«Օգտագործել բոլոր լծակները՝ ցույց տալու, որ Հայաստանն ապահով երկիր է զբոսաշրջիկների համար». «Փաստ»

«Փաստ» օրաթերթը գրում է

Օդանավակայանում մուտքի «վիզան» տրամադրելու փոխարեն անցում է կատարվել այն օնլայն ձևակերպելու և հետո նոր Հայաստան ժամանելու տարբերակին: Շատերը գուցե իրազեկման պակասի կամ էլ այլ խնդիրների պատճառով փաստի առջև են հայտնվում. հասնելով օդանավակայան` խնդիրներ են առաջանում՝ կապված մուտքի «վիզա» ստանալու հետ:

Տուրիզմի հայկական ֆեդերացիայի նախագահ Մեխակ Ապրեսյանը նշում է, որ «վիզան» օնլայն ձևակերպելու տարբերակը նոր չէ, այն սկսեց կիրառվել հատկապես համաճարակի տարածման ժամանակ՝ անվտանգության նկատառումներից ելնելով: «Մինչև համավարակի ի հայտ գալն էլ է գործել այս կարգը: Մարդիկ կարողացել են և՛ առցանց տարբերակով ստանալ «վիզա», և՛ օդանավակայանում, և՛ Հայաստանի օտարերկրյա դիվանագիտական ներկայացուցչություններում:

Պայմանավորված համաճարակային իրավիճակով՝ օդանավակայանում «վիզա» ստանալու տարբերակն առայժմ չի գործում՝ ելնելով, իհարկե, անվտանգության նկատառումներից: Բոլոր այն երկրներից, որտեղից մարդիկ ժամանում են Հայաստան, նրանք «վիզա» պետք է ստանան էլեկտրոնային եղանակով: Սա նորություն չէ. կարծես թե, այսօր բոլոր երկրներում նմանատիպ քայլեր են անում կորոնավիրուսի տարածման կանխարգելման միջոցառումների հետ կապված»,- «Փաստի» հետ զրույցում ասում է Ապրեսյանը:

Նշում է՝ լավ կլինի, իհարկե, որ հնարավորինս շուտ անցնենք մեր կյանքի բնականոն ռեժիմին: «Օդանավակայանում ոչ միայն տեղում վիզա ստանալու խնդիրն այսօր կա, այլ նաև սպասասրահների հետ կապված հարցեր: Դրա մասին վերջերս շատ խոսվեց: Մարդիկ դրսում են ստիպված սպասել, սա անհարմարություններ է ստեղծում: Զբոսաշրջային օպերատորները գնում են օդանավակայան՝ խմբերին դիմավորելու, որոնք այսօր, ցավոք, այդքան էլ շատ չեն: Նրանք խմբերով են գալիս Հայաստան, մի քիչ հարմար պայմաններ պետք է ստեղծվեն նրանց դիմավորելու համար, սա տարրական ուշադրության հարց է: Սրանք խնդիրներ են, որոնք պետք է քննարկել, մտածել դրանց մասին: Իհարկե, անվտանգության կանոնների պահպանումը շատ կարևոր է, սա որևէ մեկս չի հերքում: Բայց զբոսաշրջիկների, մեր օտարերկրյա հյուրերի համար պետք է առավելագույն լավ պայմաններ ստեղծել՝ իհարկե, անվտանգության կանոնները պահելով, որոնք այս պահին առաջնահերթ են»,-նշում է մեր զրուցակիցը:

Երբեմն տպավորություն է, թե շատ հարցերում ունենք պատշաճ իրազեկման խնդիր: Երբեմն կայացվում են տեղին, ժամանակին համահունչ որոշումներ, սակայն ուշացած իրազեկումը բազմաթիվ խնդիրներ է առաջացնում: Եվ ցանկացած նոր փոփոխություն սկզբում հարուցում է մարդկանց դժգոհությունը՝ մինչև դրան «հարմարվելը»: «Իրազեկման հարցն, իրոք, շատ կարևոր է: Ասեմ ավելին՝ մեզ մոտ առկա իրավիճակով պայմանավորված՝ համաշխարհային հանրության և օտարերկրյա իրավասու մարմինների իրազեկումը կարևոր է: Արտերկրում բոլորը պետք է իմանան, թե մեր երկրում ինչ պատկեր է: Դա նպաստելու է նաև մեր զբոսաշրջային գրավչության ապահովմանը: Շատ դեպքերում, երբ մենք հայտնվում ենք «կարմիր գծերում», կամ էլ ոմանք մտավախություն են ունենում Հայաստան այցելելու հետ կապված, սա նաև իրազեկվածության պակասի հետևանք է: Իհարկե, համապատասխան կայքերում տեղադրվում են արված փոփոխությունները, բայց մենք նաև պետք է լրացուցիչ միջոցառումներ անենք դիվանագիտական ուղիներով, առողջապահության նախարարության և զբոսաշրջության կոմիտեի բոլոր հարթակներն օգտագործելով, սփյուռքի ներուժն օգտագործելով, չմոռանալով նաև մասնավոր հատվածի ներուժի մասին:

Այս ամենը համադրելով և օգտագործելով միջազգային հանրությանը՝ բոլորին պետք է ցույց տանք, որ մեր երկրում իրավիճակն այնքան վատ չէ, որքան ոմանք պատկերացնում են և ներկայացնում: Ամեն ինչ պետք է անել «կարմիր գծերում» չհայտնվելու համար: Օրինակ՝ շատ երկրների համեմատ մենք համաճարակային իրավիճակով պայմանավորված ավելի լավ վիճակում ենք: Սա պետք է հաշվի առնել: Պոտենցիալ զբոսաշրջիկներին պետք է տեղեկացնել այդ մասին: Իրավասու այն մարմինների հետ, որոնք իրենց կայքերում հրապարակում են տվյալներ, խորհուրդ տալիս այցելել կամ չայցելել այս կամ այն երկիր, պետք է աշխատանքներ տանել: Կորոնավիրուսի ներկա փուլի պայմաններում սա շատ կարևոր է հատկապես այսօր ձևավորվող շուկայում: Բացի դա, մեր երկիրը հետպատերազմական իրավիճակում է:

Պետք է, օրինակ՝ միջազգային միջոցառումներ այստեղ անցկացնել: Վերջերս Հայաստանում տեղի ունեցավ ԱՊՀ զբոսաշրջության խորհրդի նիստ, որին մասնակցում էին ԱՊՀ երկրների զբոսաշրջության ոլորտի պատասխանատուները: Նման միջոցառումները պետք է լայնորեն լուսաբանել, աշխարհին շատ նուրբ ձևով ներկայացնել իրավիճակը: Այսինքն, եթե օտարերկրացիները Հայաստանում են, քայլում են փողոցներով, այցելում տեսարժան վայրեր, պարզ ասած, եթե նրանք այցելում են Հայաստան, ուրեմն այստեղ անվտանգ է: Կամ վերջերս Գինու փառատոնն անցկացվեց Հայաստանում, տարբեր երկրներից զբոսաշրջիկներ էին ժամանել մեր երկիր: Սրա մասին խոսելու, սա ներկայացնելու համար միջոցներ չպետք է խնայել: Աշխարհին պետք է ցույց տալ, որ մենք շարունակում ենք ապրել, արարել, մենք մեր դիրքերում ենք և մեզ մոտ գալն անվտանգ է: Տարաբնույթ միջոցառումները պետք է օգտագործել և աշխարհին իրազեկել այն մասին, որ Հայաստանում կյանքը շարունակվում է»,-եզրափակում է Մեխակ Ապրեսյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում