Տեղեկատու. Facebook-ը գիտի, թե ինչն է վնասում մարդկանց

ОБЩЕСТВО 6 Октябрь, 2021 0:38

Facebook-ի նախկին աշխատակից Ֆրենսիս Հաուգենը Սենատին հայտարարել է, որ Կոնգրեսը պետք է միջամտի իր նախկին գործատուի արտադրանքի ստեղծած «ճգնաժամի» լուծմանը, հայտնում է CNBC-ը:

Նրա խոսքով՝ Facebook-ի ալգորիթմը կարճ ժամանակահատվածում կարող է երիտասարդ օգտվողներին համեմատաբար անվնաս ինչ-որ բանից, օրինակ՝ առողջ սննդի բաղադրատոմսերից տանել դեպի անորեքսիան քարոզող բովանդակություն: Չնայած նա չի մեղադրել թոփ-մենեջերներին վնասակար ապրանքներ դիտավորյալ ստեղծելու համար, նա նշել է, որ գործադիր տնօրեն Մարկ Ցուկերբերգը, ի վերջո, պետք է պատասխանատու լինի իր բիզնեսի ազդեցության համար:

Հաուգենը ցուցմունքներ է տվել սպառողների իրավունքների պաշտպանության Սենատի առեւտրի ենթահանձնաժողովին:

«Ես տեսել եմ, որ Facebook-ը բազմիցս բախվել է սեփական շահույթի եւ մեր անվտանգության միջեւ հակասությունների»,- ասել է Հաուգենը: «Facebook-ը հետեւողականորեն լուծում էր այդ հակասությունները՝ հօգուտ սեփական շահի: Արդյունքը մի համակարգ է, որն ավելի է խորացնում պառակտումը, ծայրահեղականությունն ու բեւեռացումը, եւ խարխլում է աշխարհի հասարակությունները»:

Հաուգենը հայտարարել է, թե կարծում է, որ ինքը ճիշտ է վարվել՝ բացահայտումներ անելով, բայց գիտի, որ Facebook-ը կարող է օգտագործել իր հսկայական ռեսուրսները՝ իրեն «ոչնչացնելու» համար:

«Ես խոսեցի, քանի որ իմացա սարսափելի ճշմարտություն՝ Facebook-ից դուրս գրեթե ոչ ոք չգիտի, թե ինչ է կատարվում Facebook-ի ներսում»,- ասել է Հաուգենը: «Ընկերության ղեկավարությունը պահում է կարեւոր տեղեկություններ հասարակության, ԱՄՆ կառավարության, բաժնետերերի եւ ամբողջ աշխարհի կառավարությունների մասին»:

Թեեւ օրենսդիրները կոչ են անում Facebook-ին հրաժարվել երեխաների համար Instagram-ի հարթակ ստեղծելու իր ծրագրերից, Հաուգենը սենատորներին ասել է, որ ինքն «անկեղծորեն կզարմանա», եթե Facebook-ը դադարեցնի արտադրանքի վրա աշխատանքը:

«Facebook-ը հասկանում է, որ եթե իրենք ցանկանում են շարունակել աճել, իրենց պետք է նոր օգտվողներ գտնել»,- ասել է Հաուգենը՝ հավելելով, որ դա նշանակում է երեխաների մեջ սովորություններ սերմանել: Հաուգենը Facebook-ին մեղադրել է, որ նա «շահույթի համար վճարում է մեր անվտանգությամբ, ներառյալ մեր երեխաների անվտանգությամբ»: Նա ասել է, որ Facebook-ը հնարավորություն ունի ավելի շատ անչափահաս երեխաներ գտնել հարթակում, նույնիսկ եթե նրանք ստում են իրենց տարիքի մասին:

Բացելով լսումները՝ սենատոր Ռիչարդ Բլյումենթալը Ցուկերբերգին կոչ է արել ներկայանալ հանձնաժողովին՝ ընկերության գործողությունները բացատրելու համար: Նա ընկերությանը անվանել է «բարոյապես սնանկ»` սեփական հետազոտողների առաջարկած բարեփոխումներից հրաժարվելու համար:

Հաուգենն ասել է, որ Ցուկերբերգի, որպես գործադիր տնօրենի եւ ընկերության բաժնետոմսերի մեծամասնությամբ քվեարկող հիմնադրի, հատուկ դիրքը նրան հաշվետու է դարձնում միայն իր առջեւ: Հաուգենի խոսքով՝ «նման միակողմանի վերահսկողության ներքո գտնվող այլ այդքան հզոր ընկերություններ չկան»: