Մերի Հակոբյանի տեսահոլովակի շնորհանդեսի երեկույթը, հայտնի հյուրերն ու տորթի ընտրությունը

«Կսպանեմ քեզ»․ այսպես է կոչվում դերասանուհի Մերի Հակոբյանի առաջին երգը, որը նա ներկայացրեց տեսահոլովակով։ Մինչև վերջին պահն այս նորությունը գաղտնի պահած երգչուհին մեծ շնորհանդես էր կազմակերպել, որով էլ տվեց երաժշտական պրոֆեսիոնալ կարիերայի սկիզբը։ Շնորհանդեսին ներկա էին Մերիի հայտնի գործընկերներից շատերը։

Tert.am Life–ը ևս ներկա է եղել միջոցառմանն ու ներկայացնում է երեկոյի հետաքրքիր դրվագները։

Դերասանուհին իր առաջին տեսահոլովակը ներկայացրեց մեծ հուզմունքով, որը չկարողացավ զսպել տորթը կտրելու պահին, քանի որ երկար ճանապարհ է անցել մինչև այս պահին հասնելը։ Վերջին շրջանում աշխատում է օր ու գիշեր, քանի որ նաև նկարահանվում է «Մեր թաղի տղերքը» հեռուստասերիալում և մեծ զբաղվածություն ունի։

Մերիի խոսքով՝  շարունակելու է ներկայանալ նաև որպես դերասանուհի: Օրվա տորթի ընտրությունը պատահական չէր՝ դաշնամուրի և տեսախցիկի համադրությամբ: Այն խորհրդանշում էր Մերիի 2 մեծ սերը՝ երաժշտությունն ու կինոն:

Մերին պատմեց, որ վաղուց էր մտածում երաժշտական կարիերայի մասին, քանի որ դերասանական կարիերային զուգահեռ երգում էր երաժշտական տարբեր ակումբներում, սակայն ներկայացնում էր cover–ներ։ Հիմա արդեն նա ունի իր երգը, որի հեղինակն Արտեմ Վալտերն է։ Տեսահոլովակը նկարահանել է ռուսաստանաբնակ հայ ռեժիսոր Արթուր New Way–ը։

«Ժամանակն էր, որպեսզի ես սկսեի երաժշտական իմ կարիերան։ Ուզում էի հասարակությունը տեսներ իմ հնարավորությունները։ Կարծում եմ՝ ես ըստ արժանվույն եմ ներկայանում իմ լսարանին։ Արտեմ Վալտերի հետ երկար ժամանակ փորձում էինք գտնել ինձ հոգեհարազատ երգ։ Արդյունքում ստեղծվեց երգ, որտեղ կան և՛ մեր ժողովրդին, և՛ ինձ հարազատ տեմպ ու ռիթմ։ Տեսահոլովակում էլ ներկայանում եմ այնպիսի ոճով, ինչպես հասարակությունն  ինձ չի տեսել։ Այնքան ուրախ եմ, որ Արտեմը կարողացավ հասկանալ, իսկ Արթուրը՝ լավագույնս ներկայացնել ինձ»,– ասաց Մերին ու հավելեց, որ արդեն սկսել է աշխատանքը հաջորդ երգերի վրա։

«Ես չեմ պատրաստվում պասիվանալ, քանի որ եթե մտնում եմ որևէ ոլորտ, պետք է լինեմ լավագույններից մեկը։ Հուսով եմ՝ հասարակությունը կգնահատի մեր աշխատանքը։ Իհարկե, պատրաստ եմ տարբեր արձագանքների․ նախ՝ կատարյալ ոչինչ չկա, երկրորդ առողջ քննադատության վերլուծությամբ մեր հաջորդ աշխատանքն ավելի լավն է լինելու։ Իմ հաջորդ երգերը ևս լինելու են ակտիվ։ Կարծում եմ՝ այս շրջանում, մենք ուրախ երգերի կարիք շատ ունենք։ Ուզում եմ դրական լիցքեր փոխանցել  իմ ունկնդիրներին»,– ընդգծեց Մերին։

Տեսահոլովակում Մերին ներկայացել է 3 կերպարով, հերոսին մարմնավորում է դերասան Գևորգ Գրիգորյանը։ Ռեժիսոր Արթուր New Way–ն էլ պատմեց, որ տեսահոլովակը նկարահանել է այն սցենարով, որը տեսել է երգն առաջին անգամ լսելուց անմիջապես հետո։

«Ես շատ չեմ հետևում հայկական շոու բիզնեսին, սակայն կան տաղանդավոր մարդիկ, որոնց մասին պարտավոր եմ իմանալ։ Ինձ համար Արտեմ Վալտերն առանձին տեղ է զբաղեցնում որպես երգիչ, երգահան։ Երգը լսելուց հետո առաջին հարցս էր՝ Վալտե՞րն է գրել, որովհետև նրա ձեռագիրը շատ տարբերվող է։ Շատ ուրախացա, որ երգի հեղինակն ինքն է։ Մենք շատ մեծ թիմային աշխատանք ենք արել, որտեղ յուրաքանչյուր անդամի գործը շատ կարևոր էր»,– ասաց նա, ապա նկատեց, որ այս աշխատանքն էքսպերիմենտ է, հաջորդը ևս էքսպերիմենտ է լինելու։

Մերին հիշեց, որ նկարահանումները տևել են մոտ 40 ժամ՝ առանց ընդմիջման։ «Չենք քնել ու չնայած շատ հոգնած էինք՝ պիտի շարունակեինք աշխատանքը, քանի որ Արթուրը 2 օրով էր Մոսկվայից եկել Երևան։ Մի փոքր բարդ էր, բայց  չէինք տրտնջում,– ասաց Մերին ու հավելեց, որ վերջին օրը մի շարք փոփոխություններ են եղել։–Վերջին օրն ենք ընտրել տեսահոլովակի հերոսին՝ դերասան Գևորգ Գրիգորյանին։ Նա Արցախից եկավ Երևան հատուկ նկարահանումների համար։ Վերջին օրով պարզվեց նաև, որ ինձ սպիտակ հագուստ է պետք, ժամերի ընթացքում, աներևակայելի պայմաններում գտա այն։ Մինչև Արթուրի Հայաստան գալն էլ մազերս ամբողջությամբ մանր հյուսքեր էինք արել կերպարներից մեկի համար, Արթուրը հասավ, նայեց և ասաց՝ քանդիր։ Ես հետևում էի նրա բոլոր ցանկություններին, քանի որ պրոֆեսիոնալ է։ Ես Արթուրին ուղղակի ասել եմ՝ ինչ ուզում ես, նկարիր, որովհետև վստահ էի արդյունքի վրա։ Նա տարիների աշխատանքային փորձ ունի ռուսական շոու բիզնեսում և վստահ էի, որ արդյունքը գոհացուցիչ է լինելու։ Հիմա նայում եմ տեսահոլովակն ու հասկանում, որ արժեր վստահել նրան»։

Արթուրը ցանկալի արդյուքնի հասնելու համար ունի իր բանաձևը․ «Ես և՛ սցենարիստ եմ, և՛ ռեժիսոր, և՛ օպերատոր։ Ռեժիսորը պետք է ամեն ինչից հասկանա, որպեսզի կարողանա լավ աշխատանք մատուցել։ Ինքս մասնագիտական կրթություն չունեմ, սակայն 10 տարուց ավելի աշխատում եմ այս ոլորտում, իսկ փորձն ավելին է, քան թեորիան»։