Իսկական առաջնորդն իր ժողովրդից չի նեղանում․ Ծառուկյանը շարունակելու է աշխատել

АНАЛИТИКА 28 Июнь, 2021 12:01

Խորհրդարանական արտահերթ ընտրություններից հետո «Բարգավաճ Հայաստան» կուսակցության և նրա առաջնորդ Գագիկ Ծառուկյանի վարքագիծը վկայում է՝ իսկական առաջնորդն իր ժողովրդից երբեք չի նեղանում և միայնակ չի թողնում խնդիրներին դեմ-հանդիման։

Ընտրություններում պարտություն կրած երկու տասնյակ կուսակցությունների զգալի մասին մենք տարիներով այլևս չենք տեսնի, նրանց մասին չենք էլ լսի, նրանց գրասենյակներն ու մեծադիր պաստառները չենք տեսնի։ Այդ քաղաքական ուժերը ստեղծվել էին ընտրություններին մասնակցելու, ԱԺ-ում մանդատներ ստանալու կամ իշխանության օգտին ջուր պղտորելու համար։ Իսկ ընտրություններից հետո կանհետանան և, լավագույն դեպքում, կհայտնվեն մեկ էլ հաջորդ ընտրություններին։

Հայաստանյան քաղաքական դասի առանցքային ուժերից մեկը՝ ԲՀԿ-ն, սակայն, այդ ճանապարհով չի կարող գնալ։ Գագիկ Ծառուկյանն օրերս կուսակցական ակտիվի հետ հանդիպմանը հայտարարել է, թե «Բարգավաճ Հայաստան» կուսակցությունն այսուհետ ևս անելու է հնարավոր ամեն բան՝ մեր երկրում հետպատերազմյան ճգնաժամը հաղթահարելու համար: «2021-ի ԱԺ արտահերթ ընտրություններից հետո ԲՀԿ-ն ներգրավված չի լինելու խորհրդարանում, բայց դա չի նշանակում, որ մենք չպետք է զբաղվենք քաղաքականությամբ։ Գրասենյակները բաց են լինելու, դուք աշխատելու եք ժողովրդի հետ, կարևորը մանդատները չեն»,-դիմելով թիմակիցներին՝ ասել է Ծառուկյանը։

Նա ընդգծել է՝ այս արտահերթ խորհրդարանական ընտրությունների հիմքում դրված է եղել ատելության ու վախի մթնոլորտը։ «Դրա մեջ մենք չկանք, չենք էլ կարող լինել։ Մենք ամբողջ քարոզարշավի ընթացքում ներկայացրել ենք մեր երկրի անվտանգությունը, ժողովրդի սոցիալ-տնտեսական վիճակը և արտագաղթի կանխումը։ Ինչ ասել ենք, իրական է․ ասողին լսող է պետք։ Շարունակելու ենք մեր աշխատանքը։ Ովքեր մեզ ձայն են տվել, չեն սխալվել, կյանքը սրանով չի ավարտվում»,-ասել է նա՝ շնորհակալություն հայտնելով աջակիցներին։

Եվ իսկապես, քաղաքական որոշակի փուլերում ժողովուրդը կարող է սխալվել, ճիշտ ընտրություն չկատարել, բայց քաղաքական գործչի ֆունկցիան, հատկապես անհասկանալի իրավիճակներում իր ընտրողին, ՀՀ քաղաքացուն մենակ չթողնելն է։ Հայտարարելով, որ ԲՀԿ ակտիվությունը շարունակելու է ծառայել ժողովրդին՝ Գագիկ Ծառուկյանը ցույց է տալիս, որ իր պայքարն ու նպատակն այսքան տարի ոչ թե մանդատների կամ իշխանության մաս կազմելու համար է եղել, այլ ի շահ և ի բարօրություն Հայաստանի Հանրապետության։ Անկախ նրանից՝ հաջորդ խորհրդարանական ընտրությունները կլինեն հերթականը, թե արտահերթ, «Բարգավաճ Հայաստան» կուսակցությունն ու իր առաջնորդը մնալու են քաղաքական դաշտում, սպասարկելու են հանրային շահը, նպաստելու են երկրի վերականգնմանը։ Իսկ դա ամենակարևորն է։

Գարիկ Համբարձումյան