«Ո՛չ թալանին»-ի անդամներն ընկել են հետապնդման մեջ. Միհր Ավագյան

Արդեն մի քանի անգամ հայտնել ենք, որ 5 օր տևող ցույցերի մասնակիցներին ոչ մի կերպ «հաղթել» չկարողանալուց հետո, որոշ մարդիկ կամ կազմակերպություններ /հստակ անուններ չունենալու պատճառով չենք կարող նշել/ փորձում են սադրել ժողովրդին:

Այսօր այս առումով վիճակն էլ ավելի է սրվել:

«Ոչ թալանին» նախաձեռնության անդամ, կազմակերպող խմբի անդամ Միհր Ավագյանն իր ֆեյսբուքյան էջում նշում է. «Ո՛չ թալանին» քաղաքացիական նախաձեռնությունը հայտնում է այն մասին, որ որոշ կասկածելի անձինք սկսել են հետապնդել նախաձեռնության անդամներին և խաղաղ հավաքի մասնակիցներին։ Հրավիրում ենք բոլոր իրավասու կառույցների ուշադրությունն այս փաստի վրա, հորդորում ենք չփորձել սպառնալ մեզ և գործել բացառապես օրենքի շրջանակներում»:

Past. am-ը մանրամասնեց այս տեղեկատվությունը: Մենք զրուցեցինք Միհր Ավագյանի հետ, ով պատմեց.

-Երեկ երեկոյան, 22:30-ի սահմաններում, 4 հոգով Թումանյան փողոցով քայլում էինք: Մեզ մոտեցավ մի արտասահմանցի ու անգլերենով խնդրեց, որ օգնենք գարեջուրը բացել: Հրաժարվեցինք, քանի որ կասկածելի էր, թե ինչպես չի կարողանում այդ հասարակ բանն անել:

Այդ ժամանակ, քիչ առաջ անգլերեն խոսացող մարդը սկսեց հայերեն հայհոյանքներ տեղալ, չտրվեցինք սադրանքին ու փորձեցինք հեռանալ: Իսկ <<անգլիացին>> ավելացրեց ․ «Սենց եք անում, որ երկիրը էս վիճակին ա հասել»:

Այդ պահին 3 հոգի շարժվեցին մեր ուղղությամբ: Դուրս եկանք փողոց ու սկսեցինք արագ վազել, այդ 3 անձնավորությունները մեր հետևից սկսեցին վազել: Մեզ հետ 2 աղջիկներ կային, իսկ այդ մարդիկ մարզված էին և ինքնապաշտպանվել չէինք կարող: Վազեցինք Թումանյան-Աբովյան խաչմերուկ և Աբովյան փողոցով իջանք ներքև: Վազելու ընթացքում կորցրին մեզ:

Գիշերը մտածեցինք, որ հավանաբար կապ չունի նստացույցի հետ, պարզապես գիշերային պատահար է: Առավոտյան պարզվեց, որ նախաձեռնության և շարժման մի քանի անդամների հետ նմանատիպ դեպքեր են տեղի ունեցել:

Արուսիկ Տիգրանյան