«Մենք պարզապես չէինք ճանաչում Գևին այսպիսին»․ Արևիկ Գևորգյանի և Գևորգ Գրիգորյանի ռոմանտիկ հոլովակը

Դերասանուհի Արևիկ Գևորգյանն ու դերասան Գևորգ Գրիգորյանը ռոմանտիկ հոլովակ են ներկայացրել Անի Առաքելյանի «Եկել եմ, մնամ» ստեղծագործության հիման վրա։ Արևիկի հետևորդները գիտեն, որ դերասանուհին պարբերաբար կարդում է տարբեր հեղինակների ստեղծագործություններ, Գևորգի երկրպագուների համար սա անսպասելի նորություն էր։

Արևիկը Tert.am Life–ին պատմել է համագործակցության և Գևորգին նոր կողմից բացահայտելու մասին։

«Մեզ բոլորիս թվում էր, թե ասմունքն անհամատեղելի է Գևի կերպարի հետ, քանի որ մենք չենք ճանաչում նրան։ Իրականում նա շատ էմոցիոնալ է, խորը հոգի ունի։ Ինձ ևս թվում էր, թե նա չի կարդում, պարզվեց՝ կարդում է, բայց իր համար։ Կարդալը նոր երևույթ չէ նրա համար, պարզապես մենք ենք միայն հիմա բացահայտում այսպիսի Գևորգի: Նա ինձ ցույց տվեց պատերազմի մասին իր կարդացած գործերից մեկը։ Դա իսկապես շատ գեղեցիկ էր»,– ասաց Արևիկն ու հավելեց, որ համագործակցության միտքն իրենն է եղել։

«Այս աշխատանքը դեռ մեկ տարի առաջ պետք է կարդայի, անընդհատ ձգձգվում էր․ մեկ օպերատորի հետ էինք աշխատանքային անհամաձայնություն ունենում, մեկ այլ հարց էր առաջ գալիս։ Մի քանի անգամ նկարահանման օր ենք որոշել և չեղարկել։ Արդեն անհարմար էի զգում հեղինակի՝ Անիի առաջ։ Հետո հասկացա, որ չեմ ուզում մենակ կարդալ այս գործը, այն երկուսի մասին է։ Երկար մտածում էի՝ ո՞ւմ հետ կարելի է կարդալ։ Տասնյակ դերասանների տարբերակներ եմ դիտարկել, երբ միտս եկավ Գևորգը, հասկացա, որ կամ նրա հետ կկարդամ, կամ չեմ կարդա։ Գրեցի իրեն, համաձայնեց, բայց անընդհատ ձգձգվում էր հանդիպումը։ Ժամանակ առ ժամանակ ինքը կորչում էր։ Արդեն մտածում էի՝ չենք նկարահանեի, բայց այս անգամ չհանձնվեց ռեժիսոր Եղիշե Սողոմոնյանը»,– պատմեց դերասանուհին։

Հակառակ նախնական փուլի՝ բուն նկարահանումները և աշխատանքային ընթացքը շատ հարթ են անցել․ «Թիմի օրգանիկ աշխատանքը շատ կարևոր է։ Մենք բոլորս նույն կերպ էինք տեսնում և զգում այս գործը։ Սովորաբար ես ներկա եմ լինում մոնտաժին, քանի որ միշտ լինում է պահ, երբ ես կադրն այլ կերպ եմ տեսնում։ Այս անգամ նկարահանման ընթացքն արդեն այնքան օրգանիկ էր, որ վստահ էի արդյունքի վրա։ Մոնտաժի օրը ես նկարահանման էի, խնդրեցի իրենք սկսեն մոնտաժել, ես կմիանամ։ Փորձը ցույց տվեց, որ իսկապես որքան օրգանիկ նկարահանվել էր նյութը, նույն կերպ եղավ մոնտաժի ընթացքը»։

Հոլովակում նկարահանվել են նաև Արմինե Հակոբյանն ու Տիգրան Բարսեղյանը: Արևիկը խոստովանեց, որ թեմայի ընտրությունը ռիսկային էին համարել։

«Հոլովակի ընկալումը ֆլիրտի և մեծ սիրո սահմանին է, մեզ համար շատ կարևոր էր, որ ընկալվի մեծ սերը, ոչ թե ֆլիրտ, որ երկու հոգի կողակից ունեն, բայց այլ մարդու մասին են մտածում։ Մենք տեսնում ենք 2 զույգի, որոնք իրար հետ են, բայց իրենց անհետաքրքիր է միասին, ձանձրույթ է հարաբերություններում, խոսելու ոչինչ չունեն։ Այս ֆոնին ծնվում է շատ մեծ զգացմունք ՝2 հոգու հետաքրքիր է իրար հետ լինել, նրանք գիտեն՝ ինչ խոսել իրար հետ, զգում են իրար։ Ես էլ, Գևն էլ, Եղիշեն էլ մտավախություն ունեինք, որ հոլովակը սխալ պրոպագանդա չընկալվի։ Ուրախ եմ, որ այդ նուրբ սահմանն ընկալվեց։ Հոլովակը մեծ սիրո մասին է»,– եզրափակեց դերասանուհին։