«Ճամփորդենք Խաչատրյանի հետ» անիմացիոն ֆիլմը կպատմի մաեստրոյի շրջագայությունների և հանրահայտ մարդկանց հետ հանդիպումների մասին․ «Փաստ»

«Փաստ» օրաթերթը գրում է

«Մեր երկրում բոլոր թանգարանները, ելնելով իրենց յուրահատկություններից, մերը՝ հիմնականում երաժշտական առումով, ջանում է այցելուներ «բերել» թանգարան: Սա անում ենք կրթական ծրագրերի, երաժշտական յուրահատուկ միջոցառումների, գիտական աշխատանքի, հրատարակությունների միջոցով: Բավականին ակտիվ ենք սոցիալական ցանցերում, ունենք մեծ թվով հետևորդներ: Թանգարանի աշխատակիցները մասնակցում են տարբեր ձեռնարկների թե՛ Հայաստանում, թե՛ Հայաստանից դուրս»,-«Փաստի» հետ զրույցում ասում է Արամ Խաչատրյանի տուն-թանգարանի տնօրեն, դաշնակահարուհի, Կոնսերվատորիայի պրոֆեսոր Արմինե Գրիգորյանը:

«Ամեն ինչ անում ենք, որպեսզի հետաքրքրությունը պահպանվի թանգարանի նկատմամբ, մարդիկ չսահմանափակվեն միայն մեկ այցելությամբ և թանգարանը մի յուրահատուկ միջավայր դառնա իրենց համար»,-նշում է մեր զրուցակիցը: Թանգարանը պետական ոչ առևտրային կազմակերպություն է: «Մեր վերադասը ԿԳՄՍ-ն է: Ունենք պարտավորություններ պետության առջև, միևնույն ժամանակ որոշ գործառույթներ իրենց վրա են վերցնում պետական գերատեսչությունները: Միայն պետական աջակցությամբ չենք սահմանափակվում: Դիմել ենք և շարունակում ենք դիմել հովանավորների թե՛ Հայաստանում, թե՛ մեր երկրի սահմաններից դուրս: Իհարկե, դա դյուրին բան չէ: Պետք է կարողանաս հովանավորներին ապացուցել, որ հատկացվող միջոցները ճիշտ ուղղությամբ են ծախսվում, ծառայում են իրենց նպատակին, որ կարողանաս հաջորդ անգամ բաց ճակատով իրենց դիմել: Թանգարանում առկա հարցերը տարաբնույթ են՝ թե՛ տնտեսական, թե՛ գեղարվեստական՝ փառատոնների, ցուցահանդեսների և այլ միջոցառումների կազմակերպում»:

Այն մասին, որ մշակութային կյանքը հիմնականում Երևանում է կենտրոնացած, շատ է խոսվում, ասվում է, որ մարզերը մնում են ստվերում: «Մեր թանգարանն, օրինակ՝ իր կրթական ծրագրերը «տանում է» Երևանից դուրս: Դրանք իրականացվել են ոչ միայն մարզերում, այլ նաև Արցախում, ընդ որում՝ հանդես ենք եկել ոչ միայն կրթական ծրագրերով, այլ նաև ցուցահանդեսներով: Որպես երաժիշտ՝ Խաչատրյան տրիոյի կազմում տարիներ շարունակ մարզային բազմազան այցեր ենք իրականացրել»,-ասում է Գրիգորյանն՝ ընդգծելով, որ տարաբնույթ միջոցառումներ կազմակերպելով՝ հետաքրքրություն են առաջացնում թե՛ թանգարանի, թե՛ երաժշտության ու մշակույթի հանդեպ առհասարակ:

Օրերս Արամ Խաչատրյանի տուն-թանգարանը հանդես եկավ իր նոր ծրագրով: «Մշակութային հանրությանը ներկայացնում ենք տուն-թանգարանի ևս մեկ նախագիծ՝ «Ճամփորդենք Խաչատրյանի հետ» անիմացիոն քառալեզու ֆիլմը: Ֆիլմը նկարահանվել է ՀՀ ԿԳՄՍ նախարարության աջակցությամբ: Այն պատմում է Արամ Խաչատրյանի ճամփորդությունների, նշանավոր մարդկանց հետ հանդիպումների մասին: Մաեստրոն եղել է հիսունից ավելի երկրներում, հանդիպել հանրահայտ մարդկանց, տեղի հայ համայնքի ներկայացուցիչների հետ: Այս ֆիլմում ներկայացրել ենք Խաչատրյանի յոթ երկիր կատարած այցերը և այնտեղ կայացած հանդիպումներից փոքրիկ դրվագներ»,-ասում է թանգարանի հանրահռչակման բաժնի ղեկավար Աննա Ասոյանը:

Տարիներ շարունակ թանգարանն իրականացնում է կրթական բազմազան ծրագրեր: ««Հնչյուններ և գույներ», «Դասական երաժշտությունը մուլտֆիլմերում», «Ինչպես են ստեղծվում երաժշտական գործիքները», «Մեր Խաչատրյանը» և այլ կրթական ծրագրեր ծանոթ են բոլոր նրանց, ովքեր հաճախ լինում են մեր թանգարանում: «Ճամփորդենք Խաչատրյանի հետ» ծրագրի շնորհիվ, որի մաս է կազմում նաև անիմացիոն ֆիլմը, քարտեզի միջոցով ծանոթացնում է Արամ Խաչատրյանի շրջագայություններին, հանրահայտ կերպարներին՝ Հռոմի պապին, Չառլի Չապլինին, Էռնեստ Հեմինգուեյին և այլոց:

«Լեզուներ և մշակույթ» կրթական ծրագրի դեպքում խոսքը լեզվի ակումբի մասին է, որտեղ ռուսերենով և անգլերենով կազմակերպվում են ֆիլմի դիտումներ, քննարկումներ, վիկտորինաներ: Բոլորին հրավիրում ենք մասնակից դառնալ մեր երկու կրթական ծրագրերին՝ «Երաժշտական կինոթատրոնին», երբ մեր այցելուները կդիտեն ֆիլմը, այնուհետև շրջայց կկազմակերպենք թանգարանով, և «Լեզուներ և մշակույթ» ծրագրին, որի ընթացքում կլինի ֆիլմի դիտումը, մրցույթ-խաղ և հյուրասիրություն»,-հավելում է թանգարանի հանրահռչակման բաժնի ավագ գիտաշխատող, կրթական ծրագրերի համակարգողիրականացնող Լենա Միսակյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում