«Ջերմուկ Գրուպ»-ը պետության օժանդակությամբ կիրականացնի 10,5 մլրդ դրամի ներդրում

ЭКОНОМИКА 24 Декабрь, 2015 16:19

Այսօր կառավարությունը բավարարեց «Ջերմուկ Գրուպ» ՓԲ ընկերության կողմից ներկայացված հայտը գերակա ոլորտում իրականացվող ներդրումային ծրագրերի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատման վերաբերյալ:

Կառավարության հաստատած հեռանկարային զարգացման ռազմավարական ծրագրի համաձայն արդյունաբերությունը և արտահանման խրախուսումը հանդիսանում է գերակա ոլորտ:

ՀՀ էկոնոմիկայի նախարար Կարեն Ճշմարիտյանը նշեց, որ «Ջերմուկ Գրուպ»-ը հանդիսանում է հանքային և բնական աղբյուրի ջուր արտադրող ընկերություն, գործում է սննդամթերքի արտադրության բնագավառում, որը արդյունաբերության ենթաոլորտ է: Միաժամանակ ընկերության արտադրանքի մի մասն արտահանվում է այլ երկրներ: Համաձայն ՀՀ կառավարության 2014թ. մարտի 27-ի թիվ 442-Ն որոշմամբ հաստատված 2014-2025թթ. հեռանկարային զարգացման ռազմավարական ծրագրի 168-րդ կետի 1-ին ենթակետի՝ արդյունաբերությունը և արտահանման խրախուսումը հանդիսանում է գերակա ոլորտ: «Ընկերությունը ծրագրի շրջանակում կներդնի 10,5 մլրդ դրամ, իսկ տարեկան կտա 26 մլրդ դրամի արտադրանք, որի մեծ մասը կարտահանվի»,- ասաց Ճշմարիտյանը:

Ակնկալվում է, որ արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար:

Նարեկ Միրզոյան / Past.am