Պարուսույց Լարիսա Հակոբյանի եղբայրը, որը աղմկահարույց սպանության գործով մեղադրյալ է, ազատության մեջ է

Պարուսույց Լարիսա Հակոբյանն իր տանը տեղի ունեցած աղմկահարույց սպանությունից հետո նորից սկսել է ակտիվություն ցուցաբերել ինստագրամյան իր էջում:

Նա լուսանկար էր հրապարակել, որին կից գրել էր. «Քիչ-քիչ հետ եմ գալիս, ուզում եմ անցնել աշխատանքի»,- գրել էր պարուսույցը:

Հատկանշական է, որ սոցիալական հարթակում սկսել է ակտիվություն ցուցաբերել, ոչ միայն Լարիսա Հակոբյանը, այլև իր եղբայրը՝ Մոնթեն, որը սպանության գործով կալանավորված էր:

Սոցիալական հարթակում ակտիվ լինելուց զատ, նա նաև հասցրել է արդեն նոր երգ թողարկել, որին կից գրել էր. «Գնահատե՛ք այն, ինչ ունեք»:

ԼՈՒՐԵՐ.com -ը կապ հաստատեց ՔԿ պարզելու՝ ինչ հիմքով է ազատ արձակվել Մոնթե Հակոբյանը: ՔԿ-ից մեզ հայտնեցին, որ վերոնշյալ գործի առթիվ 3 անձի մեղադրանք է առաջադրվել.

«Լարիսա Հակոբյանին, Մոնթե Հակոբյանին և նրանց մորը խմբակային մեղադրանք է առաջադրվել 104 հոդվածի 2-րդ և 3-րդ մասով»,- հայտնեցին ՔԿ-ից հավելելով, որ վերջիններս բաց են թողնվել ստորագրությամբ:

Նշենք, որ քանի դեռ իր եղբայրը գտնվում էր անազատության մեջ, Լարիսա Հակոբյանը պարբերաբար կիսվում է եղբոր հետ ունեցած լուսանկարներով և նրան վերաբերող գրառումներով: Անգամ, ինստագրամի իր սթորի բաժնում լուսանկար էր հրապարակել, որում ցուցադրել էր ձեռքի դաջվածքը, այն կրկին վերաբերում էր եղբորը. «Եղբայրս, շնորհակալ եմ քեզ իմ կյանքի համար»:

Հիշեցնենք՝ նոյեմբերի լույս 8-ի գիշերը ոստիկանության Մալաթիայի բաժին հաղորդում էր ստացվել, որ Հաղթանակ թաղամասի Նորիկի փողոցի տներից մեկում սպանություն է տեղի ունեցել։ Իրավապահները հայտնաբերել էին 36-ամյա Արսեն Սիմոնյանի դին՝ մարմնի տարբեր մասերում կտրած-ծակած վնասվածքներով։

Հավելենք, որ տեղի ունեցած սպանության գործով կար 3 կալանավորված անձ․ ըստ համացանցում տարածված տեղեկությունների՝ նրանք էին՝ 27-ամյա պրոֆեսիոնալ պարուհի և պարուսույց, «Larisa dance» ստուդիայի հիմնադիր-ղեկավար Լարիսա Հակոբյանը (սպանված Արսեն Սիմոնյանի սիրելի էր), նրա  եղբայրը՝ Մոնթեն ու մայրը։