Հայաստանում շարունակվում են քաղաքական հետապնդումները․ «Փաստ»
ПОЛИТИКА«Փաստ» օրաթերթը գրում է
news-front.info-ն գրում է, որ վերջին խորհրդարանական ընտրություններից հետո կրկին իշխանություն ստացած Փաշինյանի թիմը, կարծես, նույնիսկ չի էլ փորձում համախմբել պառակտված հասարակությանը: Եվ դա, համենայն դեպս, տագնապալի է: Այլ բան է անձնական հաշիվներ մաքրելն իրենց պատմական հակառակորդների հետ, մեկ այլ բան է այդ ամենը տեղափոխել զուտ նեղ մասնագիտական ոլորտներ:
Դժվար թե որևէ մեկը վիճարկի այն հարցը, որ Հայաստանին ցանկալի չէ կորցնել բարձր որակավորում ունեցող կադրերին: Եվ հատկապես բժշկության ոլորտում: Ղարաբաղյան երկրորդ պատերազմից հետո կան հազարավոր վիրավորներ, հաշմանդամներ, վերջույթներ կորցրած և ծայրահեղ ծանր վնասվածքներ ստացած մարդիկ: Այդ լույսի ներքո Փաշինյանի թիմի կողմից հանրահայտ բժիշկ Արմեն Չարչյանին քրեական պատասխանատվության ենթարկելու ձգտումը, առանց չափազանցության, առնվազն անհեթեթ է թվում:
Ի վերջո, նա կատարել է հազարավոր ամենադժվար վիրահատություններ, հարյուրավոր մարդկանց է ոտքի կանգնեցրել, կյանքեր փրկել և դաստիարակել որակյալ վնասվածքաբանների սերունդներ: Նման մասնագետները, սկզբունքորեն, իրենց քաշին հավասար ոսկի արժեն: Մինչդեռ Չարչյանին փորձում են ազատազրկել «ականջներից քաշած և երկարացված» մեղադրանքներով: Այո, հրապարակվել են ձայնագրություններ, որտեղ նա ինչ-որ մեկին հորդորում է գնալ ընտրությունների:
Բայց որքանով մեզ հայտնի է, այդ ձայնագրություններում չկա կոնկրետ թեկնածուի օգտին քվեարկելու որևէ կոչ: Հուսանք, որ երկրի համար շատ դժվար և ցավոտ ժամանակահատվածում իրենց իշխանությունը երկարացրած քաղաքական գործիչները կունենան բավական հեռատեսություն, որպեսզի չդիպչեն բարձր որակավորում ունեցող այն մարդկանց, ովքեր, լինելով իրենց ոլորտի մասնագետներ, կարող են օգուտ տալ ողջ ժողովրդին:
Մանրամասները՝ «Փաստ» օրաթերթի այսօրվա համարում