Սերժ Սարգսյանը կկտրի՞, թե՞ կձգի

Այսօր երեկոյան Սերժ Սարգսյանը ՀՀԿ գործկոմի նիստ է անցկացնելու, որը հերթական նիստն է, սակայն տեղի է ունենալու, բնականաբար, արտակարգ պայմաններում՝ կապված Հայաստանում ծավալվող քաղաքացիական շարժման հետ, որն ուղղված է էլեկտրաէներգիայի թանկացման դեմ:

Սրան զուգահեռ՝ ակնհայտ է նաև, որ Հայաստանում ստեղծված իրավիճակը ստացել է ավելի լայն, արտաքին դրսևորումներ՝ ուղղակի, թե անուղղակի:

Սերժ Սարգսյանը նախօրեին Բրյուսելում էր, իսկ մինչ այդ էլ Հայաստանի վրա քարոզչական մեծ ճնշում է բանեցրել Ռուսաստանը՝ հայաստանյան իրադարձությունները ներկայացնելով որպես «մայդանային» զարգացումներ՝ ակնհայտորեն խեղաթյուրելով իրականությունը և, ամենայն հավանականությամբ, խեղաթյուրելով ոչ պատահական:

Իրավիճակի զարգացմանը հետևում են նաև արևմտյան դիվանագիտական ներկայացուցչությունները: Եվ այս ամենը ըստ էության նաև սպասելի է, քանի որ Հայաստանում արդեն մի քանի օր շարունակ ծավալվում է քաղաքացիական պայքար, որը ուժի կիրառումից հետո ոչ միայն չմարեց, այլև բռնկվեց նոր ուժով:

ՀՀԿ գործկոմի նիստը անցկացվելու է ահա այս պայմաններում: Սակայն այս երկու ասպեկտից բացի՝ կա նաև երրորդը, որը երևի թե առավել մոտ է ՀՀԿ-ի «շապիկին»: Ակնհայտ է, որ սուր ծավալումներ են առկա նաև իշխանության ներսում: Այսօր իրավիճակի վերաբերյալ արտահայտվել է կամ ավելի ճիշտ՝ «սպառնացել» է արտահայտվել երկրորդ նախագահ Ռոբերտ Քոչարյանը, որի խոսնակը հայտարարել է, որ նա չի ցանկանում խոսել այժմ և լարել առանց այդ էլ լարված իրադրությունը, սակայն առաջիկայում անպայման կարտահայտի իր մոտեցումները և այս, և այլ հարցերի վերաբերյալ:

Փաստորեն Ռոբերտ Քոչարյանը հիշեցրել է իր մասին, ըստ որում՝ ակնարկով, որ ոչ միայն այս թեման է իրեն հետաքրքրում, այլև ընդհանրապես իրավիճակը:

Այդ հիշեցումը, անկասկած, ուղղված է նաև իշխանական տարբեր թևերի, որոնց միջև խորանում է պայքարը ընտրական առաջիկա ցիկլի համար: Ռոբերտ Քոչարյանին այստեղ պետք է որևէ կերպ մասնակցություն, և չունենալով սեփական կուսակցություն՝ նա պետք է փորձի շահընկերներ գտնել այլ ուժերի մեջ:

Միաժամանակ, Հայաստանում ծավալվող շարժման ֆոնին ներիշխանական լարվող հակադրության մասին է վկայում կապի ու տրանսպորտի նախարար Գագիկ Բեգլարյանի հայտարարությունը այն մասին, որ Բաղրամյան փողոցում ինչ-որ մարդիկ փորձում են իրենց վարկանիշը վերականգնել, դիվիդենդներ ձեռք բերել: Ովքեր են այդ մարդիկ, ում նկատի ունի Բեգլարյանը՝ չի մանրամասնվում, սակայն մի բան պարզ է, որ Բեգլարյանն այստեղ արտահայտում է Հովիկ Աբրահամյանի տրամադրությունները, որի վկայությունը այն է, որ Բեգլարյանը կրկնում է սակագնի թանկացման հիմնավորվածության մասին Աբրահամյանի նախօրեի թեզերը:

Սրան զուգահեռ՝ նախօրեին մեկ այլ հետաքրքրական կարծիք է հայտնել ՀՀԿ խմբակցության ղեկավար Վահրամ Բաղդասարյանը՝ խոսելով այն մասին, որ սակագինը կարող է վերանայվել ՀԷՑ-ի սեփականատիրոջ փոփոխության դեպքում: Ըստ էության առաջին անգամ իշխանությունները խոսում են այս մասին որևէ մակարդակով՝ թեկուզ տեսական մասով:

Իսկ այստեղ էլ առաջ է գալիս ՀՀԿ-ի ներսում մեկ այլ՝ բավական ազդեցիկ և առնվազն ֆինանսատնտեսական առումով մեծ պոտենցիալ ունեցող գործոն՝ ի դեմս Կարեն Կարապետյանի, որը ռուսաստանցի միլիարդատեր Սամվել Կարապետյանի եղբայրն է: Հենց Կարապետյաններն են ամիսներ շարունակ դիտվում ցանցերի նոր հավանական գնորդներ, իսկ օրերս էլ տեղեկություններ տարածվեցին, որ նրանք պայմանավորվել են «Ինտեր ՌԱՕ»-ի հետ: Կարապետյանները այդ տեղեկությունները չեն շտապում հերքել:

Սրան զուգահեռ՝ հայտնի է նաև, որ նրանք բավական երկար ժամանակ քաղաքական հավակնություններ են տածում Հայաստանի ներքաղաքական կյանքի հանդեպ, և առաջիկա ընտրական ցիկլում Կարապետյանները պատրաստվում են արդեն քիչ թե շատ նշանակալից ծավալով իրացնել այդ հավակնությունները:

Այս իրավիճակում Ռոբերտ Քոչարյանը կարող է ակնկալել որևէ թևի հետ նախընտրական գործարք: Միևնույն ժամանակ Սերժ Սարգսյանն էլ ակնկալում է կառավարել իշխանությունը նմանօրինակ հակասությունների վրա:

Այս ամենով հանդերձ՝ Հայաստանի քաղաքացիներն իրենց հաստատակամությամբ խառնել են շատերի, գրեթե բոլորի խաղաքարտերը: Միևնույն ժամանակ, Սերժ Սարգսյանը մյուսների հանդեպ առավելություն ունի ըստ էության այն տեսանկյունից, որ ի պաշտոնե ավելի մոտ է կանգնած առավել գլոբալ միջազգային պրոցեսներին, որոնց ազդեցությունը Հայաստանի վրա, իհարկե, գերակա է:

Այս պայմաններում որքանով է հավանական, որ ՀՀԿ գործկոմի այսօրվա նիստում Սերժ Սարգսյանը որևէ կերպ որևէ դիրքորոշում կհայտնի ստեղծված իրավիճակի կապակցությամբ և կհրապարակի իր որոշումը: Դրա հավանականությունն, իհարկե, ավելին չէ, քան հավանականությունը այն բանի, որ բարդ իրավիճակում, ներիշխանական խաչաձև հոսանքների և աշխարհաքաղաքական բարդ դիմակայության արանքում հայտնված Սերժ Սարգսյանը կփորձի ձգել իր որոշումը հնարավորինս երկար և օգտագործել այդ ժամանակն ու «անորոշությունը» ներքին ու արտաքին հարցերի համար, եթե նույնիսկ նա կայացրած որոշում ունի և մնում է միայն հրապարակելը: