Նոր ձեռնարկ՝ «Հաղորդակցության մարտահրավերները տեղեկատվական հասարակությունում». «Փաստ»

«Փաստ» օրաթերթը գրում է

Սոցիոլոգ, մարքեթինգային հաղորդակցությունների առաջատար մասնագետ Լիլիթ Շաքարյանը, որը վերջերս ներկայացրեց «Բրենդի կառավարում» առաջին հայալեզու մասնագիտական գիրքը, ընթերցողներին երկար սպասել չի տալիս և ներկայացնում է նոր՝ «Հաղորդակցության մարտահրավերները տեղեկատվական հասարակությունում» ձեռնարկը: Օրերս հեղինակը լրագրողների հետ ջերմ ու անմիջական մթնոլորտում խոսեց գրքի մասին, ներկայացրեց, թե ինչ հիմնական թեմաներ են ընդգրկված դրանում և ում օգտակար կարող է լինել այս ձեռնարկը: Զրույցին ներկա էր նաև «Փաստի» լրագրողը:

Ձեռնարկը ներառում է երեք գլուխ: Առաջին՝ «Տեղեկատվական հեղափոխություն ու տեղեկատվական հասարակություն» գլխում ներկայացված են նախ «Տեղեկատվական հասարակություն» հայեցակարգի զարգացման տեսական հիմքերը և դասական տեսաբանների դիտարկումները, այնուհետև՝ ժամանակակից տեսություններ և մոտեցումներ: Երկրորդ՝ «Զանգվածային հաղորդակցության գործառնական առանձնահատկությունները» գլխում հեղինակը խոսում է ԶԼՄում քաղաքական ազդեցության տեխնիկաների մասին, ներկայացնում լրատվամիջոցների կողմից կիրառվող քաղաքական մանիպուլ յացիաների մեխանիզմները: Նշում է՝ մեդիամիջավայրը կամ մեդիան այսօր միջնորդ է, որը ստեղծում է «կեղծ իրականություն» կամ իրականության զուգորդություն:

«Խոսքն այն մասին չէ, որ տեղեկատվությունը կեղծվում է, այլ այն, որ տեղի է ունենում վերարտադրում, որն ինքնին իրականությունը չէ: Նման օրինակ բերեմ՝ քարտեզը վերարտադրում է տարածությունը, բայց այն ինքնին տարածությունը չէ: Մեդիան նույն դերում է՝ այն զուգորդում է իրականությունը, բայց ինքնին իրականությունը չի արտացոլում: Երրորդ գլխում անդրադարձել եմ մեդիագրագիտության կարևորությանը, կեղծ լուրերին: Խոսել եմ նաև «հետճշմարտության իրականություն» երևույթի մասին, այսինքն՝ իրականություն, որում զգացողությունները գերակշռում են փաստերին»,-ձեռնարկը ներկայացնելով՝ ասում է դրա հեղինակը: Նշում է՝ այսօր մենք ապրում ենք տեղեկատվական հասարակությունում:

«Հասկանում ենք, որ լուրջ իրադրություններ, հաղորդակցային կարևորագույն տարրեր և ինֆորմացիոն տեխնոլոգիաներ հանգեցրել են նրան, որ իրականությունը, որում այսօր ապրում ենք, շատ է փոխվել: Այն կարելի է բնութագրել որպես մեդիահագեցած իրականություն, իրականություն, որում պատկերները, հնչյունները, զգացողությունները շատ ավելի մեծ դեր ու նշանակություն են ստանում, քան ինքնին փաստերը և տեխնոլոգիաները: Այս գիրքը շատ ավելի նեղ մասնագիտական է, քան նախորդը: Դրանում բավականին տեսական վերլուծություններ են արված: Վստահաբար այն կարող է օգտակար լինել շատերին»,-հավելում է Շաքարյանը: Ի դեպ, ձեռնարկը նախատեսված է տեղեկատվական ոլորտի փորձագետների, ուսանողների և տեղեկատվական խնդիրների հետ առնչվող լայն հանրության համար:

Մանրամասները՝ «Փաստ» օրաթերթի այսօրվա համարում