Արտաշատի թատրոնը հագեցած խաղացանկով նշեց 83-րդ թատերաշրջանը

 Արտաշատի Ամո Խարազյանի անվան պետական դրամատիկական թատրոնն այս տարի նշեց իր 83-րդ թատերաշրջանը Կլոդ Մանիեի «Օսկար» ներկայացմամբ: Խարազյանցիները ողջ տարվա ընթացքում խաղացել է նաեւ Շառլ Պերոյի «Կոշկավոր կատուն», երկու վերականգնված ներկայացում` «Խաղում ենք Թումանյան» եւ «Գարնիեր ֆրանսիական ձեւով»: Ողջ ապրիլ ամիսը հայտարարվեց  Ցեղասպանության 100-րդ տարելիցին նվիրված միամսյակ: Այդ ընթացքում թատրոնը հանդիսատեսի դատին հանձնեց ցեղասպանության թեմայով երկու նոր պրեմիերա (Մարկ Արենի «Վայրի վարդերը» եւ Սեւակյան թեմաներով «Ողբամ մեռելոց, կոչեմ ապրողաց» բեմադրությունները (գեղարվեստական ղեկավար ՀՀ վաստակավոր գործիչ Հայկ Մնացականյան):

«Արմենպրես»-ի թղթակցի հետ զրույցում թատրոնի տնօրեն Գեղանուշ Սայադյանն ասաց, որ ավանդույթի համաձայն, այս տարի եւս ունեն ամանորյա նոր ներկայացում` մարզաբնակ փոքրիկների համար: «Մենք ամեն տարի ունենում ենք նոր ներկայացում: Փոքրիկները մեր մշտական հանդիսատեսն են, եւ մեր դերասանական անձնակազմի ամենասիրելի կոնտինգենտը, որոնց համար մեծ սիրով յուրաքանչյուր տարի բեմադրվում է նոր ներկայացում: Նրանց երբեք չի կարելի խաբել, ամանորյա հրաշքն ամեն տարի նորովի եւ յուրովի ենք մատուցում»,-ընդգծեց թատրանի տնօրենը:

Մինչ դեկտեմբերի վերջը կշարունակվեն ամանորյա ներկայացումները` օրական երեք ներկայացմամբ, իսկ վերջին օրը` ինչպես ամեն տարի, կլինի «Բաց դռների օր»` սոցիալապես անապահով եւ հաշմանդամ երեխաների համար: Ամանորյա ներկայացումները կշարունակվեն նաեւ հաջորդ տարի:

«Մենք աշխատում ենք հիմնականում դպրոցականների համար, եւ մեր նպատակն է այս եղանակով «պատրաստել» մեր վաղվա հանդիսատեսին, սերմանել հարգանք եւ հետաքրքրություն բեմական արվեստի նկատմամբ»,-ասաց նա: Տնօրինությունը նախատեսել է ամանորյա շուրջ  25 ներկայացում: Ենթադրվում է, որ այս օրերին թատրոն կհաճախի դպրոցական եւ նախադպրոցական տարիքի 7 հազար երեխա:

Մինչեւ դեկտեմբեր ամիսը թատրոնն ունեցել է ավելի քան 11 հազար հանդիսատես: Երկու անգամ թատրոնը հյուրընկալել է «Թատրոն 8»-ի անձնակազմին, որոնց ներկայացումներին հաճույքով է ներկա եղել Արտաշատի հանդիսատեսը:

Թատրոնն այսօր ունի հրաշալի, համախմբված դերասանական «կորիզ», որը հաղթահարում է ցանկացած բարդ ու դժվարըմբռնելի տեսարան:

Վերջին տարիներին դերասանական կազմը համալրվել է շնորհալի եւ տաղանդաշատ երիտասարդներով: Դերասանական անձնակազմի 20-ից 5-ն ավագ սերնդի ներկայացուցիչներ են: Արտիստներից չորսը վաստակավոր դերասաններ են:

«Գրետա Գալստյանը, Վոլոդյա Հովհաննիսյանը եւ մյուսները մեր հիմնասյուներն են, որոնք յուրաքանչյուր օր երիտասարդներին են հաղորդում իրենց փորձը, վաստակը: Առանց նրանց դժվար է պատկերացնել Արտաշատի թատրոնը: Հանդիսատեսը սովոր է մշտապես նրանց տեսնել»,-նկատեց Սայադյանը:

Որպես մարզային մշակութային օջախ՝ այսօր Ամո Խարազյանի անվան պետական դրամատիկական թատրոնը բավականին ակտիվ գործունեություն է ծավալում: Յուրաքանչյուր տարի խաղում են ավելի քան 70 ներկայացում: Պարբերաբար թարմացվում եւ հարստացվում է թատրոնի խաղացանկը` բեմադրվում նոր ներկայացումներ կամ վերականգնվում հին, սիրված ներկայացումները: Յուրաքանչյուր տարի հանդիսատեսի դատին է հանձնվում 3-4 պրեմիերա:

Ամո Խարազյանի անվան պետական դրամատիկական թատրոնը, շնորհիվ կենտրոնական ջեռուցման համակարգի, գործում է ողջ տարին: Խոսելով հիմնախնդիրների մասին՝ Սայադյանն ընդգծեց, որ 83-ամյա թատրոնում այսօր շատ վատ վիճակում են ձայնալուսային սարքավորումները: Դրանք արդեն ծառայել են մի քանի տասնյակ տարիներ, ֆիզիկապես ու բարոյապես բոլորովին մաշված են: «Այնուամենայնիվ, մենք մեկ օր անգամ չենք դադարեցնում փորձերը, աշխատում ենք եղած հնարավորությունները լավագույնս օգտագործել», - ասաց նա: Անդրադառնալով շենքային պայմաններին՝ թատրոնի տնօրենը նշեց, որ դրան ք այնքան էլ վատ վիճակում չեն, չնայած որ վերանորոգումը կատարվել է վաղուց:

Նախորդ տարիներին թատրոնը հանդես էր գալիս նաեւ հյուրախաղերով` հանրապետության տարբեր մարզերում, ԼՂՀ-ում, բայց այսօր նման շրջագայությունների համար չի հատկացվում ֆինանսավորում, չունեն նաեւ տրանսպորտային միջոցներ:

Լիլիթ Մաճկալյան