Հայկական բեռնատարները կանգնած են մնացել Լարսի ճանապարհին, մթերքն էլ փչանում է (տեսանյութ)

Վերին Լարսի անցակետում արդեն մեկ շաբաթից ավելի է՝ մի քանի տասնյակից ավելի հայկական բեռնատար մեքենաներ կանգնած են և չեն կարողանում առաջ շարժվել։  Վարորդներն ահազանգում են, որ փչանում է մթերքը, իրենք էլ չգիտեն, թե դեռ քանի օր են այդպես կանգնած մնալու։ Տեսանյութում երևում  են նաև «Սպայկա» ընկերության բեռնատարները։

«Ա1+»-ի հետ զրույցում «Սպայկա» ընկերության դիսպետչերական բաժնի ղեկավար Կարեն Աղդայանը հայտնեց, որ իրենց ընկերության 40 բեռնատար մեքենա արդեն 6 օր է՝ չի կարողանում անցնել Լարսը։

«Ընդհանուր, տարբեր երկրների մեքենաների կուտակումը Վրաստանի տարածքում այժմ մոտ 2000 է՝ Թբիլիսիից մինչև Կազբեկ սար։ Թեև ասում են՝ շինարարություն է, բայց իրականում այդքան մեծ ազդեցություն չի կարող ունենալ։ Փոխվել է Լարսի մաքսատան աշխատակազմը ու երեք անգամ ավելի դանդաղ են աշխատում», - ասաց «Սպայկա» ընկերության ներկայացուցիչը։

Կարեն Աղդայանի խոսքով՝ Վրաստանն էլ առանց հերթի և անարգել անցկացնում է իրենց մեքենաները կամ այն մեքենաները, որոնք վրացական բեռ են տեղափոխում։

Մարդիկ նշում էին նաև, որ Թուրքիայից եկող բեռնատարները նույնպես անարգել անցնում են։ Սրա վերաբերյալ Աղդայանը պատասխանում է, որ թուրքական մեքենաները Թբիլիսի չեն մտնում, այլ շրջանցում են ու առաջ են անցնում, իսկ մեր մեքենաները Թբիլիսիից արդեն պահում են։

«Սպայկա» ընկերության մեքենաներում ամբողջությամբ գյուղմթերք է․ «Շատ վատ վիճակում է մթերքը, եթե մեկ շաբաթ, օրինակ, սառնարանում պահեք խաղող, ի՞նչ վիճակում կլինի։ Հաստատ ոչ այն վիճակում, որ վերավաճառեք։ Մեկ շաբաթ կանգնում են Վրաստանում, մինչև հասնում են գնորդին, ստացվում է 10 օր, գնորդն էլ ասում է՝ ես այսպիսի ապրանք չեմ պատվիրել, չեմ ուզում, մենք էլ ստիպված գին ենք իջեցնում ու տուժում ենք դրանից», - ասաց նա։

Բացի մթերքի փչանալուց, Աղդայանը նշում է, որ մեծ ծախս է նաև մեքենան մեկ շաբաթ և ավելի սահմանին կանգնեցնելը, որովհետև սառնարաններն աշխատում են ու օրական ծախսում մոտ 72 լիտր վառելիք՝ ինչը 6 օրվա հաշվով կազմում է 400$ գումար։

«Վատ վիճակում են նաև վարորդները, պայմաններ չկան, չկան խանութներ ու ունեն սնվելու խնդիր, էլ չեմ ասում անձնական կարիքները։ Եթե ծայրահեղ վիճակ լինի, որոշ մեքենաներ գուցե հետ գան, եթե իմանանք, որ գնորդը հրաժարվում է ու չի ընդունելու ապրանքը», - ասաց նա։

Նրա խոսքով՝ դիմել են նաև ՀՀ Տարածքային կառավարման և ենթակառուցվածքների նախարարություն, վերջինս էլ դիմել է ՀՀ-ում Վրաստանի դեսպանատանը, սակայն հստակ պատասխան դեռև չեն ստացել, թե պատճառը որն է ու խնդիրը երբ կլուծվի։

Տարածքային կառավարման և ենթակառուցվածքների նախարարության հասարակայնության հետ կապերի բաժնի պետ Սոնա Հարությունյանն էլ հայտնեց, որ խնդիրն առաջացել է ռուսական կողմի՝ Լարսի անցակետի ռուսական հատվածում շինարարական աշխատանքների արդյունքում։ Իրականացվում են ճանապարհի լայնացման աշխատանքներ, որոնք տևելու են մինչև 2023 թ․-ը, դրանից հետո ավելի լավ ճանապարհ է լինելու։

«Ներկայումս էլ բաց է անցակետը, բայց քիչ թվով մեքենաներ են անցնում։ Ռուսական ու վրացական կողմերը հայտնում են, որ անցնող բեռնատարների թիվն օրական կտրվածքով էապես նվազել է։ Նախարարությունը Վրաստանի հյուպատոսության հետ աշխատանքներ է տանում, որ փչացող բերք ունեցողները առաջնահերթ կարողանան անցնել», - ասացին նախարարությունից։

Հիշեցնենք, որ սեպտեմբերի 29-ին Վրաստանում Հայաստանի դեսպանությունը տեղեկացրել էր, որ Վրաստանի տարածքով իրականացվող բեռնափոխադրումների մեծ ծավալի, ինչպես նաև ՌԴ Վերին Լարս անցակետում ընթացող շինարարական աշխատանքների հետևանքով Թբիլիսիի շրջանցիկ ճանապարհի հատվածում առաջացել են բեռնատար մեքենաների կուտակումներ։