Հիսուս Քրիստոսի մոնումենտալ արձան-համալիրը չի կառուցվում որևէ այլ ոլորտին տրվող աջակցության հաշվին. կա չորս հավանական կետ արձան-համալիրի տեղակայման համար

Այսօր տեղի ունեցավ Հիսուս Քրիստոսի մոնումենտալ արձան-համալիրի մրցութային հանձնախմբի ասուլիսը: Ծառուկյանների ընտանիքի կողմից հայտարարված մրցույթին ներկայացվել էր 200-ից ավելի նախագիծ, գաղափար ու մտահղացում, արդյունքում երկրորդ փուլ է անցել 21 ստեղծագործող` Հայաստանից, Արցախից, Լիբանանից, ԱՄՆ-ից, Իտալիայից, Ռուսաստանի Դաշնությունից, Լատվիայից: Նշվեց, որ  ընտրությունը բավականին բարդ է եղել: Մարտի 22-ին կլինի հանդիպում-քննարկում մասնակիցների հետ, նրանց տրվելու է ժամանակ, ցանկության դեպքում նաև միջոցներ իրենց աշխատանքները կատարելագործելու համար: Որոշ ժամանակ հետո արդեն կամփոփեն երկրորդ փուլի արդյունքները: Հանձնախումբն ընդգծում է` մոնումենտալ արձան-համալիրի կառուցումը մեկ-երկու օրվա աշխատանք չէ, գուցե անգամ պահանջվի մինչև չորս տարի ժամանակ` ցանկալի վերջնարդյունքին հասնելու համար: Ի վերջո, դեռևս հստակ չէ անգամ, թե երբ կսկսվեն շինարարական աշխատանքները:

Արձան-համալիրի կառուցումը քննարկվել է նաև կառավարությունում, այդ մասին մանրամասներ հանձնախմբի անդամները չհայտնեցին, սպասում են պետական այրերի արձագանքին, վստահ են, որ իրենց կողմից եղել է դրական վերաբերմունք: Անդրադարձավ եղավ նաև Հայ Առաքելական եկեղեցու դիրքորոշմանը. ՀԱԵ-ն դեռ պաշտոնական դիրքորոշում չի հայտնել, բայց հանձնախմբի աշխատանքներում ներգրավված է նաև Մայր Աթոռ Սուրբ Էջմիածնի արխիվի և թանգարանների տնօրեն Ասողիկ աբեղա Կարապետյանը:

Շատերին հուզող հաջորդ հարցը հետևյալն է` որտե՞ղ է տեղադրվելու արձան-համալիրը: Հանձնախմբի անդամները նշեցին, որ հենց առաջին պահից քննարկվել է այդ հարցը: Կան ընտրված վայրեր, որոնք պետք է ուսումնասիրվեն: Հետագայում հանձնախմբի անդամներին միանալու են նաև սեյսմոլոգներ և այլ մասնագետներ վայրն ընտրելու համար: Այն դեռևս ընտրված չէ, ՀՀ տարածքում կա չորս հավանական կետ արձան-համալիրի տեղակայման համար, չորս կետերից և որևէ մեկը մայրաքաղաք Երևանը չէ: Վայրերն ուսումնասիրվում են, վեր են հանվում դրանց հետ կապված բազմաթիվ պատմություններ: Կետերից մեկն, օրինակ` Սևանի թերակղզին է, որտեղ գտնվող վանական համալիրը հիմնադրել է Գրիգոր Լուսավորիչը 305 թվականին, այստեղ ինչ-որ խորհուրդ կա: Առհասարակ, ըստ հանձնախմբի անդամների, ընտրված և քննարկվող բոլորը վայրերը գեղեցիկ են և աստվածային:  

Երբ առաջին անգամ Գագիկ Ծառուկյանի կողմից հայտարարվեց Հայաստանում նման արձանի կառուցման ցանկության մասին, եղան նաև նման արձագանքներ, թե այդ գումարը կարող էր ուղղվել սոցիալական ոլորտին կամ էլ բանակաշինությանը: Հանձնախմբի անդամները հերթական անգամ արձագանքում են այս կարծիքներին: «Ոչինչ չի կարող խոչընդոտել կրթության, գիտության, սպորտի, մշակույթի ոլորտներում գործունեություն ծավալելու համար, հոգևոր կյանքը պետք է ապրի: Հաճախ նախատումներ են հնչում, թե նախատեսվող հսկայական գումարն ինչու չի ուղղվում սոցիալական տարբեր խնդիրների լուծմանը, բանակաշինությանը: Գագիկ Ծառուկյանը և նրա հիմնադրամը երկար տարիների ընթացքում բնակչության սոցիալական, ուսանողների կրթական, բանակի տեխնիկական սնուցման գործընթացում միշտ ունեցել են իրենց դերն ու նշանակությունը: Այս վերջին պատերազմից հետո ևս բանակին «Գագիկ Ծառուկյան» հիմնադրամի կողմից միջոցներ են փոխանցվել: Պարոն Ծառուկյանը բազմիցս ասել է, նորից կրկնում ենք իր խոսքերը, որ այս արձանը չի կառուցվում որևէ այլ ոլորտին տրվող աջակցության հաշվին: Պետք չէ մեկը մյուսի հետ շփոթել: Նախաձեռնության հիմքում Գագիկ Ծառուկյանը դրել է ոչ միայն աշխարհասփյուռ հայության, այլ քրիստոնյա ամբողջ աշխարհի միասնությունը և միաբանությունը: Հավատքը բոլոր ժամանակներում մեր ժողովրդի համար փրկիչ ուժ է եղել և այսօր, առավել քան երբևէ, ունենք հավատքով առաջ շարժվելու խնդիր»,-նշեցին հանձնախմբի անդամները: Ի վերջո, կառուցումից հետո Հայաստանը զբոսաշրջիկներին հետաքրքրելու է նաև այս արձանի շնորհիվ: Իսկ նախքան դա, ակնհայտ է, որ հսկայական մոնումենտալ արձան-համալիրի կառուցումն իր ազդեցությունն է ունենալու երկրի տնտեսության վրա, այն էլ` մի քանի ուղղությամբ: Կբացվեն նոր աշխատատեղեր, համայնքից, որտեղ կառուցվի համալիրը, և մոտակա շրջաններից բնակիչներից շատերն աշխատանքի հնարավորություն կստանան: Իսկ սա բարեկեցիկ ապրելու նախապայման է: Կստեղծվեն նոր ենթակառուցվածքներ: Ինչ-որ առումով այս համալիրի կառուցումը նաև ներդրում է մեր երկրի տնտեսության մեջ:

Լուսինե Առաքելյան