«Առաջին հերթին իրենց համար են անում, ոչ թե ժողովրդի». «Փաստ»

«Փաստ» օրաթերթը գրում է

Երեկ որոշեցի բորշ պատրաստել, վրաս շատ թանկ նստեց, դեռ լավ է, որ մեր տանը մսով բորշ չեն սիրում, թե չէ գնային այդ հարվածին չէի դիմանա: Կաղամբն արժեր 300, գազարն ու բազումը՝ 400, խառը կանաչու մեկ կապը՝ 300, կարտոֆիլը՝ 350, սոխը՝ 400 դրամ: Մեկ բորշը կարժենա մոտավորապես 1500-2000 դրամ՝ առանց մսի և այն հաշվարկով, որ ձեթը կամ յուղն այդ օրը վերջացած չեն լինի: Կատակը՝ մի կողմ, բայց բանջարեղենի գները ռեկորդներ են սահմանում: Սա ուղղակի սեզոնային գնաճ չէ, եթե որոշ ապրանքների դեպքում դրանք կարող ես ուղղակի չգնել, ինչո՞վ փոխարինել կարտոֆիլը կամ սոխը: Մեզ պարբերաբար խորհուրդ են տալիս առողջարար, թարմ սնունդ օգտագործել: Իսկ գները տեսե՞լ եք:

«Ագրագրագյուղացիական միավորում» ՀԿ-ի նախագահ Հրաչ Բերբերյանն այս գնաճն օրինաչափ է անվանում և բացատրում է, թե ինչու: «Անցած տարի մեր ֆերմերները դիզվառելիքը ձեռք էին բերում 300-350, այս տարի՝ 500 դրամով: Պարարտանյութը գնում էին 6500-7000 դրամով, այս տարի 17-18000 դրամ է՝ մոտ երեք անգամ ավելի: Գնաճ կա նաև թունաքիմիկատների դեպքում: Արդյունքում ունենք գնաճի նման պատկեր: Կառավարության սուբսիդավորումը բլեֆ է, քանի որ սուբսիդավորվում են բանկերը և ոչ թե գյուղացին: Սա ժողովրդին խաբելու մի նոր ձև է: Գազն է թանկանում, բնականաբար, թանկանալու է նաև ջերմոցի արտադրանքը: Մարդիկ նստած նախարարություններում ծրագրեր են անում, բայց ո՞ր չինովնիկը ժողովրդի համար ծրագիր կանի, պարզ չէ՝ առաջին հերթին իրենց համար են անում: Մնացած ամեն ինչը Գյուլնազ տատու հեքիաթներն են»,-«Փաստի» հետ զրույցում ասում է Բերբերյանը:

Ընդգծում է՝ արտադրանքի գնի 70 տոկոսը էներգատարներն են, եթե դրա ինքնարժեքը թանկանում է, բնականաբար, շուկայում ևս ապրանքի գինը կբարձրանա, ուստի որևէ լավ բան սպասել պետք չէ: ՀԿ-ի նախագահը մյուս կողմից էլ մտահոգություն ունի՝ իսկ գուցե սա միտումնավոր է արվում, քանի որ ամեն դեպքում նման գնաճ չպետք է լիներ: «Գուցե սա միտումնավոր է արվում, որպեսզի թուրքական ապրանքը բերեն ու լցնեն Հայաստան: Ըստ օդում կախված լուրերի, կառավարությունն ինչ-որ փաստաթուղթ է շրջանառում, որի համաձայն, սննդի անվտանգության ստուգումը սահմանից կհանվի: Այսինքն, եթե թուրքը ցանկանա մեզ թունավորել, հինգ րոպեի գործ է»,-նշում է մեր զրուցակիցը:

Պարբերաբար թիվ էր շրջանառվում, որ մեր երկրում հողատարածքների 65-ից 70 տոկոսն անմշակ է, անգամ մի տեսակ նախատում էին մարդկանց, որ նրանք չեն ցանկանում աշխատել, հողը մշակել: «Այդ թիվը գնալով ավելի է մեծանալու: Մարդիկ ոչ թե չեն ցանկանում մշակել այդ հողերը, այլ կառավարությունն է այնպիսի պայմաններ ստեղծել, որ գյուղացին ստիպված չի մշակում դրանք, ուղղակի չի կարողանում այդ պայմաններում աշխատել, ոչ թե «լոդրություն» է անում»,-ասում է նա:

Նույն գնաճն առկա է նաև մսամթերքի և կաթնամթերքի պարագայում: «Անասնակերն անցած տարվա համեմատ երկու անգամ թանկացել է, բնականաբար, մսամթերքն ու կաթնամթերքը ևս պետք է թանկանան ու արդեն թանկացել են: Էլ չեմ խոսում անասնագլխաքանակի անկման մասին: Այն բավականին մեծ չափերի է հասնում՝ մոտ 30-40 տոկոսի: Տարբեր գյուղերում տարբեր պատկեր է»,-ասում է փորձագետը՝ հիշեցնելով՝ իսկ գյուղնախարարություն ունե՞նք, որ դեռ մի լավ բան էլ սպասենք:

«Հիմա էլ ավելի ենք համոզվում, որ այդ նախարարությունը միտումնավոր փակվեց: Խոտհարքերն ու արոտավայրերն ինչո՞ւ պետք է թուրքերին հանձներ, եթե գյուղնախարարությունը տիրություն աներ այդ հողերին: Այժմ արդեն ամեն հարցի պատասխանը կա, տեսնում ենք: Չգիտեմ՝ հասկանալով են մեզ տանում այս վիճակին, թե՞ պարզապես մասնագետներ չեն, գուցե ուղղակի դիտավորությո՞ւն է: Դրա համար կան պատկան մարմիններ, թող նրանք զբաղվեն այս հարցերով»,-եզրափակում է ՀԿ-ի նախագահ Հրաչ Բերբերյանը:

ԼՈՒՍԻՆԵ ԱՌԱՔԵԼՅԱՆ 

Մանրամասները՝ «Փաստ» օրաթերթի այսօրվա համարում