Մամախուանա՝ բուժիչ էլիքսի՞ր, թե՞ ոգելից խմիչք. «Փաստ»

«Փաստ» օրաթերթը գրում է

Մամախուանան ալկոհոլային խմիչք է, որը անպայման պետք է փորձել, եթե դուք գտնվում եք Դոմինիկյան Հանրապետությունում: Եվ դրա համար կա մի քանի պատճառ: Առաջին հերթին՝ դա Կարիբյան ավազանի էկզոտիկ խմիչք է: Մամախուանան ազգային խմիչք է, որի որոշ բաղադրիչներ կան բացառապես Կարիբյան ավազանի կղզիներում: Մամախուանայի պատմությունը շատ հետաքրքիր է: Ըստ լեգենդի, եղել է Խուանա անունով վուդու կախարդ, որն էլ ստեղծել է այդ հրաշագործ դեղամիջոցի բաղադրատոմսը տեղի բնակիչների բուժման համար։

Եվ քանի որ դրա պատրաստման մեջ օգտագործվել է գինի և ռոմ, արդյունքում ժամանակի ընթացքում մամախուանան սկսել են օգտագործել ոչ միայն բժշկական նպատակներով։ Թուրմի անվան ծագման մեկ այլ տարբերակ ավելի պրոզայիկ է։ Ենթադրվում է, որ այն առաջացել է ֆրանսիական «damejeanne» բառից, որը բառացի նշանակում է «հյուսած շիշ»։ Բանն այն է, որ հենց նման տարողությունների մեջ էլ վաճառվում է այդ խմիչքը։ Իսկ ընդհանուր առմամբ, մամախուանան արտասովոր տեսք ունի. շշի մեջ մուգ շագանակագույն հեղուկի հետ միասին լողում են կեղևի կտորներ, ճյուղեր ու տերևներ։ Այդ ալկոհոլային ըմպելիքը համեղ է և օգտագործվում է և՛ որպես ինքնուրույն խմիչք, և՛ որպես կոկտեյլների մաս:

Այն պետք է խմել փոքր չափաբաժիններով. կարելի է նոսրացնել կամ էլ ավելացնել սառույց։ Երկրորդ պատճառն այն է, որ մամախուանան համարվում է կյանքի էլիքսիր: Ասեկոսեներ կան, որ այն ունի բազմաթիվ բուժիչ հատկություններ. ուժեղացնում է իմունիտետը, օգնում է ստամոքսի, հոդերի ցավերի դեպքում, հակասեպտիկ է, ունի տոնիկ ազդեցություն: Եվ այս ամենը, ամենայն հավանականությամբ, ճիշտ է, քանի որ ըմպելիքի հիմքը այնպիսի խոտաբույսերի հավաքածու է, որոնցից շատերը բուժիչ են։

Ընդհանուր առմամբ, մամախուանան կարող է պարունակել 6-ից 20 բաղադրիչ, և միայն փորձառու հեքիմները գիտեն, թե ինչպես ընտրել ճիշտ բաղադրիչները ճիշտ համամասնությամբ: Այդ տեղական «կյանքի էլիքսիրը» նաև կոչվում է «կրքի խմիչք», քանի որ այն հզոր աֆրոդիզիակ է: Երրորդ պատճառը դրա բացառիկությունն է: Մամախուանան տնային պայմաններում պատրաստվող արևադարձային հազվադեպ հանդիպող ըմպելիք է: Չնայած այն հանգամանքին, որ այն վաճառվում է Դոմինիկյան Հանրապետությունում գրեթե ամենուր, մամախուանան չի արտահանվում այլ երկրներ և չի արտադրվում արդյունաբերական մասշտաբով։ Քանի որ դա ոգելից խմիչք է, անհնար է նաև այն արտահանել երկրից՝ նույնիսկ որպես հուշանվեր։

Բայց ելք կա. դուք կարող եք գնել խոտաբույսերի հատուկ հավաքածու, որը վաճառվում է շշով կամ տոպրակներով, և արդեն տանը ինքներդ այդ խառնուրդից ըմպելիք պատրաստել։ Կա մի քանի բաղադրատոմս, որոնք բոլորն էլ համանման են: Սկզբից խոտաբույսերի խառնուրդի վրա լցվում է գինի, ժամանակ առ ժամանակ թափահարվում է, մեկ շաբաթ անց՝ հեղուկը քամվում։ Խոտաբույսերը կրկին լցնում են գինու և ռոմի հետ 1:1 հարաբերակցությամբ, ավելացնում մեկ-երկու ճաշի գդալ մեղր, և մամախուանան մեկ օրից պատրաստ է լինում։ Երբ թուրմն ավարտվում է, մնացած նստվածքի վրա կարելի է նորից հեղուկ լցնել ու նոր բաժին ստանալ։

Դա կարելի է կրկնել մինչև 20 անգամ։ Մամախուանան խմիչք է, որը կհիացնի ձեզ իր էկզոտիկությամբ բոլոր առումներով և անմոռանալի զգացմունքներ կթողնի իր հետ ծանոթությունից հետո:

Մանրամասները՝ «Փաստ» օրաթերթի այսօրվա համարում