Life.panorama.am-ը գրում է.
Դեկտեմբերի 25-ին «Արմնյուզ» հեռուստատեսության եթերում կկայանա Հայկոյի սաների նոր տեսահոլովակի պրեմիերան: Life.panorama.am-ի հետ զրույցում Հայկոն պատմել է, որ մեծ ոգեւորությամբ են սպասում այս պրեմիերային եւ մանրամասներ հայտնել.
«Երգը, որի հիման վրա նկարահանվել է տեսահոլովակը, կոչվում է «Հայաստան» եւ գրվել է ռուսաստանաբնակ երգչուհի Անաիսայի համար, բայց քանի որ տարբեր երգերի cover տարերակները ողջ աշխարհում ասես նորաձեւ են դարձել, ուստի իմ սաները որոշեցին այն ձեւափոխած տարբերակով կատարել»,- նշեց Հայկոն ու ավելացրեց.
«Ես բոլորովին նոր կերպով գործիքավորեցի այս երգը, որից հետո «Hayko music production»-ում կատարվեց ձայնագրությունը: Հատկապես ուզում եմ նշել, որ այս հետաքրքիր աշխատանքում մեծ ներդրում ունեն հնչյունային ռեժիսոր Արման Սարգսյանը, վոկալի մասնագետ Դավիթ Ստեփանյանը եւ խոսքերի հեղինակ Ավետ Բարսեղյանը»:
Երգչի խոսքերով՝ տեսահոլովակը հստակ սյուժե չունի. «Տեսահոլովակի ռեժիսորն է Նիկ Եգիբյանը, իսկ մոնտաժն իրականացրել է Արամայիս Հայրապետյանը: Տեսահոլովակում չկա հստակեցված կամ կոնկրետացված սյուժե, այն շատ երաժշտական է,- նկատեց երգահանն ու նշեց, որ ինքն էլ է նկարահանվել տեսահոլովակում,- այստեղ նաեւ ես եմ նկարահանվել՝ նվագակցում եմ երեխաներին. Որոշեցի ինքս էլ մասնակցել նկարահանմանը, քանի որ կարծեցի այդպես օգնած կլինեմ իմ սիրելի սաներին»:
Հայկոն ցանկացավ նաեւ սաների եւ իր անունից շնորհակալություն հայտնել. «Բացի վերը նշված անուններից, շնորհակալ ենք նաեւ Երեւանի Չայկովսկու անվան երաժշտական դպրոցի տնօրեն Մարտունի Կոստանդյանին, ով միշտ երեխաների կողքին է, շնորհակալ ենք նաեւ այս դպրոցի նվագախմբին, ովքեր եւս նկարահանվեցին տեսահոլովակում, մենք շատ բարձր ենք գնահատում պրոդյուսեր Իրինա Վարդանյանի աշխատանքն ու «Արմենիա TV»-ի հետ համագործակցությունը: Մեր երեխաների գեղեցիկ ոճն ապահովեց «Anahit Simonyan fashion»-ը, ինչի համար եւս շնորհակալ ենք: Եւ վերջում, ամենակարեւորը, շնորհակալ ենք բոլոր ծնողներին, ովքեր օրուգիշեր մեր կողքին էին»,- հավելեց Հայկոն:
Երգիչ-երգահանը շեշետեց նաեւ. «Սա տարին գեղեցիկ կերպով ավարտելու եւ գալիք տարին նոր ուժով դիմավորելու կարեւոր քայլ է իմ սաների համար: Իմ ոգեւորությունն ու ուրախությունը իսկապես մեծ է, ես հպարտանում եմ իմ սաներով»,- նկատեց Հայկոն:
