«Ջերմուկ Գրուպ» ընկերությունը իր մանկական «Բյուրեղ» ապրանքանիշով շարունակում է առողջ փոքրիկ ամանորյա արշավը

«Ապագան կանխարգելիչ բժշկությանն է պատկանում: Պետականության հետ ձեռք ձեռքի տալով այդ գիտությունը, անկասկած, մեծագույն օգուտ կբերի մարդկությանը» Ն. Ի. Պիրոգով «Ջերմուկ Գրուպ» ընկերությունը, մեծերի և փոքրերի առողջության մասին մշտապես հոգ տանելու իր առաքելությանը հետամուտ լինելով, հերթական՝ օգտակար և զվարճալի անակնկալը մատուցեց իր փոքրիկ սպառողներին: Մայրաքաղաքի գրեթե բոլոր բուժական մանկական հաստատություններում «Ջերմուկ Գրուպ»-ի շնորհիվ ամանորյա հանդեսները վերածվեցին և՛ առողջարար, և՛ ուրախությամբ լի շոուների:

Անիմացիոն երգն ու պարը, պղպջակներով զվարճալի շոուն, հետաքրքրաշարժ խաղերն ու մրցումները համեմված էին երեխաների առողջության համար կենսականորեն անհրաժեշտ կանխարգելիչ բժշկական հարուստ տեղեկատվությամբ: Խաղերի միջոցով երեխաները ծանոթացան իմունիտետն ու ինտելեկտը զարգացնելու և պահպանելու համար անհրաժեշտ միջոցներին, բացահայտեցին առողջ ատամնաշարով ժպիտ ունենալու «գաղտնիքները»:

«Յուրաքանչյուր մարդու, ինչպես նաև հասարակության համար չկա ավելի մեծ արժեք, քան առողջությունն է: Եվ, իհարկե, գաղտնիք չէ այն փաստը, որ այդ անգին պարգևն ավելի դյուրին է պահպանել հիվանդությունները կանխարգելելով, դրանք չհասցնելով բուժման սահմանագծին: Այսօր, առավել քան երբևէ, ավելացել է մարդու բժշկական մշակույթին տիրապետելու դերը, որն ընդհանուր մշակույթի կարևոր մասն է կազմում: Բժշկական մշակույթը համապատասխան գիտելիքների և հմտությունների որոշակի նվազագույն առկայություն է ենթադրում: Մեր ընկերությունը մեզնից յուրաքանչյուրի՝ սեփական առողջության պահպանմանն առնչվող գիտակցաբար գրագիտության դաստիարակությունն է հատկապես կարևորում: Այդ իսկ պատճառով, մարդկանց առողջության մասին մշտապես հոգ տանելու իր առաքելության շրջանակներում, «Ջերմուկ Գրուպ» ընկերությունը ստանձնել է բնակչության շրջանում առողջարար և կանխարգելիչ-տեղեկատվական միջոցառումների անցկացման պատասխանատու գործընթացը: Թիրախում, իհարկե, աճող սերնդի առողջության պահպանությունն է: Պատահական չէ, որ մեր արշավը մանկական օղակի բժշկական հաստատություններից սկսեցինք»,- Past.am-ի հետ զրույցում նշեց ընկերության բժշկական ուղղության ներկայացուցիչ Լիլիթ Օհանյանը:

«Հիմնվելով բնակչության առողջության մասին հոգալու փիլիսոփայության վրա՝ մեր ընկերությունը զգալի ներդրումներ կատարեց մանկական «Բյուրեղ» ապրանքանիշի արտադրությունում` սկիզբ դնելով ոչ միայն որակյալ, այլև երեխաների առողջության համար հատկապես կարևոր տարրերով հագեցված բարձր կարգի խմելու ջրի արտադրության մշակույթին: Երեխաների համար արտադրվող այս ջրին անհրաժեշտ չափաքանակով յոդ և ֆտոր է ավելացվում»,- Past.am-ի հետ զրույցում նշեց ընկերության մարկետինգի բաժնի ղեկավար Լիլիթ Նավասարդյանը:

«Յոդի սակավության տեսակետից Հայաստանը էնդեմիկ օջախ է: Դա մեծապես պայմանավորված է շրջակա միջավայրում՝ հողում, օդում, ջրում, ինչպես նաև սննդի մեջ այդ միկրոտարրի ոչ բավարար քանակությամբ: Դրա հետևանքով տառապում է վահանաձև գեղձը, որի ծավալի մեծացում էտեղի ունենում (խպիպ), կարող է մտավոր և ֆիզիկական թերի զարգացում դիտվել: Մյուս կողմից, հետազոտություները ցույց են տվել, որ Հայաստանի տարբեր մարզերի 6-7 տարեկան երեխաների շրջանում ժամանակավոր ատամների կարիեսի զարգացումը 74-100%-ի է հասնում, իսկ մշտական ատամներինը՝ մինչև 43%-ի: Կարիեսի առաջնային կանխարգելման միջոցառումների առավել կարևոր օղակն է առաջին հերթին բնակչության հիգիենիկ դաստիարակությունը, բերանի խոռոչի հիգիենայի կանոններին ծանոթանալը և կիրառելը: Այդ իսկ պատճառով «Ջերմուկ Գրուպ» ընկերությունը ոչ միայն ամբողջ աշխարհում որպես կարիեսի կանխարգելման հիմնական միջոցներից մեկը հանդիսացող ջրի ֆտորացում է իրականացնում, այլև իր փոքիկ սպառողների շրջանում նմանատիպ միջոցառումների շնորհիվ բերանի խոռոչի հիգիենայի կանոններն է փորձում հնարավորինս արմատավորել»,- Past.am-ի հետ զրույցում նշեց ընկերության բժշկական ներկայացուցիչը:

Նոր տարում ընդունված է միմյանց ամենակարևորը, լավագույնն ու անհրաժեշտը մաղթել: «Ջերմուկ Գրուպ» ընկերությունն իր «Բյուրեղ» մանկական ջուր ապրանքանիշով Հայաստանի և աշխարհի բոլոր երեխաներին մաղթում է ամուր առողջություն: Մեր ապագան մեր երեխաներն են: Թող ոչ մի երեխա երբևէ չհիվանդանա և բոլորի օջախները լցված լինեն մանկական առողջ և երջանիկ ծիծաղով:

Նարեկ Միրզոյան / Past.am