հենց էքսպանսիա իրականացնել ու հիմա էլ ձգտում են:

ԱՐՍԵՆ ՍԱՀԱԿՅԱՆ

Մանրամասները՝ «Փաստ» օրաթերթի այսօրվա համարում