Էլեկտրական ծածկոցներ. որքանո՞վ են դրանք անվտանգ․ «Փաստ»

«Փաստ» օրաթերթը գրում է

Ջեռուցիչները, կոնվեկտորները, օդորակիչները և ջեռուցման այլ էլեկտրական սարքերն օգտագործվում են փակ տարածքները տաքացնելու համար: Ընդ որում, դրանք հաճախ շատ են չորացնում օդը և կարող են առաջացնել փոշու և մանրէների տարածում, եթե ժամանակին չմաքրվեն։ Բացի այդ, ջեռուցման այդ բոլոր սարքերը շատ են էլեկտրաէներգիա սպառում: Եվ չնայած նրան, որ մարդու համար ավելի լավ է քնել զով, օդափոխվող սենյակում, բոլորը չէ, որ կարող են իրենց ստիպել մտնել սառը անկողին: Սա հատկապես վերաբերում է թույլ առողջություն ունեցող մարդկանց: Այդ ամենի պատճառով էլ ստեղծվել է էլեկտրական վերմակը, որը դարձել է ելք նման իրավիճակներից: Էլեկտրական անկողինները՝ էլեկտրական սավանն ու էլեկտրական վերմակը, օգնում են ջերմություն և հարմարավետություն ստեղծել մարդու համար, եթե անգամ նա քնում է ցուրտ սենյակում:

Դրանք արագորեն տաքացնում են անկողինը և ամբողջ գիշեր ջերմություն ապահովում քնած մարդու համար: Միևնույն ժամանակ, նվազագույնի է հասցվում էլեկտրաէներգիայի սպառումը, ինչպես նաև ազդեցությունը շրջակա միջավայրի վրա: Օգտագործման ընթացքում նման սարքը շատ պարզ և անվտանգ է, ինչպես նաև ունի մի շարք այլ առավելություններ: Առաջին անգամ էլեկտրական անկողին հայտնվել է Ամերիկայում: Այն հորինել է բժիշկ Սիդնի Էյս Ռասելը 1912 թվականին: Դա իրականում ոչ թե ծածկոց էր, այլ ավելի շուտ սավան, որը գցվում էր մարդու տակ՝ ներքնակի վերևում, և այն տաքացնում էր մարդուն ներքևից: Էլեկտրական ծածկոցների մասսայական արտադրության վերաբերյալ կա երկու կարծիք:

Ոմանք կարծում են, որ առաջին արտադրությունը գրանցվել է ԱՄՆ-ում 1930-ին, իսկ ոմանք էլ նշում են 1937 թվականը: Ինչ վերաբերում է ժամանակակից էլեկտրական ծածկոցներին և էլեկտրական սավաններին, ապա տարբեր երկրներում նման իրերի տարբերություններ կան: Կանադայում և ԱՄՆ-ում էլեկտրական ծածկոցը կոչվում է վերմակ, իսկ Եվրամիության և Մեծ Բրիտանիայի երկրներում՝ ենթաներքնակ, որի տաքացուցիչը գտնվում է սավանի տակ:

Ոմանք կարծում են, որ մահճակալն ավելի արագ և արդյունավետորեն տաքացնում է ենթաներքնակը, բայց ինչպես ցույց է տվել պրակտիկան, էլեկտրական վերմակն օգտագործման համար ավելի հարմար է: Այն կարող է օգտագործվել ոչ միայն անկողնում գիշերային հանգստի ժամանակ, այլ նաև առօրյա կյանքում: Օրինակ՝ աթոռին նստած կարդալիս կարելի է այն փաթաթել ոտքերին, կամ գցել ուսերին, ինչպես նաև կարելի է ծածկվել վերմակով այն չափով, ինչ չափով ցանկություն կա։ Ժամանակակից էլեկտրական ծածկոցներն ունեն կառավարման վահանակ, որի վրա կա ջերմաստիճանի կարգավորիչ, որն իր հերթին հնարավորություն է տալիս մարդուն սահմանել ջեռուցման համար անհրաժեշտ ջերմաստիճանը:

Լավագույն մոդելներն ունեն տարբեր ավտոմատ ռեժիմներ, ինչպիսիք են տուրբո ջեռուցումը կամ ջեռուցման ավտոմատ անջատումը: Կան մոդելներ, որոնք կարող են օգտագործվել մարմնի հատուկ մասերը տաքացնելու համար: Դրանք շատ հարմար են օգտագործման համար թերապևտիկ և պրոֆիլակտիկ նպատակներով: Օրինակ՝ երբ անհրաժեշտ է տաքացնել միայն մեջքը կամ ոտքերը: Ժամանակակից էլեկտրական ծածկոցների որոշ մոդելներ ածխածնային մանրաթելերի բարակ լարերի պարունակության շնորհիվ գործում են «ցածր լարման» ռեժիմով՝ օգտագործելով ընդամենը 12 - 24 վոլտ հոսանք, և, ի տարբերություն 110-240 վոլտանոց ծածկոցների, ավելի անվտանգ ու հարմարավետ են: Էլեկտրական ծածկոցները գրեթե ամեն օր սերտ շփվում են մարդու մարմնի հետ, ուստի գնելիս պետք է համոզվել, որ այն համապատասխանում է անվտանգության բոլոր անհրաժեշտ չափանիշներին: Այս պահին էլեկտրական ծածկոցների գրեթե բոլոր արտադրողները արտադրում են CE, GS կամ TUV եվրոպական ստանդարտներին համապատասխան վերմակներ:

Դրանք նախատեսում են այնպիսի գործառույթների առկայություն, ինչպիսիք են գերտաքացումից պաշտպանությունը և ավտոմատ անջատումը, երբ ստեղծվում է արտակարգ իրավիճակ: Իսկ արտադրության համար օգտագործվում են բարձրորակ, անվտանգ նյութեր: Ավելի երկար ծառայելու համար խորհուրդ է տրվում էլեկտրական ծածկոցը տեղադրել անկողնային ծրարի կամ հավելյալ ծածկոցի մեջ: Նման կերպ վերմակն ավելի քիչ լվանալու կարիք կունենա, ինչը կերկարաձգի դրա օգտակար կյանքը:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում